جاۋاپكەرشىلىك جانە جول

14 قاڭتار. اتىراۋ وبلىسىندا دوس­سور-قۇلسارى-بەينەۋ كۇرە جولىندا Honda Odyssey ۆاز-2115 اۆتوكولىگىمەن سوقتى­عىسقان. اپات سالدارىنان 5 ادام قازا تاۋىپ, بىرەۋى اۋرۋحاناعا ءتۇستى. قاڭتاردىڭ 15-ءى. قىزىلوردا وبلىسىندا ارال-قازالى اۆتوجولىندا Mazda كولىگىنىڭ جۇرگىزۋشىسى كوكتايعاقتا رۋلگە يە بولا الماي, قارسى بەتتە كەلە جاتقان Volvo جۇك كولىگىمەن بەتپە-بەت قاقتىعىسىپ, جول اپاتىنان 8 ادام كوز جۇمدى. 18 قاڭتار. جامبىل وبلىسىنداعى ساۋداكەنت-جاڭاتاس تاسجولىندا كاماز اۆتوكولىگى ءدال بۇرىلىستا Audi-مەن سوقتىعىسىپ, سونىڭ سالدارىنان ءتورت ادام جول ۇستىندە ءتىل تارتپاي كەتتى. تاعى ءبىر جولاۋشى اۋىر حالدە جانساقتاۋ بولىمىنە جەتكىزىلگەن. تاعى ءتورت بىردەي ادامنىڭ ءومىرىن جالماعان كولىك اپاتى شىعىس قازاقستان وبلىسىندا تىركەلدى. ومبى-مايقاپشاعاي اۆتوجولىندا كيا Rio جۇرگىزۋشىسى الدىندا كەلە جاتقان Mitsubishi Outlander-ءدى باسىپ وزامىن دەپ كولىك اپاتىن جاساعان. قازا تاپقانداردان بولەك ءۇش ادام اۋىر جاراقاتپەن اۋرۋحاناعا جەتكىزىلگەن.

ءتورت وقيعانىڭ ءتورت ءتۇرلى سەبەبى بار. بىرىنە بىرەسە جاڭبىر, بىرەسە قار جاۋىپ, ارتى كوكتايعاققا ۇلاسقان قاڭتار ايىنىڭ قۇبىلمالى اۋا رايى «كىنالى» بولسا, ەندى بىرىندە ءوزىنىڭ عانا ەمەس, جولاۋشىلارىنىڭ ءومىرى ءۇشىن جاۋاپكەرشىلىكتى سەزىنە قويماعان جۇرگىزۋشىنىڭ جۇگەنسىزدىگى جاتىر. جىلدامدىقتى اسىرۋ دا اسقىنىپ كەتكەن, جول ۇستىندەگى مادەنيەت تە اقساپ تۇر. ءىىم-ءنىڭ مالىمەتتەرىنە قاراعاندا, ءبىر عانا قاڭتار ايىندا 850-گە جۋىق جول-كولىك اپاتى تىركەلسە, سونىڭ كەسىرىنەن 166 ادام كوز جۇمعان. ال جول اپاتى كەزىندە جاراقات العانداردىڭ سانى 1 100-دەن اسادى. بۇل دەگەنىڭىز وسىنشاما ادام ءومىر بويى ءتان جاراسىمەن ارپالىسىپ وتەدى دەگەن ءسوز.

ءىىم اكىمشىلىك پوليتسيا كوميتەتىنىڭ ەرەكشە تاپسىرمالار جونىندەگى اعا ينسپەكتورى اقتوتى بورانوۆا جانتۇرشىگەرلىك جول اپاتتارىنىڭ جيىلەپ كەتۋىنە اۋا رايىنىڭ قولايسىزدىعى عانا ەمەس, جۇرگىزۋشىلەردىڭ جاۋاپسىزدىعى دا تۇرتكى بولىپ وتىرعانىن ايتادى. «ەڭ باستى سەبەپ جۇرگىزۋشىلەردىڭ قاراپايىم جول ءجۇرۋ ەرەجەلەرىن ساقتاماۋىندا جاتىر. اسىرەسە جەلىگى باسىلماعان جاستار جول ۇستىندە جوعارى جىلدامدىقپەن كەلە جاتىپ, مانەۆر جاساۋعا قۇمار. اسىعىپ, جولدىڭ قارسى باعىتىنا شىعىپ كەتەتىندەر دە ازايماي تۇر. جول بەلگىلەرىن ەلەمەۋدىڭ اقىرى اۋىر قايعىمەن اياقتالىپ جاتقانىن كوپ كولىك يەلەرى ەرەن سانامايتىنى وكىنىشتى», دەيدى پوليتسيا پودپولكوۆنيگى. كوميتەت قىزمەتكەرى «جولدارداعى وسى قايعىلى وقيعالارعا بايلانىستى اكىمشىلىك پوليتسيا كوميتەتى جول قوزعالىسىنىڭ بارلىق قاتىسۋشىلارىن قاۋىپسىز قوزعالىس جىلدامدىعى مەن اۆتوموبيلدەر اراسىنداعى قاشىقتىقتى قاتاڭ ساقتاۋعا شاقىرادى. اۆتوكولىك يەلەرى اۋا رايىنىڭ وزگەرۋىن مۇقيات قاداعالاپ, قار ارالاس جاڭبىر جاۋىپ, مۇزداق بولعان كەزدەرى ەلدى مەكەندەردەن تىس جەرلەرگە شىعۋدى شەكتەۋى كەرەك», دەگەن ەسكەرتۋدى دە قاپەرلەرىنە المايتىنىن ايتادى. اسىرەسە اۋا رايى قولايسىز كۇندەرى قارلى بوران مەن كوكتايعاققا, قۇت­قارۋشىلار مەن ءتارتىپ ساقشىلارىنىڭ ەسكەرتۋىنە قاراماستان جولعا شىعىپ كەتىپ, جابىق تۇرعان اۆتوبەكەتتەردى اينالىپ وتەتىن جۇرگىزۋشىلەردىڭ جاۋاپسىزدىعى دا تالاي قايعىلى وقيعالاردى تۋىنداتۋدا.

ەلىمىزدە جىل بويى جول-كولىك وقيعالا­رىنىڭ الىن الۋ باعىتىندا اۋقىمدى جۇمىس­تار جۇرگىزىلىپ, ءتۇرلى ءىس-شارالار قولعا الىنادى. الايدا سوعان قاراماستان ەل جولدارىنداعى جاعدايدىڭ جاقسارىپ كەت­كەنى شامالى, جول اپاتىنىڭ ازايعانى دا بايقالمايدى. سوندا ايدىڭ كۇننىڭ امانىندا ادامداردىڭ قىناداي قىرىلۋىنا كىمدى كىنالاپ, جاۋاپتى قايدان تالاپ ەتەمىز؟ ماسەلەن, سوڭعى ەكى ايدىڭ ىشىندە ەلىمىزدە 2 مىڭداي جول-كولىك اپاتى بولعان ەكەن. ال جول ۇستىندە كوز جۇمعاندار سانى 260-تان اسادى. ەكى جارىم مىڭ ادام ءتۇرلى دەنە جاراقاتتارىمەن اۋرۋحانا توسەگىنە تاڭىلعان. سونداي-اق جول-كولىك وقيعالارىنىڭ سانى بويىنشا الدىڭعى ۇشتىكتىڭ قاتارىنا نۇر-سۇلتان مەن الماتى قالالارى جانە اقمولا وبلىسى تۇر. بۇل – ءىىم-ءنىڭ رەسمي مالىمدەمەسى. ەسەپ كۇيىندە قۇرعاق دەرەكتەر بولعانىمەن, ءار ساننىڭ ارتىندا ادام تاعدىرى, بۇكىل ءبىر وتباسىنىڭ قايعىسى مەن قاسىرەتى تۇر.

جولداعى جۇگەنسىزدىك پەن جۇرگىزۋشىلەردىڭ جاۋاپسىزدىعى. ساپاسىز جول مەن ساتىلاتىن جۇرگىزۋشى كۋالىگى. قوعامدا قانى سورعالاپ تۇرعان بۇل كەسەلدەر تۋرالى از ايتىلىپ جۇرگەن جوق. الايدا ەڭ الدىمەن ماسەلەنىڭ ءتۇپ تامىرى ءار ادامنىڭ جاۋاپكەرشىلىگىندە جاتقانىن تۇسىنەتىن كەز كەلدى. كولىك تىزگىنىن ۇستاعان ءار ادام ءوز ءومىرى ءۇشىن عانا ەمەس, وزگەنىڭ تاعدىرى ءۇشىن جاۋاپتى ەكەنىن تۇسىنگەندە عانا ەرەجە ساقتالىپ, زاڭ ورىندالادى. ال بۇل ومىردە اماندىققا جەتەتىنى جوق.