مەملەكەت باسشىسى قاسىم-جومارت كەمەل ۇلىنىڭ ۇستىمىزدەگى جىلدىڭ 16 ناۋرىزىنداعى جولداۋى جاڭا قازاقستاننىڭ جاڭا تاريحىنداعى حالقىمىزدىڭ رۋحىن اسقاقتاتىپ, ەلدىك تۋىن كوككە كوتەرگەن ەرەكشە جولداۋ بولدى. جولداۋدىڭ ءار تارماعى, ءاربىر جولى تاراتىپ ايتار جاسامپازدىق باعدارعا, ءۇمىت پەن ماقساتقا تولى.
جۇرتشىلىقتى جاقسىلىققا جۇمىلدىرعان سونداي ۇسىنىس پەن شەشىمدەردىڭ شوقتىعى بيىكتەرى – ەلىمىزدىڭ كەڭ بايتاق جەرىندە جاڭا اكىمشىلىك وڭىرلەردىڭ, اتاپ ايتقاندا اباي, ۇلىتاۋ, جەتىسۋ وبلىستارىنىڭ شاڭىراق كوتەرۋى – ءسوز جوق, ەرەكشە تاريحي وقيعا بولدى دەر ەدىم.
سونداي-اق بولاشاق الماتى وبلىسىنىڭ ورتالىعى قاپشاعاي قالاسى ۇلتىمىزدىڭ ارداقتى پەرزەنتى دىنمۇحامەد احمەت ۇلى قوناەۆتىڭ اتىمەن اتالىپ, الماتى قالاسى بارىن ەسكەرىپ, جاڭارعان وبلىسقا قوناەۆ ەسىمى بەرىلسە دا ارتىق ەمەس.
دىنمۇحامەد احمەت ۇلى ءوز زامانىندا وتكەن عاسىردىڭ 1936 جىلى ول كەزدە قازاق بالاسىنىڭ قولى جەتە بەرمەيتىن ماسكەۋدەگى ءتۇستى مەتالل جانە التىن ينستيتۋتىن ءبىتىرىپ, بالقاشتاعى قوڭىرات رۋدنيگىندە ەڭبەك جولىن كەن قازاتىن ماشينانىڭ ماشينيست-مەحانيگى, ماستەرىنەن باستاپ, شىعىس قازاقستان وبلىسىنىڭ ريددەر قالاسىندا ءىرى كەن باسقارماسىنىڭ ءوندىرىس باسشىسى بولدى. ۇزاق جىلدار رەسپۋبليكا ۇكىمەتى باسشىلىعىندا, قازاق كسر-ى عىلىم اكادەمياسىنىڭ پرەزيدەنتى, قازاقستان كومپارتياسى ورتالىق كوميتەتىنىڭ ءبىرىنشى حاتشىسى, كوكپ ورتالىق كوميتەتى ساياسي بيۋروسىنىڭ مۇشەسى قىزمەتتەرىن ەل مۇددەسىندە زور ابىرويمەن اتقاردى. ديمەكەڭنىڭ تۇسىندا ءبىزدىڭ رەسپۋبليكامىزدا ونەركاسىپ كەشەندەرى كەڭىنەن قانات جايىپ, اگرارلىق سالا وركەندەدى. ەگىس دالالارى مەن مال شارۋاشىلىعىندا 2 مىڭنان استام سوۆحوز بەن 5 جۇزگە جۋىق كولحوز جۇمىس ىستەپ, ەلدى ازىق-ت ۇلىكپەن قامتاماسىز ەتۋگە ۇلەستەرىن قوستى. قاپشاعاي, تەمىرتاۋ, رۋدنىي, ستەپنوگورسك, ريددەر, حرومتاۋ, بالقاش, قاراتاۋ, كەنتاۋ, اششىساي, تەكەلى, اقسۋ (ەرماك), اقتاۋ (شەۆچەنكو), ەكىباستۇز سياقتى سان سالالى ونەركاسىپ قالالارى تىكەلەي دىنمۇحامەد احمەت ۇلىنىڭ باستاماشىلىعىمەن, قامقورلىعىمەن بوي كوتەردى. حالىقتىڭ الەۋمەتتىك تۇرمىسى جاقساردى. رەسپۋبليكامىزدا ءاربىر ازاماتتىڭ مىندەتتى ورتا ءبىلىم الۋى, تەگىن دەنساۋلىق ساقتاۋ جۇيەسى جولعا قويىلدى. 30-شى جىلدارداعى ساياسي قۋعىن-سۇرگىن زارداپتارىنان 60-جىلداردىڭ «جىلىمىعى» كەزەڭىندە جوعارى وقۋ ورىندارىنا, عىلىمي ينستيتۋتتارعا جول اشىلىپ, عىلىم ورىستەپ, وركەندەدى. ونەر, مادەنيەت, ادەبيەت جاڭا تىنىس الىپ, تالانتتى بۋىن وكىلدەرىنىڭ شىعارمالارى جارىق كورە باستادى. ول ءداۋىر دە حالقىمىزدىڭ تاريحىنىڭ وتكەن جىلدارى مەن جولدارى.
پرەزيدەنت ءوز جولداۋىندا دا, ودان بۇرىنعى سوزدەرىندە دە بۇگىنگى جاڭا كەزەڭگە بەت الىپ تۇرعاندا وسىنىڭ الدىنداعى مەملەكەتتىك تاۋەلسىزدىگىمىزدىڭ جەتكەن جەتىستىكتەرىن ساقتاي, باعالاي ءبىلۋ ماڭىزدىلىعىنا دا ايرىقشا نازار اۋدارىپ كەلەدى. بۇل وتە ورىندى ءارى بولاشاققا قاجەت دۇنيەتانىم.
ساياساتتىڭ, ەل باسقارۋ ءىسىنىڭ قاراما-قايشىلىققا تولى ۇستارانىڭ جۇزىندەي قىلپىلداعان قىل كوپىرىمەن ءوتۋ دە كەز كەلگەن پەندەنىڭ باسىنا بەرىلە بەرمەيتىن ءارى باق, ءارى سىناق. ەل باسقارعان قىزمەتتىڭ, ەڭبەكتىڭ تۇتاس ەلگە جاعۋى دا مۇمكىن ەمەس. بىرەۋ جاقتىرعان شەشىم ەكىنشى بىرەۋگە جاقپاي جاتۋى دا تابيعي. الايدا بارلىق ءىس-ارەكەت تەك ادالدىقپەن, مەيلىنشە ادىلدىكپەن اتقارىلۋعا ءتيىس. حالىق يگىلىگىنە ادال ەڭبەك ەتكەن اردا پەرزەنتىمىزدىڭ بىرەگەيى دىنمۇحامەد احمەت ۇلى قوناەۆ.
قاسىم-جومارت كەمەل ۇلى ۇلكەن پاراساتتىلىقپەن قوناەۆقا قۇرمەت كورسەتۋ ارقىلى تاريحىمىزدىڭ الدىڭعى بۋىن زامانىنا, رەسپۋبليكامىزدىڭ ءوسۋ جولدارىنا قۇرمەت كورسەتىپ وتىر.
قۋانىش سۇلتانوۆ,
قازاقستاننىڭ ەڭبەك سىڭىرگەن قايراتكەرى