2022 جىلعى 17 ناۋرىزدا قازاقستان فۋتبول فەدەراتسياسى اتقارۋشى كوميتەتىنىڭ وتىرىسى ءوتتى, دەپ حابارلايدى Egemen.kz.
وتىرىستىڭ كۇن تارتىبىنە اعىمداعى 2022 جىلعا ارنالعان فۋتبول ءىس-شارالارىنىڭ ەرەجەلەرىن, رەگلامەنتتەرىن جانە كۇنتىزبەلەرىن بەكىتۋ تۋرالى ماسەلەلەر ەنگىزىلدى.
اتقارۋشى كوميتەت قاراعان ماسەلەلەر مەن قابىلداعان شەشىمدەردىڭ ءبىرى - باس حاتشى ەتىپ ولجاس ابراەۆتى تاعايىنداۋ بولدى.
باس حاتشىنىڭ ورنىنا كانديداتتى تاڭداۋ كوماندانى باسقارۋ, ستراتەگيالىق پايىمداۋ جانە ويلاۋ, كوشباسشىلىق قاسيەتتەر, جەكە تيىمدىلىك, حالىقارالىق ۇيىمدارمەن جۇمىس تاجىريبەسى سياقتى كاسىبي داعدىلار مەن قۇزىرەتتەردى باعالاۋ ولشەمشارتتارىنا سايكەس ايقىندالدى.
ولجاس ابراەۆ 2018 جىلدان باستاپ «قازاقستان كاسىبي فۋتبول ليگاسى» اسسوتسياتسياسىن باسقارادى. ءوزىنىڭ كوپ جىلعى كاسىبي مانسابىندا قازاقستاندىق فۋتبول جۇيەسىندە ءارتۇرلى لاۋازىمداردى اتقاردى.