ەڭبەگىمەن ەل قۇرمەتىنە بولەنگەن

قازاق اۋىلشارۋاشىلىق ينستيتۋتىنىڭ اگرونوميا فاكۋلتەتىن ۇزدىك بىتىرگەن, تيميريازەۆ اتىنداعى اۋىل شارۋاشىلىعى اكادەمياسىندا ءبىر جىلدىق تاعىلىمدامادان وتكەن, ودان پارتيانىڭ وسىنداعى جوعارى مەكتەبىن بىتىرگەن ونىڭ ءبىلىمى دە ءوز زامانىندا وزىق بولدى. ج.ىسقاقوۆتىڭ جۇمىسقا ادالدىعى, كەز كەلگەن ءىستى دوڭگەلەنتىپ اكەتەتىن ىسكەرلىگى, باعىنىشتىلارىنا  جۇعىمدىلىعى, باي تاجىريبەسى مەن تەرەڭ ءبىلىمى پاۆلودار وبلىسى اتقارۋ كوميتەتىنىڭ توراعاسى قىزمەتىن التى جىل بويى اتقارعاندا دا سۇرىندىرگەن جوق. وسى قىزمەتتەردىڭ بارىندە ول حالىققا قولىنىڭ تازالىعىمەن, ادامدارعا دەگەن سەرگەكتىگىمەن, ۇلكەنگە قۇرمەتپەن, كىشىگە ىزەتپەن تۇراتىن كىشىپەيىلدىگىمەن جاعا ءبىلدى. 

جاقسىلىق ىسقاقوۆ 1975-1985 جىلدارى وبلىستىق اتقارۋ كوميتەتى توراعاسىنىڭ ءبىرىنشى ورىنباسارى لاۋازىمىندا ءجۇرىپ, ونوماستيكالىق كوميسسيانىڭ توراعاسى بولعانشا پەتروپاۆلدا بىردە-ءبىر عيماراتتىڭ اتاۋى قازاقشا بولمايتىن. «شولپان», «راۋشان», «جانار» جانە ت.ب. دۇكەن, بالاباقشا اتاۋلارىن جاكەڭنىڭ جەتەكشىلىگىندەگى ونوماستيكالىق كوميسسيا ەنگىزدى. ال ورتالىقتاعى ەڭ ۇلكەن, توعىز قاباتتى قوناقۇيدى قالالىق بيلىكتەگىلەر «كولوس» دەپ اتايمىز دەپ تالاسقاندا, «جوق, «قىزىلجار» بولادى», دەپ جەڭىپ بەرگەن دە وسى كىسى بولاتىن.  بۇل دا ۇلتتىق دۇنيەنى قولداي بىلگەن, ۇلتتىق مۇددەنى ۇمىتپاعان ءوز زامانىنىڭ ەرلىگى. 1988 جىلى پاۆلوداردا وتكەن رەسپۋبليكالىق ايتىسقا وبلىستىق اتقارۋ كوميتەتىنىڭ توراعاسى جاقسىلىق ىسقاقوۆتىڭ ءوزى كەلىپ, ءوز قولىمەن جۇلدە ۇلەستىرگەنگە دەيىن جەرگىلىكتى بيلىكتەگىلەر جوعارىعا الاقتاپ, كوپ ۋاقىت بويى ايتىستى اشىق قولداي الماعانىن دا قازىرگى جۇرت بىلە بەرمەيدى. ول كەزدە قازاقى دۇنيەنىڭ ءبارى ۇلتشىلدىقپەن بايلانىس­تىرىلىپ, كىنا تاعۋعا دايىن تۇراتىن... سول تاپتاۋرىندى العاش بۇزعانداردىڭ ءبىرى دە جاكەڭ بولدى.

ناۋان ناۋرىزدىڭ جارقىراعان كۇندەرىنىڭ بىرىندە 1932 جىلى دۇنيەگە كەلگەن ونىڭ 90 جىلدىق مەرەيتويىن وبلىس قانا ەمەس, رەسپۋبليكا جۇرتشىلىعى قۋانىشپەن اتاپ ءوتتى دەسەك, ارتىق ەمەس. جاكەڭ دىنمۇحاممەد قو­ناەۆ باستاعان قازاقستاننىڭ ەلگە ادال قىزمەت ەتۋدى عانا ويلا­عان ۇلگىلى باسشىلارىنىڭ اقىرعىسى. ول كەشەگى ماقتاي ساعديەۆ, كاكىمبەك سالىقوۆ, ءنىل بولات­باەۆ, ۆاسيلي دەميدەنكو, ەسىم شايكين سياقتى ساڭلاق­تارمەن قاتار قىزمەت ەتىپ, سولارمەن قاناتتاس بولعان جان. قازاقتىڭ نارقاسقالارىنىڭ اراسىنداعى ۆاسيلي پەتروۆيچ جاكەڭە تىكەلەي ۇستاز بولعان ادام. «جاقسىلىق, قازاق كەڭشارلارىن اشۋ كەرەك» دەگەن دە سول باسەكەڭ (جاكەڭ ءوزى وسىلاي عانا اتايدى)  بولاتىن.  وسىدان كەيىن ج.ىسقاقوۆ سولتۇستىكتە 12 قازاق كەڭشارىن اشقانى بەلگىلى.

مەرەيتويدى وبلىس اكىمى قۇمار اقساقالوۆ اشىپ, ارداقتى اقساقالدى قۇتتىقتاپ, وبلىس تۇرعىندارى اتىنان شاپان جاپتى جانە پرەزيدەنت قاسىم-جومارت توقاەۆتىڭ قۇتتىقتاۋ حاتىن تاپسىردى. الىستان  كەلگەن قوناقتار قاتارى كىلەڭ قازاقتىڭ جاقسىلارى مەن جايساڭدارىنان ەدى. اتاپ ايتقاندا ەرىك سۇلتانوۆ, بولات جىلقىشيەۆ, سامات ەسكەندىروۆ, قۋات ەسىمحانوۆ, نۇرجان اشىمبەتوۆ, گەنەرال اباي تاسبولاتوۆ, عالىمدار عالىمقايىر مۇتانوۆ, اناتولي باشماكوۆ جانە ت.ب. بولىپ, ءبارى دە قۇتتىقتاۋ سوزدەرىن ايتتى. سەناتورلار پارلامەنت سەناتىنىڭ توراعاسى ماۋلەن اشىمباەۆتىڭ, گەنەرال ا.تاسبولاتوۆ رەسپۋبليكالىق ارداگەرلەر ۇيىمىنىڭ قۇتتىقتاۋ حاتىن تاپسىردى. قوناقتار اراسىندا جۇمابەك تاشەنوۆتىڭ كەلىنى فاتيما تاشەنوۆا دا بولىپ, مەرەيگەردى قۇتتىقتادى. سولتۇستىكتە اتاقتى اقساقالدار اراسىنان ءبىر-اق كىسى جاكەڭنەن ۇلكەن ەكەن. زەينوللا ولجاباەۆ ەسىمدى 95 جاستاعى قاريا باتىر باياننىڭ تىكەلەي ۇرپاعى. 90-عا كەلىپ جاتقان ابىزدى «قاراعىمداپ» قۇتتىقتاعان بۇل اقساقالدىڭ سوزدەرى دە ەرەكشە ەستە قالدى.

مەرەيتوي يەسى ءوزىنىڭ سوزىندە ەلىمىزدىڭ كوركەيە تۇسكەنىن كورۋدەن ءالى دە ءۇمىتتى ەكەنىن, جاڭا قازاقستان­نىڭ بولاشاعىنا سەنەتىنىن ايتتى.