ورمان جامىلعىسىنىڭ كولەمىن ۇلعايتۋ - ماڭىزدى ءىس

مەملەكەت باسشىسى: «مەملەكەتىمىزدىڭ وركەندەۋى  ايماقتاردىڭ قۋاتتى بولۋىنا  تىكەلەي بايلانىستى» دەي كەلىپ, «ەڭ الدىمەن, سەمەي ايماعىندا اباي وبلىسىن قۇرۋدى ۇسىنامىن. سەمەي قالاسى جاڭا وبلىستىڭ ورتالىعى بولادى. وسى ماسەلەنى  ايماق تۇرعىندارى كوپتەن بەرى ايتىپ جۇرگەنىن بىلەمىن. قازىر ول جاقتا شەشىمىن تاپپاعان تۇيتكىلدەر از ەمەس. مىسالى, ايماقتىڭ ىشكى ينفراقۇرىلىمى ابدەن توزعان. كەزىندە  الاش ارىستارىنىڭ باسىن قوسقان سەمەي قالاسىنىڭ جاعدايى دا ءماز ەمەس. ءبىز تاريحي ادىلدىكتى ورناتىپ, ۇلىلارىمىز دۇنيەگە كەلگەن كيەلى ولكەنى  قايتا جاڭعىرتۋعا ءتيىسپىز» دەگەن بولاتىن.

بۇل وبلىس مارتەبەسىنەن ايرىلعان سوڭعى شيرەك عاسىر ۋاقىتتان بەرى قاراي ءبىراز ەڭسەسى ءتۇسىپ كەتكەن سەمەي قالاسى داميدى,  جۇمىس  ورىندارى اشىلادى, حالىقتىڭ ءال-اۋقاتى جاقسارادى دەگەن ءۇمىتىمىزدى وياتقان ايتۋلى جاڭالىق بولعانى راس. سەمەي قالاسى وبلىس ورتالىعى بولسا, وسكەمەننەن شالعاي جاتقان اۋدانداردىڭ تۇرعىندارى ءۇشىن وڭتايلى بولادى دەپ ويلايمىن.

قاڭتار ايىنان باستاپ ورمان سالاسى  ماماندارىنىڭ   جالاقىسىنىڭ  وسكەنى دە ۇكىمەتتىڭ  ءبىزدىڭ جاعدايىمىزعا بەي-جاي قارامايتىندىعىن  كورسەتەدى. 

21 ناۋرىز حالىقارالىق ورمان كۇنى ەكەنى ءمالىم. شاعىن ورماندى مەملەكەتتەر قاتارىنا جاتاتىن قازاقستان ءۇشىن ورمان قورىن ساقتاپ, مولايتۋدىڭ ماڭىزى زور. پرەزيدەنت تاپسىرماسىمەن 2021-2025 جىلدار ارالىعىندا ورمان جامىلعىسىنىڭ كولەمىن ۇلعايتۋ  مىندەتى جۇكتەلىپ وتىر. بۇل رەتتە «سەمەي ورمانى» مەملەكەتتىك ورمان تابيعي رەزەرۆاتى ۇجىمىنىڭ دا اتقارىپ جاتقان جۇمىستارى از ەمەس.  2021 جىلى اعاش وتىرعىزۋ جۇمىستارىن ساپالى ورىنداۋ ماقساتىندا, سونىمەن قاتار, ورمان ەكپەلەرىنە مەحانيكالاندىرىلعان كۇتىم جاساۋ ءۇشىن قاجەتتى ءبىرتالاي  زاماناۋي تەحنيكالاردىڭ ساتىپ الىنعاندىعى دا وسى باعىتتاعى جۇمىستاردىڭ ءبىر پاراسى. بۇل جۇمىستار توقتاماق ەمەس.

نۇرسۇلۋ قاسەنوۆا,

«سەمەي ورمانى» موتر» رمم

بوكەباي فيليالىنىڭ ورمان شارۋاشىلىعى ينجەنەرى