ەلىمىزدە سوڭعى ەكى اي ىشىندە پوليتسيا قىزمەتكەرلەرى 378 ەسىرتكى قىلمىسىن انىقتاپ, 7 زەرتحاناسىن جويعان. تىركەلگەن قىلمىستاردىڭ 248-ءى ەسىرتكى زاتتارىن وتكىزۋگە, 85-ءى اسا ءىرى مولشەردە ساقتاۋعا قاتىستى.
قاڭتار جانە اقپان ايلارىندا ەسىرتكى قىلمىسىمەن كۇرەس جۇرگىزەتىن پوليتسەيلەر 422 كيلو ەسىرتكى, ونىڭ ىشىندە 196 كيلو گاشيش, 213 كيلو ماريحۋانا جانە 6 كيلودان استام سينتەتيكا تاركىلەگەن. ءىىم ەسىرتكى قىلمىسىنا قارسى ءىس-قيمىل دەپارتامەنتى باسقارماسىنىڭ باسشىسى باقىتجان ءامىرحانوۆتىڭ مالىمدەۋىنشە, قازىردىڭ وزىندە زاڭسىز اينالىمنان الىنعان سينتەتيكا كولەمى 40 كيلوعا جۋىقتاعان.
ينتەرنەتتەگى ەسىرتكى ساۋداسىن انىقتاپ, قىلمىسكەرلەردى اشكەرەلەۋ ءۇشىن ەنگىزىلگەن «كيبەرقاداعالاۋ» اقپاراتتىق جۇيەسى دە ءوز ناتيجەسىن كورسەتىپ وتىر. بۇل جۇيە اقپارات جانە قوعامدىق دامۋ مينيسترلىگىنە وسىنداي ينتەرنەت رەسۋرستاردى بۇعاتتاۋ ءۇشىن سىلتەمەلەردى اۆتوماتتى رەجىمدە جىبەرۋگە مۇمكىندىك بەرەدى. ماسەلەن, جىل باسىنان بەرى اقپارات مينيسترلىگىنە وسىنداي 440 ينتەرنەت رەسۋرس, ونىڭ ىشىندە 150-دەن استام تەلەگرام ارنا بۇعاتتاۋعا جىبەرىلگەن. سونداي-اق ءىىم ينتەرنەت الەمىن جاۋلاپ العان ەسىرتكى ساۋداگەرلەرىنىڭ زاڭسىزدىقتارىن دەر كەزىندە اشكەرەلەۋ ماقساتىندا بىلىكتى IT ماماندارىن تارتىپ, ىشكى ىستەر ورگاندارىنىڭ تەحنيكالىق الەۋەتىن نىعايتۋعا دەن قويىپ وتىر. وسىعان وراي Astana IT Universit-مەن قاشىقتىقتان ءبىلىم بەرۋ تەحنولوگيالارىن قولدانۋ ارقىلى باعدارلامالار مەن دەرەكتەر بازاسىن ازىرلەۋدى كوزدەيتىن عىلىمي-زەرتتەۋ سالاسىنداعى ءوزارا ءىس-قيمىل تۋرالى مەموراندۋمعا قول قويىلعان. «OLX Group سياقتى ەڭ تانىمال پلاتفورمالارمەن ءوزارا ءىس-قيمىل جاساۋعا دا ەرەكشە ءمان بەرىپ وتىمىز. سونىڭ ارقاسىندا بيىل كۋرەرلىك جۇمىستىڭ اتىن جامىلىپ ەسىرتكى ساۋدالاعان 50-دەن استام حابارلاندىرۋ الىنىپ تاستالدى. مۇنداي جۇمىستار قازىرگى تاڭدا Telegram سەرۆەرىنىڭ قازاقستاندىق نۇسقاسىمەن دە جۇرگىزىلۋدە. Telegram ارناسىندا دا ەسىرتكىنى جاسىرىن ساتۋمەن اينالىساتىن 440 چات انىقتالدى», دەيدى ءىىم وكىلى.