اتىراۋ قالاسىنىڭ №2 سوتىندا وبلىس اكىمىنىڭ ورىنباسارى قايرات نۇرلىباەۆقا جانە «بۇيىرعىن» اۋىلشارۋاشىلىعى وندىرىستىك كووپەراتيۆى توراعاسىنىڭ ورىنباسارى نۇرلان بيسەمباەۆقا قاتىستى قر قىلمىستىق كودەكسىنىڭ 189-بابىنىڭ 4-بولىگىنىڭ 2) تارماعىمەن قىلمىستىق ءىس قارالدى, دەپ حابارلايدى Egemen.kz.
«نۇرلىباەۆقا اتىراۋ وبلىسى اۋىل شارۋاشىلىعى باسقارماسىنىڭ باسشىسى بولا تۇرا, ءوزىنىڭ قىزمەت بابىن پايدالانا وتىرىپ, كووپەراتيۆ توراعاسىنىڭ ورىنباسارى بيسەمباەۆپەن ادامدار توبىنىڭ الدىن الا ءسوز بايلاسۋىمەن, بوتەننىڭ مۇلكىن ۇرلادى. ياعني اوك-عا ينۆەستيتسيالىق سۋبسيديا بەرۋ ارقىلى 83 700 649 تەڭگە جىمقىردى, ال, بيسەمباەۆقا كورسەتىلگەن سومانىڭ جارتىسى 41 900 000 تەڭگەنى يەمدەنگەن دەگەن ايىپ تاعىلدى», دەپ حابارلادى وبلىستىق سوتتىڭ ءباسپاسوز قىزمەتى.
سوت تالقىلاۋى كەزىندە اۋىلشارۋاشىلىق-وندىرىستىك كووپەراتيۆىنە ينۆەستيتسيالىق سۋبسيديا 4 ترانشپەن بەرىلگەنى انىقتالعان. كووپەراتيۆتىڭ ينۆەستيتسيالىق سۋبسيديا بەرۋ تۋرالى ءوتىنىشى جانە ساراپتاما ۇيىمىنىڭ ءوتىنىشتى ماقۇلداۋى سوتتالۋشى قايرات نۇرلىباەۆ اۋىل شارۋاشىلىعى باسقارماسىنىڭ باسشىسى لاۋازىمىنا تاعايىندالعانعا دەيىن, ياعني 2019 جىلدىڭ مامىر ايىنىڭ سوڭىندا الىنعان. ال, قالعان ترانشتار بويىنشا وتىنىشتەر بۇرىنعى باسقارما باسشىسىنىڭ وكىمىمەن قۇرىلعان جۇمىس توبىمەن ماقۇلدانعان.
«تەرگەۋمەن سوتتالۋشىلار اراسىندا اگروونەركاسىپتىك كەشەن سۋبەكتىلەرىن سۋبسيديالاۋ ءۇشىن بولىنگەن اقشا قاراجاتىن ۇرلاۋعا الدىن الا ءسوز بايلاسۋدىڭ بار ەكەندىگىنە دالەلدەمەلەر ۇسىنىلعان جوق. سوتتا زەرتتەلگەن دالەلدەمەلەرمەن ينۆەستيتسيالىق سۋبسيديالار بەرۋ تۋرالى وتىنىشكە قوسا بەرىلگەن قۇجاتتاردىڭ تولىقتىعى ءۇشىن اوك قۇجاتتارىن قابىلداعان ءبولىم باسشىلارى جاۋاپتى ەكەنى انىقتالدى. ساراپتاما ۇيىمى جانە جۇمىس توبىمەن وبەكتىنىڭ وندىرىستىك قۋاتتارىنىڭ سايكەستىگىن تەكسەرۋ اكتىسى جاساقتالىپ, باسشى – سوتتالۋشى ق.نۇرلىباەۆقا ۇسىنىلعان. سونىڭ نەگىزىندە ول سۋبسيديا بەرۋگە ارنالعان شارتقا قول قويعان. سوت وتىرىسىندا جاۋاپتالعان اۋىل شارۋاشىلىعى مينيسترلىگىنىڭ مامانى جۇمىس توبى نەمەسە ساراپتاما ۇيىمىمەن كەلىسىم بەرىلگەننەن كەيىن باسقارما باسشىسى شارتقا قول قويۋعا مىندەتتى ەكەنىن, ەگەر قول قويماعان جاعدايدا ول جاۋاپقا تارتىلاتىنىن ايتىپ كورسەتكەن. سوتتالۋشى ن.بيسەمباەۆ اوك-دە ماتەريالدىق جاۋاپتى تۇلعا بولىپ تابىلمايدى. العاشقى ءۇش سۋبسيديانى الۋ كەزەڭىندە اوك-دە جۇمىس جاساماعان جانە قۇرىلتايشىسى بولماعان. ول 2020 جىلدىڭ 03 تامىزىندا ديرەكتوردىڭ ورىنباسارى بولىپ جۇمىسقا ورنالاسقان. ياعني ءۇشىنشى ترانش سۋبسيدياسى الىنعاننان كەيىن جۇمىسقا ورنالاسقان جانە ونىمەن ماتەريالدىق جاۋاپكەرشىلىك تۋرالى شارت جاسالماعان», دەپ ءمالىم ەتتى سوتتىڭ ءباسپاسوز قىزمەتى.
اۋىلشارۋاشىلىق-وندىرىستىك كووپەراتيۆى توراعاسىنىڭ وتىنىشىمەن بيسەمباەۆ اتىراۋ قالاسىندا قۇس فابريكاسىنىڭ قوسىمشا نىساندارىن سالۋ ءۇشىن شارۋاشىلىق شوتىنان الىنعان, سۋبسيديا رەتىندە تۇسكەن قارجىعا قۇرىلىس ماتەريالدارىن ساتىپ الۋعا كومەك كورسەتكەن. مۇنى كووپەراتيۆ وكىلدەرى راستاعان. سوتتالۋشىلار ينۆەستيتسيالىق قاراجاتتى يەمدەنبەگەن. اتالعان قاراجاتتى اۋىلشارۋاشىلىق-وندىرىستىك كووپەراتيۆى يگەرگەن.
«اوك-كە تيەسىلى قۇس فابريكاسى جۇمىس ىستەيدى. سالىقتاردى ۋاقتىلى تولەيدى. اۋديتورلىق تەكسەرۋمەن سۋبسيديا بەرۋ ءراسىمى انىقتالعاننان كەيىن 83 700 649 تەڭگە كولەمىندە بەرىلگەن سۋبسيديا تولىعىمەن بيۋدجەتكە قايتارىلدى. قازىرگى ۋاقىتتا اوك-ءنىڭ ازاماتتىق تالاپ بويىنشا بەرەشەگى جوق. پروكۋرور ق.نۇرلىباەۆقا 10 جىل, بيسەمباەۆقا 7 جىل مەرزىمگە باس بوستاندىعىنان ايىرۋ جازاسىن تاعايىنداۋدى سۇرادى. جابىرلەنۋشىنىڭ وكىلى كەلتىرىلگەن زياننىڭ تولىق وتەلگەنىن ايتىپ كورسەتتى. سوتتالۋشىلار مەن قورعاۋشىلار قىلمىس قۇرامىنىڭ بولماۋىنا بايلانىستى اقتاۋدى سۇرادى. سوت سوتتالۋشىلار ق.نۇرلىباەۆ پەن ن.بيسەمباەۆتىڭ ارەكەتتەرىندە قىلمىس قۇرامىنىڭ بولماۋىنا بايلانىستى ولاردى كىناسىز دەپ تانىدى», دەپ حابارلادى وبلىستىق سوتتىڭ ءباسپاسوز قىزمەتى.
سوت ۇكىمى زاڭدى كۇشىنە ەنگەن جوق.