تەمىرگە قانات بىتىرگەن شەبەر

قايسار ەرتەرەكتە قىش پەن قاۋىرسىننان ءتۇرلى مۇسىنشەلەر مەن ادەمى كادەسىيلار قاشاپ, ونىسىن ساۋداعا شىعارىپ كورىپتى. بىراق كوز مايىن تاۋىسىپ جاساعان دۇنيەلەرىنە بىرەن-ساران تاپسىرىس بەرۋشىلەردەن باسقا, سۇرانىس بولا قويماعان كورىنەدى. ەسەسىنە, بۇگىندە شەبەردىڭ قولىنان شىققان سوم تەمىر مۇسىندەردى كوپشىلىك اتتاي قالاپ, ساتىپ الىپ كەتىپ جاتادى. العاشقىدا قاقپا سىرتىن بەزەندىرەتىن مەتالل ويۋلار مەن سان الۋان شاعىن بۇيىمدار جاساپ ءجۇردى. ال قازىر ءتۇرلى جانۋارلار مەن قۇستاردىڭ ءمۇسىنىن جاسايدى. قايساردىڭ قولىنان شىققان تەمىر قۇستار ەلىمىزدىڭ ءار تۇكپىرىندەگى جەكە تۇرعىن ۇيلەردىڭ اۋلالارى مەن شاعىن كاسىپورىن كەڭسەلەرىنىڭ الدىنا ءسان بەرىپ تۇر. مىسالى, قوستانايداعى ساۋدا ورتالىعىنىڭ الدىندا تۇرعان ويۋمەن اسەمدەلگەن تەمىر دومبىرا دا قايساردىڭ قۇرىش قولىنان شىققان.

وكىنىشتىسى, شەبەردىڭ جەكە شەبەرحاناسى جوق. ازىرشە, بىرەۋدىڭ گاراجىن جالداپ جۇمىس ىستەپ جاتىر. دەگەنمەن ءوزىڭ ءۇشىن جاساعان ەڭبەكتىڭ راحاتى بولەك بولاتىنىن جاقسى بىلەتىن شەبەر وعان بولا مويىعان ەمەس.

– مىنا قىراندى باستان-اياق جا­ساپ شىعۋ ءۇشىن ەكى اپتادان استام ۋاقىتىم كەتتى. سالماعى اۋىر, شامامەن ءجۇز كيلوداي بولىپ قا­لادى. جاقىندا رەسەيگە جىبەرەمىن. تاپسىرىس بەرۋشى سول جاقتاعى دوسىنىڭ مەرەيتويىنا تارتۋ ەتەدى, – دەدى ق.نۇعىمانوۆ.

ال گاراج-شەبەرحانانىڭ الدىندا تۇرعان قوس دەگەلەكتى كوك­شەتاۋلىق قۇرىلىس كومپانياسى ساتىپ الماق. مۇنىڭ باعاسى 1 ملن تەڭگەدەن اسىپ جىعىلادى. شەبەر مۇنى جاساپ شىعۋعا ەكى ايعا جاقىن ۋاقىت شىعىنداپتى.

– جاستاي وسى ۇستالىق ونەرگە بەيىم تۇراتىنمىن. قولىمنان كەلگەن سوڭ, ەشتەن كەش جاقسى دەپ كىرىسىپ كەتتىم. ارينە, جۇمىسى كوپ اۋىر ونەر. قاتتى شارشايسىڭ. ءار تۋىندىمدى اياقتاعان سايىن قى­زۋىم كوتەرىلىپ, دىرىلدەپ اۋىرىپ قالا بەرەم. بىراق ءبىر-ەكى كۇن­دە قۇلان-تازا ايىعىپ كەتەم دە, قاي­تادان تەمىر ىزدەي باستايمىن, – دەدى ۇستا.

قايسار ۇستا الداعى ۋاقىتتا ەل تاريحىنان ەرەكشە ورىن الاتىن قازاقتىڭ قايراتكەر تۇلعالارىنىڭ, حاندار مەن باتىرلاردىڭ شاعىن بيۋستەرىنەن اۆتورلىق كوللەكتسيا جاساعىسى كەلدى.

قوستاناي وبلىسى