بۇگىن ءماجىلىستىڭ جالپى وتىرىسىندا «قر ۇكىمەتى مەن تۇركى اكادەمياسى اراسىنداعى تۇركى اكادەمياسىن ورنالاستىرۋدىڭ شارتتارى مەن ءتارتىبى تۋرالى كەلىسىمدى راتيفيكاتسيالاۋ تۋرالى» قازاقستان رەسپۋبليكاسى زاڭىنىڭ جوباسى ماقۇلداندى, دەپ حابارلايدى Egemen.kz.
«اكادەميانىڭ باستى ماقساتى – تۇركى تىلدەرىن, ادەبيەتىن جانە مادەنيەتىن ساقتاۋعا, دامىتۋعا جانە تانىمال ەتۋگە باعىتتالعان تۇركولوگيا سالاسىنداعى زەرتتەۋلەردى جۇرگىزۋ. قازىرگى تاڭدا اكادەمياعا مۇشەلىككە قازاقستاننان باسقا قىرعىزستان, ازەربايجان جانە تۇركيا ەلدەرى ەنىپ وتىر. ال ۆەنگريا بۇگىنگى كۇنى باقىلاۋشى مىرتەبەسىنە يە. اكادەميانىڭ شتاب-پاتەرى نۇر-سۇلتان قالاسىندا ورنالاسقانىنا بايلانىستى كەلىسىمنىڭ ماقساتى - ەلىمىزگە جۇمىس ىستەۋ كەزەڭىندەگى تۇركى اكادەمياسىنىڭ مارتەبەسىن, ونىڭ ارتىقشىلىقتارى مەن يممۋنيتەتتەرىن انىقتاۋ», دەدى زاڭ جوباسى تۋرالى بايانداعان ءبىلىم جانە عىلىم ءمينيسترى اسحات ايماعامبەتوۆ.
ءمينيستردىڭ دەرەگىنشە, اكادەميادا 17 ادام جۇمىس ىستەيدى. ونىڭ ىشىندە ەكەۋى شەتەل ازاماتتارى.
«كەلىسىم كۇشىنە ەنگەننەن كەيىن اكادەميانىڭ جەرگىلىكتى جانە شەتەلدىك قىزمەتكەرلەرى سىرتقى ىستەر مينيسترلىگىندە اككرەديتتەۋدەن ءوتۋى ءتيىس بولادى. اكادەميا عىلىمي-زەرتتەۋ جۇمىستارىمەن, كىتاپتار مەن جۋرنالدار شىعارۋمەن اينالىسادى, تۇركى ەلدەرىنىڭ اتاقتى عالىمدارىنا حالىقارالىق فورۋمدار مەن كونفەرەنتسيالار وتكىزۋدە, تۇركولوگيا بويىنشا عىلىمي جۇمىستار جۇرگىزۋدە بۇگىنگى كۇنى ۇلكەن بەلسەندىلىك تانىتىپ كەلەدى. تۇركىتىلدەس مەملەكەتتەر ۇيىمىنا قاتىسۋشى ەلدەرمەن ىنتىماقتاستىقتى نىعايتۋدىڭ جانە قر-دىڭ تۇركى الەمىندەگى ءرولىن ارتتىرۋدىڭ ماڭىزدىلىعىن نازارعا الا وتىرىپ, اتالعان زاڭ جوباسىن قاراستىرۋلارىڭىزدى سۇرايمىن», دەدى ول.
زاڭ جوباسىن تالقىلاۋ بارىسىندا دەپۋتاتتار قۇجاتتى ماقۇلداپ, سەنات قاراۋىنا جىبەرۋ تۋرالى شەشىم قابىلدادى.