ىستانبۇلدا ۋكراينا مەن رەسەي اراسىنداعى كەلىسسوزدەردىڭ كەزەكتى راۋندى باستالدى. جيىنعا تۇركيا پرەزيدەنتى رەدجەپ تايپ ەردوعان دا قاتىستى. كەزدەسۋ بارىسىندا اتىستى توقتاتۋ, رەسەي اسكەرىن ەل اۋماعىنان شىعارۋ سەكىلدى ماسەلەلەر تالقىلانۋدا. ال ۋكراينادا ۇرىس ءالى دە جالعاسىپ جاتىر.
كەزدەسۋدى اشقان ر.ەردوعان ۋكراينانىڭ دا, رەسەيدىڭ دە تۇركيا ءۇشىن ماڭىزى زور ەكەنىن ايتا كەلىپ, بۇل كەلىسسوزدەر ەكى مەملەكەتتىڭ باسشىسىنىڭ كەزدەسۋىنە جول اشاتىنىن جەتكىزدى. تۇركيا دا جوعارى دەڭگەيدەگى كەلىسسوزدەر الاڭىن ۇسىنۋعا دايىن. سونداي-اق ر.ەردوعان كەلىسسوزدەردەن ناقتى ناتيجە شىعاراتىن كەز كەلگەنىنە ەكپىن بەردى.
بۇل جولى ۋكراينا دەلەگاتسياسىنىڭ قۇرامىنا پرەزيدەنت كەڭسەسى باسشىسىنىڭ ايماقتىق ساياساتقا جاۋاپتى ورىنباسارى كيريلل تيموشەنكو قوسىلعان ەكەن. رەسەي دەلەگاتسياسىن پرەزيدەنتتىڭ كومەكشىسى ۆلاديمير مەدينسكي باستاپ كەلدى. سونداي-اق كەلىسسوزگە رەسەيلىك ميللياردەر رومان ءابراموۆيچتىڭ دە كەلگەنى بەلگىلى بولدى. تۇركيا تەلەارنالارى تاراتقان ۆيدەودا ونىڭ پرەزيدەنت رەدجەپ تايپ ەردوعاننىڭ ءباسپاسوز حاتشىسى يبراگيم كاليننىڭ جانىندا وتىرعانى كورسەتىلگەن. ۋكرايناداعى قاقتىعىس باستالعالى ر.ابراموۆيچ ماسكەۋ مەن كيەۆ اراسىندا اراعايىندىق تانىتىپ, ەكى جاقتى تاتۋلاستىرۋعا تالپىنىپ ءجۇر.
ءۇزىلىس كەزىندە ۋكراينا پرەزيدەنتى اپپاراتى باسشىسىنىڭ كەڭەسشىسى ميحايل پودولياك قازىرگى تاڭدا بىرقاتار ماڭىزدى ماسەلە بويىنشا كونسۋلتاتسيالار ءجۇرىپ جاتقانىن جەتكىزدى. «قازىر بىرنەشە ماڭىزدى ماسەلە بويىنشا قارقىندى كونسۋلتاتسيالار ءجۇرىپ جاتىر. ەڭ باستىسى – ۋكراينانىڭ حالىقارالىق قاۋىپسىزدىگىنە كەپىلدىك بەرۋ تۋرالى كەلىسىم. وسى كەلىسىم ارقىلى عانا سوعىستى ۋكرايناعا قولايلى تۇرعىدا اياقتاي الامىز», دەدى م.پودولياك. ونىڭ ايتۋىنشا, دەلەگاتسيالار تالقىلاپ جاتقان تاعى ءبىر وزەكتى ماسەلە – اتىستى توقتاتۋ. وسى ارقىلى بارلىق قوردالانعان گۋمانيتارلىق پروبلەمالاردى شەشۋ. «تاعى ءبىر ۇلكەن ماسەلە – سوعىستىڭ ءورشۋى, وشپەندىلىكتىڭ كۇشەيۋى, ۇرىس دالاسىندا عانا ەمەس, سوعىس جۇرگىزۋدىڭ ءتارتىبى مەن ەرەجەلەرىن بۇزۋدىڭ كۇشەيۋى», دەدى ول.
رەسەيدىڭ قورعانىس ءمينيسترى سەرگەي شويگۋ ۇزاق ۋاقىتتان كەيىن مەديا الاڭعا قايتا ورالىپ, رەسەيدىڭ ۋكرايناداعى باستى مىندەتى ورىندالعانىن جەتكىزدى. ونىڭ ايتۋىنشا, ەندىگى مىندەت – دونباسس ايماعىن «ازات ەتۋ». «وپەراتسيانىڭ ءبىرىنشى كەزەڭىنىڭ نەگىزگى تاپسىرمالارى ورىندالدى. ۋكراينا قارۋلى كۇشتەرىنىڭ جاۋىنگەرلىك الەۋەتى ايتارلىقتاي تومەندەدى. وسىلايشا, ەندى باستى نازارىمىز بەن كۇش-جىگەرىمىزدى باستى ماقساتقا – دونباستى ازات ەتۋگە جۇمىلدىرۋعا مۇمكىندىك الدىق», دەدى س.شويگۋ.
دەگەنمەن ساراپشىلار س.شويگۋدىڭ ءسوزى كرەملدىڭ ۋكرايناداعى ساتسىزدىگىن جۋىپ-شايۋعا تالپىنىسى دەپ ەسەپتەيدى. ياعني باستاپقى كوزدەگەن ماقساتى كيەۆتى تىزە بۇكتىرۋگە قول جەتكىزە الماعاندىقتان, وسىنداي شەكتەۋلى مىندەت قويىپ وتىر. بۇل ءسوزدىڭ جانى بار. بۇقارالىق اقپارات قۇرالدارىندا تاراعان مالىمەتكە سۇيەنسەك, قازىرگى تاڭدا رەسەي اسكەرى 17 مىڭنان استام جاۋىنگەرىنەن ايىرىلعان. بۇل قازا تاپقاندارى عانا. جارالانعاندار بۇدان دا كوپ.
ۇلىبريتانيانىڭ قورعانىس مينيسترلىگى ۋكرايناداعى جاعداي تۋرالى وزدەرىنىڭ سوڭعى بارلاۋ ەسەبىن جاريالادى. وندا ۋكراين كۇشتەرى كيەۆتىڭ سىرتىندا قارسى شابۋىلدارعا شىعىپ, بىرقاتار جەردە رەسەي اسكەرىن تىقسىرىپ تاستاعانىن مالىمدەدى. «ۋكراينا كۇشتەرى كيەۆتىڭ سولتۇستىك-باتىسىندا, سونىڭ ىشىندە يرپەن, بۋچا جانە گوستومەلدە قارسى شابۋىلعا شىعۋدى جالعاستىردى. بۇل شابۋىلدار ءساتتى اياقتالىپ, رەسەيلىكتەر بىرقاتار پوزيتسيادان ارتقا شەگىندى. دەگەنمەن رەسەيدىڭ بۇل باعىتتا ءالى دە سوققى بەرۋ مۇمكىندىگى بار. رەسەي كۇشتەرى ماريۋپولگە شابۋىلىن جالعاستىرىپ, قالانى ۇزدىكسىز اتقىلاپ جاتىر. بىراق قالا ورتالىعى ءالى دە ۋكراينانىڭ باقىلاۋىندا. باسقا جەرلەردە رەسەي اسكەرى ءوز كۇشتەرىن قايتا توپتاستىرىپ, پوزيتسيالارىن ساقتاپ قالۋعا تالپىنىپ جاتىر», دەلىنگەن باياندامادا.
BBC ارناسىنىڭ حابارلاۋىنشا, رەسەيدىڭ 24 اقپاندا باسىپ كىرۋىنەن بەرى 60-تان استام ۋكراينالىق شىركەۋ مەن ءدىني عيمارات قيراپ, 733 وقۋ ورنى زاقىمدانعان. سونداي-اق وسى ۋاقىتقا دەيىن بارلىعى 144 بالا قازا تاۋىپ, 220-دان استامى جارالانعان.