پرەزيدەنتتىڭ حالىققا ارناعان جولداۋىن ەلىمىزدىڭ الداعى دامۋىنا سەرپىن بەرەتىن قۇجات رەتىندە قابىلدادىم. ويتكەنى مەملەكەت باسشىسى كوتەرگەن ءاربىر ماسەلەدە دامۋ باعدارى عانا ەمەس, ونى شەشۋدىڭ جولدارى مەن باتىل قادامدار قاتار ايتىلدى. مىسالى, جاڭا وبلىستاردىڭ پايدا بولۋى, اسىرەسە الماتى وبلىسىنىڭ ءبولىنۋى مەن الداعى دامۋ جوسپارى ءوڭىردىڭ تاياۋ كەلەشەگىن ايقىندايدى.
وسى وڭىردە تۋىپ-وسكەن ازامات رەتىندە ايماقتا سوڭعى جىلداردا قوردالانعان ماسەلەلەردىڭ ەندىگى كەزەكتە ۋاقىتىندا شەشىلەتىندىگى قۋانتادى. سونداي-اق ءوز باعدارلاماسىن ورىنداماعان دەپۋتاتتاردى مانداتتان ايىرۋ تۋرالى شەشىم دە وتە قۇپتارلىق ماسەلە.
مەنىڭ ويىمشا, بيلىك وكىلدەرىنىڭ ءوز ۋادەلەرىن ورىنداماۋىنان كوپتەگەن جىلدار بويى ءتۇرلى ماسەلەلەر قوردالاندى. جۇرتشىلىق بيلىك قۇرىلىمدارىنا سەنۋدەن قالدى. بۇل شەشىم الداعى ۋاقىتتا بيلىك وكىلدەرىنە دە, دەپۋتاتتارعا دا ۇلكەن جاۋاپكەرشىلىك ارتا وتىرىپ, ءىستىڭ ناتيجەلى بولۋىنا ىقپال ەتەدى دەپ سەنەمىن.
پرەزيدەنتتىڭ, سونداي-اق اكىمدەر مەن اكىم ورىنباسارلارىنىڭ پارتيا قىزمەتىنە ارالاسپاۋى دەموكراتيالىق قادامداردىڭ ءبىرى. پرەزيدەنت اتاپ وتكەندەي, باستى بايلىعىمىز – تاۋەلسىزدىگىمىزدى ساقتاۋ, ۇلتتىق بىرەگەيلىك نەگىزدەرىن نىعايتۋ, ەلىمىزدىڭ جاڭارۋىنا باعىتتالعان جوبالاردى جۇزەگە اسىرۋ, ۇلەس قوسۋ – ءاربىر قازاقستاندىقتىڭ پارىزى.
ەلىمىزدىڭ ءاربىر ازاماتى ءوزىن دامىتقاندا عانا, ەلىمىز العا جىلجيدى. دامۋ مەن جاڭارۋ ءاربىر وتباسىنا, قوعامدىق ءومىردىڭ بارلىق قاتىسۋشىلارىنا بايلانىستى. جولداۋ تەك العا جىلجۋعا, وزگەرۋگە, تىڭنان جول سالىپ جاڭا قازاقستاندى قۇرۋعا شاقىرادى.
باعدات انارباەۆا,
Qamqor charity قق ءتورايىمى