ورتا سالماقتا كۇش سىناساتىن قازاقتىڭ اسا دارىندى كاسىپقوي بوكسشىسى جانىبەك ءالىمحان ۇلىنا قازىرگى كەزدە قارسىلاس تابۋدىڭ ءوزى وڭايعا سوقپاي تۇر. جىل باسىنان بەرى ونىڭ ءالى دە جەڭىلىستىڭ كەرمەك ءدامىن تاتىپ كورمەگەن ەكى بىردەي كوكجالمەن قولعاپ تۇيىستىرەتىنى جايىندا ءبىراز اڭگىمە ايتىلدى. الايدا اتاقتى دەمەتريۋس اندرادە سالماعىن اۋىستىرسا, كۇش-قۋاتى بويىنا سىيماي جۇرگەن حايمە مۋنگيا قانداسىمىزبەن جەكپە-جەككە شىعۋدان باس تارتتى.
كۇنى كەشە عانا جاقسى ءبىر جاڭالىقتى قۇلاعىمىز شالدى. WBO نۇسقاسى بويىنشا ۋاقىتشا الەم چەمپيونى اتاعى ءۇشىن جانىبەك ءالىمحان ۇلى ۇلىبريتانيانىڭ وكىلى دەنني ديگنۋممەن ايقاسادى. بۇل اقپاراتتى ايگىلى MTK Global كومپانياسىنىڭ پروموۋتەرى لي يتون تاراتىپ وتىر. قازىرگى كەزدە قوس تاراپ ورتاق مامىلەگە كەلگەنگە ۇقسايدى. وسىلايشا, بوكس دەسە دەلەبەسى قوزاتىن جانكۇيەرلەر اسا قىزىقتى جەكپە-جەكتىڭ كۋاسى بولادى. چەمپيوندىق ءتاج ءۇشىن بۇل باسەكەنىڭ 21 مامىردا اقش-تا وتەتىنى انىق. ال سول جانىبەككە قارسىلاس اتانىپ وتىرعان بوكسشى جايىندا ءبىز نە بىلەمىز؟
17 ناۋرىزدا 30 جاسقا تولعان دەنني ديگنۋم ۇلىبريتانيانىڭ ەسسەكس قالاسىندا دۇنيەگە كەلدى. اۋەسقويلار اراسىندا بىرقاتار حالىقارالىق جارىستاردا جۇلدە العان ول 2013 جىلى رەسەيدىڭ سانكت-پەتەربۋرگ قالاسىندا وتكەن دۇنيەجۇزىلىك جەكپە-جەك ويىندارىندا قولا مەدالدى يەلەندى. دەننيدىڭ كاسىپقوي رينگتە ونەر كورسەتىپ جۇرگەنىنە جەتى جىلعا جۋىقتادى. سول ارالىقتا 15 كەزدەسۋ وتكىزىپ, 14 رەت جەڭىسكە جەتتى. سەگىز باسەكەدە ايقىن باسىمدىق تانىتتى. ءوزىنىڭ سوڭعى جەكپە-جەگىن ديگنۋم بىلتىرعى كوكتەمدە رەسەيلىك اندرەي سيروتكينمەن وتكىزدى. بۇل باسەكەدە تەڭ ەسەپ تىركەلدى.
جانكۇيەرلەردىڭ دەنى جانىبەكتىڭ بۇل جەكپە-جەكتە جەڭىسكە جەتەتىنىنە ەش كۇمان كەلتىرمەيدى. ويتكەنى قازاق بوكسشىسىنىڭ اۋەسقوي رينگتەگى تابىسى قارسىلاسىنا قاراعاندا الدەقايدا زور. ول – الەم جانە ازيا چەمپيونى, ازيا ويىندارىنىڭ جەڭىمپازى. كاسىپقويلار اراسىندا دا ءالىمحان ۇلى ءوزىنىڭ مىقتىلىعىن مويىنداتىپ ۇلگەردى. وسى ورايدا, بۇل باسەكەنىڭ قانداسىمىزعا بەرەرى كوپ ەكەنىن ايتا كەتۋگە ءتيىسپىز. ەگەر ول بۇل ايقاستى ءوز پايداسىنا شەشسە, وندا WBO-نىڭ نەمەسە تاعى باسقا بەلدى نۇسقانىڭ ءبىرىنىڭ تولىققاندى چەمپيوندىق اتاعى ءۇشىن تالاسۋعا مۇمكىندىك الادى.