ەلىمىزدىڭ وڭتۇستىك وڭىرلەرىندە كوكتەمگى دالا جۇمىستارى باستالدى. بۇل تۋرالى قر اۋىل شارۋاشىلىعى ءمينيسترى ەربول قاراشوكەەۆ مالىمدەدى, دەپ حابارلايدى Egemen.kz.
«كوكتەمگى ەگىس جۇمىستارىنا دايىندىق ماسەلەسى مينيسترلىكتىڭ تۇراقتى باقىلاۋىندا. كوكتەمگى دالا جۇمىستارى ەلىمىزدىڭ وڭتۇستىك وڭىرلەرىندە, اتاپ ايتقاندا الماتى, جامبىل, قىزىلوردا جانە تۇركىستان وبلىستارىندا باستالىپ كەتتى. قازىرگى تاڭدا 181,2 مىڭ گەكتار جەرگە ەگىن ەگىلدى», دەدى ەربول قاراشوكەەۆ.
مينيستر نەگىزگى استىق ەگەتىن وڭىرلەردە جاپپاي سەبۋ مامىر ايىندا باستالاتىنىن حابارلادى.
«جۇمىستاردى جۇرگىزۋگە دايىندىق كەزىندە اۋا رايى قۇبىلىستارى ەسكەرىلەدى. وسىلايشا, رەسپۋبليكاداعى ەگىنشىلىكتىڭ ماڭىزدى مىندەتتەرىنىڭ ءبىرى - توپىراقتا ىلعال جيناۋ جانە ونى ۇتىمدى پايدالانۋ جونىندەگى ءىس-شارالاردى جۇرگىزۋ بولىپ وتىر. وڭىرلەر وسىنداي جۇمىس جۇرگىزۋدە, قار توقتاتۋ 3,1 ملن.گا جۋىق الاڭدا جۇرگىزىلدى, بۇل 2021 جىلدىڭ سايكەس كەزەڭىنىڭ دەڭگەيىنەن 2,5 ەسە ارتىق», دەپ تولىقتىردى ەربول قاراشوكەەۆ.
اۋىل شارۋاشىلىعى مينيسترلىگىنىڭ باسشىسى اتاپ وتكەندەي, قازىرگى ۋاقىتتا ىلعالدى جابۋ بويىنشا جۇمىستار جۇرگىزىلۋدە. ءمينيستردىڭ ايتۋىنشا, توپىراقتا ىلعالدىڭ جەتكىلىكتى جيناقتالۋى عانا جاقسى ءونىم بەرە الادى.