الماتىدا كورنەكتى قوعام جانە مەملەكەت قايراتكەرى, اۆتونوميالى قازاق رەسپۋبليكاسى ورتالىق اتقارۋ كوميتەتىنىڭ تۇڭعىش توراعاسى سەيىتقالي مەڭدەشەۆتىڭ 140 جىلدىعىنا وراي «سەيىتقالي مەڭدەشەۆ. قۇجاتتارى مەن ماتەريالدار جيناعى» اتتى كىتاپتىڭ تۇساۋكەسەر ءراسىمى ءوتتى, دەپ حابارلايدى Egemen.kz
سەيىتقالي مەڭدەشەۆ كەڭەس داۋىرىندەگى قازاق مەملەكەتتىلىگىنىڭ قالىپتاسۋى مەن دامۋىنا ۇلكەن ۇلەس قوسقان بىرەگەي تۇلعا, قازاق جەرىنىڭ تۇتاستىعىن قالپىنا كەلتىرۋ, كەڭەستىك بيلىك ورگاندارىن جەرگىلىكتەندىرۋ جولىندا, 1921-1922 جىلدارداعى اشتىققا قارسى كۇرەستى ۇيىمداستىرۋعا, قازاق اعارتۋ جانە عىلىم سالالارىنىڭ نەگىزىن قالاۋعا ەرەن ەڭبەك سىڭىرگەن قايراتكەر.
«كىتاپتى شىعارۋداعى ماقسات – قازاق رەسپۋبليكاسىنىڭ قۇرىلۋى مەن قالىپتاسۋىنا ەرەن ەڭبەك سىڭىرگەن سەيىتقالي مەڭدەشەۆتىڭ تاريحي تۇلعاسى, ونىڭ قازاق حالقىنا سىڭىرگەن قىزمەتى ارقىلى حح عاسىردىڭ 20-30 جىلدارىنداعى تاريحتىڭ اقتاڭداق بەتتەرىن اشۋ, وتاندىق تاريحي تۇلعاتانۋ عىلىمىنا ۇلەس قوسۋ, وسكەلەڭ ۇرپاقتى وتانسۇيگىشتىك پەن ادامگەرشىلىككە تاربيەلەۋ, الاش قايراتكەرلەرىن ەسكە الىپ, ولاردىڭ مۇراسىن جاستارعا جانە بۇكىل الەمگە پاش ەتۋ», دەيدى شارانى ۇيىمداستىرۋشىلار.
س. مەڭدەشەۆتىڭ 140 جىلدىق مەرەيتويىنا تارتۋ بولعان جيناق قر ورتالىق مەملەكەتتىك ءارحيۆىنىڭ ديرەكتورى, تاريح عىلىمدارىنىڭ كانديداتى, يدەيا اۆتورى س. شىلدەبايدىڭ عىلىمي جەتەكشىلىگىمەن قۇراستىرىلعان.
وسى جيناق ارقىلى قازاقستان رەسپۋبليكاسى مەن رەسەي فەدەراتسياسىنىڭ ارحيۆتەرىنەن انىقتالعان س. مەڭدەشەۆتىڭ قۇجاتتارى مەن سويلەگەن سوزدەرى, مەرزىمدى باسىلىم بەتتەرىندە جارىق كورگەن ماقالالارى تۇڭعىش رەت جينالىپ, عىلىمي اينالىمعا ەنگىزىلىپ وتىر. جيناققا 93 تاريحي قۇجات, س. مەڭدەشەۆتىڭ 44 ماقالاسى مەن 22 فوتوسى ەنگىزىلىپ, فوتوداعى كوپتەگەن قايراتكەرلەردىڭ كىم ەكەندىگى تۇڭعىش رەت عىلىمي تۇرعىدان انىقتالعان. رەسەي مەن قازاقستان ارحيۆتەرىنەن جينالعان تاريحي فوتولاردىڭ 10-نان استامى بۇرىن-سوڭدى بەلگىسىز بولىپ كەلگەن سۋرەتتەر.
تۇساۋكەسەر ءراسىمىن الماتى قالاسىنداعى «عىلىم ورداسىندا» قر ورتالىق مەملەكەتتىك ءارحيۆى, ش.ش. ءۋاليحانوۆ اتىنداعى تاريح جانە ەتنولوگيا ينستيتۋتى مەن «عىلىم ورداسى» رمم بىرلەسە وتىرىپ ۇيىمداستىردى.
شاراعا وتاندىق جانە شەتەلدىك تاريحشى عالىمدار, ستۋدەنتتەر, ماگيسترانتتار, دوكتورانتتار جانە باق وكىلدەرى, C.مەڭدەشەۆتىڭ تۋىستارى مەن جەرلەستەرى, سونداي-اق, وسى تاقىرىپقا قىزىعۋشىلىق تانىتقان ازاماتتار قاتىستى.