پارلامەنت سەناتى قارجى جانە بيۋدجەت كوميتەتىندە ەكونوميكا جانە بيۋدجەتتىك جوسپارلاۋ ءمينيسترى ەربولات دوساەۆپەن كەزدەسۋ بولدى. وندا قازاقستانداعى قازىرگى كەزدەگى سالىق جەڭىلدىكتەرىنىڭ تيىمدىلىگى تۋرالى ماسەلەلەر تالقىلاندى.
كەزدەسۋدى اشا كەلىپ, كوميتەت توراعاسى راشيت احمەتوۆ ەكونوميكانى مەملەكەتتىك رەتتەۋدە سالىق جەڭىلدىكتەرى ماڭىزدى قۇرال ەكەنىن جانە ءوندىرىستى دامىتۋعا, ونى جەتىلدىرۋگە جانە قاجەتتى ينفراقۇرىلىم نىساندارىن جاساۋعا وڭ ىقپال ەتەتىنىن اتاپ ءوتتى. ونىڭ ايتۋىنشا, قازىرگى كەزدە قازاقستاندا جالپى سوماسى 1 251,7 ميلليارد تەڭگە بولاتىن 281 سالىق جەڭىلدىكتەرى قاراستىرىلىپ وتىر. 2008 جىلمەن سالىستىرعاندا سالىق جەڭىلدىكتەرىنىڭ سانى 65 پايىزعا ۇلعايعان.
«وسىعان بايلانىستى مەملەكەت باسشىسى «قازاقستان-2050» ستراتەگياسى – قالىپتاسقان مەملەكەتتىڭ جاڭا ساياسي باعىتى» اتتى جولداۋىندا قولدانىستاعى بارلىق سالىق جەڭىلدىكتەرىنە رەۆيزيا جاساۋ جانە ولاردىڭ مەيلىنشە ءتيىمدى بولۋى قاجەتتىگى تۋرالى اتاپ ءوتتى», دەدى سەناتور.
كەزدەسۋ بارىسىندا سەناتورلار سالىق جەڭىلدىكتەرىن ەسەپتەۋ ادىستەمەسى, ولاردىڭ بەرىلۋىنە مونوتورينگ جاساۋ, سالىق تولەۋشىلەردىڭ بوساعان قارجى رەسۋرستارىن ءوندىرىستى دامىتۋعا پايدالانۋعا كەپىلدىك جۇيەسىن زاڭ جۇزىندە بەكىتۋ قاجەتتىگى, قۇندى قاعازدار نارىعىن سالىق جەڭىلدىكتەرىمەن ىنتالاندىرۋ جونىندە وزەكتى ساۋالدار قويدى.
ە.دوساەۆ قازىرگى كەزدە قولدانىستاعى سالىق جەڭىلدىكتەرى بويىنشا مەكەمەدە رەۆيزيا جۇرگىزىلىپ, تالداۋ جاسالىپ جاتقانى جانە ونىڭ ناتيجەسى بويىنشا سالىق كودەكسىنە وزگەرىستەر ەنگىزۋ جونىندە ۇسىنىستار ازىرلەنەتىنى تۋرالى حابارلادى. سوعان سايكەس, زاڭ جوباسى بيىلعى قىركۇيەك ايىندا پارلامەنتكە ۇسىنىلاتىن بولادى, دەپ حابارلادى سەناتتىڭ ءباسپاسوز قىزمەتى.