مامىردىڭ 11-ءى مەن 14-ءى ارالىعىندا وتكەن بىرىككەن اراب امىرلىكتەرىنىڭ قازاقستانداعى مادەنيەت كۇندەرى ەلوردانى يسلامي يماندىلىقتىڭ اۋەنىنە ۇيىتتى.
ادامنىڭ كەۋدەسىندەگى كەرىم سەزىمدى تۇيسىنۋگە كوپ ۋاقىتتى سارپ ەتۋدىڭ قاجەتى جوق. كىسىنىڭ تىنىس-تىرشىلىگىنە, ارمان-مۇراتىنا قاراپ-اق كوپ ءجايتتى اڭعارۋعا بولادى ەكەن. ارابتىڭ مۋزىكاسىن تىڭداپ, ءبيىن تاماشالاپ وتىرىپ, “كەرۋەن” ساۋدا ويىن-ساۋىق ورتالىعىنداعى ء“امىرلىك اۋىلى” ەتنوقالاشىق تۇرىندەگى سالت-داستۇرلەر كورمەسىن ارالاپ شىعىپ, ۇلتتىق تاعامدارىن دايىنداۋ كورىنىستەرىنە, قىلقالام, قولونەر شەبەرلەرىنىڭ كورمەلەرىنە كۋا بولا كەلە بۇل حالىقتىڭ وزىمىزدەن سونشالىق بوتەن ەمەس ەكەنىن, كەي تۇستا وي-مۇراتتارى ءبىر جەردە توعىسىپ, ورتاق مۇددەگە قۇرىلاتىنىن ۇقتىق. اراب مادەنيەتى, يسلام وركەنيەتى اتتى قۇندىلىقتار ادامگەرشىلىك پەن يماندىلىق ىزگىلىكتەرى ءۇشىن قىزمەت ەتەتىنىن ءتۇيسىندىردى. ءويتكەنى, ولار بۇرىن-سوڭدى مادەنيەت كۇندەرىنىڭ ءداستۇرىندە كەزىكپەگەن ۇلگىمەن قارتتار ءۇيى مەن №61 ورتا مەكتەپتە ونەر كورسەتتى. ءبىر كەلگەندە جالعىزدىقتان جابىرقاعان شەرلى جانداردىڭ كوكىرەگىندەگى مۇڭ مەن مۇزدى بىردەن ءجىبىتىپ جىبەرمەس, دەگەنمەن دە اراب ونەرپازدارىنىڭ وسىنداي ورىنداردا قايىرىمدىلىق سازدارىن اۋەلەتىپ كەتكەنى كىم-كىمگە دە ۇلكەن وي سالارى انىق.
اراب ەلىنەن كەلگەن بي ۇجىمىنىڭ ۇلتتىق ورنەككە قۇرىلعان پلاستيكالىق قيمىلدارى قارتتارعا كوتەرىڭكى كوڭىل كۇي سىيلادى. جاي قالتادان رۋحاني قالتانىڭ بوس بولعانى قيىن. قازىرگى قوعامنىڭ ءبىر دەرتى وسى بولىپ تۇر. مەيىرىمسىزدىك پەن قاتىگەزدىك جايلاپ بارا جاتپاسا, بالالار ءۇيى, قارتتار ءۇيى قالاي پايدا بولدى؟ جۇرەكتەرگە جىلۋ جەتپەي جاتىر. سول جىلۋ اسەم ءان-بي ارقىلى از دا بولسا قارتتار مەن سابيلەردىڭ جۇرەگىن مەيىرىم شۋاعىنا قاندىرسىن دەگەن ويمەن كەلگەن اراب ونەرپازدارى ماقساتتارىنا جەتكەندەي. قارتتار وزدەرىنە ارنايى اتباسىن بۇرعان اراب ەلىنىڭ بي ۇجىمىنا تاعى دا كەلىڭىزدەر دەگەن قيماستىق سەزىمدەرىن جاسىرمادى.
ال №61 ورتا مەكتەبىندە بىرىككەن اراب امىرلىكتەرىنىڭ شىعارماشىلىق ۇجىمى كونتسەرت بەردى. ءمادەنيەت مينيسترلىگى مەن “قازاقستان حالقىنىڭ رۋحاني دامۋ قورى” اكتسيونەرلىك قوعامىنىڭ قولداۋىمەن جۇزەگە اسىرىلعان مادەني شارا بارىسىندا ەلوردا جۇرتشىلىعى اراب ەلىنىڭ مادەنيەتى مەن سالت-ءداستۇرىنەن ءبىراز ماعلۇمات الىپ, ء“امىرلىك اۋىلى” ەتنوقالاشىق ءتۇرىندەگى كورمەدەن اراب جەرىن مەكەندەيتىن حالىقتىڭ ەرتەدەگى تاريحى مەن ءومىرى جايلى قىزىقتى دەرەكتەر تاپتى دەپ ويلايمىز. باسپانانىڭ ءتۇرلى ۇلگىلەرىنىڭ ءوزى وتكەن تاريحتان كوپ سىر شەرتىپ تۇر. ءبىر سوزبەن ايتقاندا, بىرىككەن اراب امىرلىكتەرىنىڭ قازاقستانداعى مادەنيەت كۇندەرىندە ۇسىنىلعان عاجايىپ ناقىشتاردى ءبىر-بىرلەپ تاماشالاعانشا ءتورت كۇندىك شارانىڭ كوزدى اشىپ-جۇمعانشا قالاي وتە شىققانىن بايقاماي قالعان جاندار دا بار.
قاراشاش توقسانباي.