تۇركىستان وبلىسىندا جۇك كولىگىنىڭ جۇرگىزۋشىسى رولدە ۇيىقتاپ كەتىپ, جۇك كوتەرگىش كرانعا سوعىلدى, دەپ حابارلايدى Egemen.kz Polisia.kz سايتىنا سىلتەمە جاساپ.
وقيعا 1 ساۋىردە تۇركىستان وبلىسى ساۋران اۋدانى اۋماعىندا شىمكەنت-سامارا تاسجولىنىڭ 135-شاقىرىمىندا بولعان. پوليتسيا مالىمەتىنشە, ءبىر باعىتتا كەلە جاتقان Renault Magnum كرانى مەن Volvo جۇك كولىگى سوقتىعىسقان.
«25 توننالىق Renault Magnum اۋىر جۇك كولىگىنىڭ سوڭىنان كەلە جاتقان Volvo جۇرگىزۋشىسى رولدە ۇيىقتاپ كەتىپ, جۇك كوتەرگىش كرانعا سوعىلدى. سالدارىنان تىركەمەدە تۇرعان اۆتوكران اۋدارىلعان. وسى ماڭدا پاترۋلدىك قىزمەتتە جۇرگەن تۇركىستان وبلىسى پاترۋلدىك پوليتسيا باتالونىنىڭ قىزمەتكەرلەرى وقيعا ورنىنا دەرەۋ جەتىپ, جۇرگىزۋشىلەرگە كومەكتەستى. رەسەيلىك ءنومىرلى Volvo جۇك كولىگى تىزگىنىندە رەسەي ازاماتى بولعان. ەكى جۇرگىزۋشى دە زارداپ شەككەن جوق», دەلىنگەن حابارلامادا.
بۇگىندە بۇل فاكتى بويىنشا ساۋران اۋداندىق پوليتسيا ءبولىمى تەكسەرۋ جۇرگىزىپ, وقيعانىڭ ءمان-جايىن انىقتاپ جاتىر. اۋدارىلعان كولىك جول جيەگىنە شىعارىلىپ, كولىك قوزعالىسىنا جول اشىلعان.