الماتىداعى Chaplin Mega Alma-Ata كينوتەاترىندا رەجيسسەر دارەجان ومىرباەۆ تۇسىرگەن «اقىن» ءفيلمىنىڭ تۇساۋكەسەرى ءوتتى. مادەني ءىس-شاراعا كينوستۋديا باسشىلىعى, ءفيلمنىڭ ءتۇسىرۋ توبى مەن باق وكىلدەرى قاتىستى.
ءوزىنىڭ العىسوزىندە «قازاقفيلم» كينوستۋدياسىنىڭ پرەزيدەنتى اقان ساتاەۆ «اقىن» ءفيلمىنىڭ شىعارماشىلىق توبىن تۇساۋكەسەرمەن قۇتتىقتاپ, كارتينانىڭ العاشقى كورسەتىلىمى توكيوداعى حالىقارالىق كينوفەستيۆال شەڭبەرىندە وتكەنىن جانە بۇل بايقاۋدا دارەجان ومىرباەۆ «ۇزدىك رەجيسسەر» جۇلدەسىمەن ماراپاتتالعانىن اتاپ ءوتتى. سونىمەن قاتار اقان ساتاەۆ اتالعان كينوتۋىندى جاقىندا عانا وتكەن حالىقارالىق بەرلين كينوفەستۆالىنىڭ «فورۋم» باعدارلاماسىندا كورسەتىلگەنىن ەسكە سالىپ, ءفيلمنىڭ الار اسۋلارى ءالى الدا ەكەنىن ايتتى.
ەستەرىڭىزگە سالا كەتسەك, «اقىن» ءفيلمى تەحنولوگيالار دامىعان قازىرگى زاماندا ونەردىڭ قوعامدا الاتىن ورنى تۋرالى وي قوزعاپ, پوەزياعا سۇرانىس ازايعان داۋىردە اقىننىڭ كۇيىنىشى تۋرالى سىر شەرتەدى. قازاق حالقىنىڭ XIX عاسىرداعى ەڭ كورنەكتى اقىندارىنىڭ ءبىرى ماحامبەت وتەمىس ۇلىنىڭ قيلى تاعدىرى جايىندا ويعا باتقان باستى كەيىپكەر نازىك جۇرەكتى اقىنداردىڭ ءومىرى قاشاندا قيىن بولعانىن تۇسىنەدى.
– نەمىس جازۋشىسى گەرمان گەسسەنىڭ «اۆتورلىق كەش» اتتى اڭگىمەسىن وقىعان سوڭ ءفيلمنىڭ ستسەناريىن جازۋعا كىرىستىم. كەيىن قولىما قازاقتىڭ بەلگىلى اقىنى ماحامبەت وتەمىس ۇلىنىڭ ءومىرى مەن ءولىمى تۋرالى تىڭ دەرەكتەرمەن تولىقتىرىلعان كىتاپ ءتۇستى. ونى وقىپ شىعىپ, ءفيلمنىڭ ستسەناريىنە قوستىم. وسىلايشا, «اقىن» ءفيلمى دۇنيەگە كەلدى, – دەدى رەجيسسەر دارەجان ومىرباەۆ.
فيلمدەگى باستى ءرولدى «جىگىتتەر» توبىنىڭ ءسوليسى ەردوس قاناەۆ سومدادى. بەلگىلى ءانشى «جىگىتتەر» كۆارتەتىنە بيىل 20 جىل تولاتىنىن جانە وسى ۋاقىت ارالىعىندا كورەرمەندەرمەن العاش رەت كينواكتەر رەتىندە قاۋىشىپ وتىرعانىن ايتتى.
– باسىندا بۇل رولگە باسقا اكتەر بەكىتىلگەن بولاتىن. كەيىن كارانتين كەزىندە كاستينگ-ديرەكتور ەردوس قاناەۆتىڭ كانديداتۋراسىن ۇسىندى. بىرنەشە رەت كامەراعا ءتۇسىرىپ كوردىك تە, ناتيجەسىندە ەردوستى تاڭدادىق. ونى ءانشى بولعانى ءۇشىن تاڭداعانىمىز جوق. دەگەنمەن كەيبىر ساحنالاردى تۇسىرگەندە ونىڭ شىعارماشىلىققا جاقىن بولعانى كومەك بودى, – دەدى رەجيسسەر.
سونىمەن قاتار دارەجان ومىرباەۆ «اقىن» ءفيلمى جاقىن بولاشاقتا باسقا دا حالىقارالىق بەدەلدى كينوفەستيۆالدار شەڭبەرىندە كورسەتىلەتىنىن حابارلادى.
ايتا كەتسەك, ءفيلمنىڭ ءتۇسىرۋ جۇمىستارى 2020 جىلى باستالدى. نەگىزگى تۇسىرىلىمدەر الماتى جانە الماتى وبلىسىندا, سونداي-اق اتىراۋ وبلىسىندا جۇرگىزىلدى.
ەستەرىڭىزگە سالا كەتسەك, اتالعان كينوتۋىندىنى مادەنيەت جانە سپورت مينيسترلىگىنىڭ تاپسىرىسى بويىنشا «ۇلتتىق كينونى قولداۋ مەملەكەتتىك ورتالىعىنىڭ» قولداۋىمەن «ش.ايمانوۆ اتىنداعى قازاقفيلم» كينوستۋدياسى تۇسىرگەن.