ونەركاسىپ ءوندىرىسىنىڭ كولەمى ارتتى

قر ۇلتتىق ەكونوميكا ءمينيسترى الىبەك قۋانتىروۆ, قر ۇلتتىق بانكىنىڭ توراعاسى عالىمجان ءپىرماتوۆ, قارجى ءمينيسترى ەرۇلان جاماۋباەۆ بايانداما جاسادى. 

قازاقستاندا بيىلعى ەكى ايدىڭ قورىتىندىسى بويىنشا ءجىو ءوسىمى 3,5%-عا دەيىن جەدەلدەدى. ناقتى سەكتور ەكونوميكانىڭ تۇراقتى ءوسۋ درايۆەرىنە اينالدى. 

«ونەركاسىپ ءوندىرىسىنىڭ كولەمى 4,7%, ونىڭ ىشىندە وڭدەۋ ونەركاسىبىندە 3,9% ارتتى. فارماتسەۆتيكادا 17%, كيىم وندىرىسىندە 12,8%, ماشينا جاساۋدا 9,2%, ونىڭ ىشىندە لوكوموتيۆتەر مەن ۆاگوندار وندىرىسىندە 23,8%, اۆتوموبيل جاساۋدا 10,2%, پلاستماسسا بۇيىمدارى وندىرىسىندە 8,7%, دايىن مەتالل بۇيىمدارى وندىرىسىندە 4,4%, قۇرىلىس ماتەريالدارى وندىرىسىندە 2,1% ءوسىم بايقالادى», دەدى ءا. سمايىلوۆ. 

تاۋ-كەن ونەركاسىبىندە مۇناي ءوندىرۋدىڭ 9,2%-عا, تابيعي گازدىڭ 8,9%-عا جانە مەتالل كەندەرىنىڭ 1,2%-عا ۇلعايۋى ەسەبىنەن 6,4%-عا سەنىمدى ءوسىم بايقالادى. 

قىزمەت كورسەتۋ سەكتورىندا كولىكتەگى (10,4%), ساۋداداعى (6,1%) جانە بايلانىس سالاسىنداعى (5,1%) جوعارى ديناميكا ەسەبىنەن 2,1% دەڭگەيىندە وڭ ءوسىم تىركەلگەن. 

قۇرىلىس سالاسىندا ءوسىم 7,6% دەڭگەيىندە بايقالادى جانە 1,8 ملن شارشى مەتر تۇرعىن ءۇي پايدالانۋعا بەرىلدى. 

قر پرەمەر-ءمينيسترىنىڭ ايتۋىنشا, ەكونوميكانىڭ شيكىزاتتىق ەمەس سەكتورلارىنداعى تۇراقتى ينۆەستيتسيالىق بەلسەندىلىك جەدەل ەكونوميكالىق ءوسىمنىڭ نەگىزگى فاكتورىنا اينالدى. 

كەن ءوندىرۋ سالاسىن ەسەپكە الماعاندا, ينۆەستيتسيالار 5,7%-عا ءوستى. 

قاڭتار-اقپان ايلارىنىڭ قورىتىندىسى بويىنشا اقمولا, پاۆلودار وبلىستارىندا جانە نۇر-سۇلتان قالاسىندا بارلىق نەگىزگى ماكروكورسەتكىشتەر بويىنشا ءوسىم بايقالىپ وتىر. ەڭ تومەن كورسەتكىشتەر اقتوبە جانە ماڭعىستاۋ وبلىستارىندا تىركەلدى. 

ءا. سمايىلوۆ قازىرگىدەي كۇردەلى كەزەڭدە ەكونوميكانىڭ ءوسۋ قارقىنىن ساقتاي وتىرىپ, ءارى قاراي جەدەلدەتۋ – اسا ماڭىزدى مىندەت ەكەنىن اتاپ ءوتتى. 

«حالىقتىڭ تابىسىن ارتتىرۋ, جۇمىس ورىندارىن قۇرۋ جانە ەكونوميكانى ءارتاراپتاندىرۋ جۇمىستارىن بارىنشا كۇشەيتۋ قاجەت. بۇل ءۇشىن مەملەكەت باسشىسىنىڭ تاپسىرماسىنا سايكەس ۇكىمەت 2022 جىلعا ارنالعان ءىس-قيمىل باعدارلاماسىن ىسكە اسىرىپ جاتىر. سونداي-اق حالىقتىڭ تابىسىن ارتتىرۋ باعدارلاماسى ازىرلەندى. مەملەكەتتىك ورگانداردىڭ ءبىرىنشى باسشىلارى مەن اكىمدەرگە وسى ءىس-شارالاردىڭ ساپالى جانە ءتيىمدى ورىندالۋىن قاتاڭ باقىلاۋعا الۋدى تاپسىرامىن», دەدى قر پرەمەر-ءمينيسترى. 

سونىمەن قاتار اكىمدەر الەۋمەتتىك ماڭىزى بار ازىق-ت ۇلىك تاۋارلارىنىڭ باعاسىن تۇراقتاندىرۋعا ەرەكشە كوڭىل ءبولۋى ءتيىس. ول ءۇشىن قاجەتتى قۇرالدار بار. 

سونداي-اق نارىقتاعى قۇبىلمالى جاعدايدى ەسكەرە وتىرىپ, ۇلتتىق ەكونوميكا مينيسترلىگى مۇددەلى مەملەكەتتىك ورگاندارمەن جانە اكىمدىكتەرمەن بىرگە باقىلاۋدى كۇشەيتىپ, ينفلياتسيانى تەجەپ, باعالاردى ۇستاپ تۇرۋ ءۇشىن قوسىمشا ءىس-شارالاردى ازىرلەۋى قاجەت. 

بۇعان قوسا, قازىرگى جاعدايدا ىسكەرلىك بەلسەندىلىكتى ءارى قاراي دامىتۋ ءۇشىن يندۋستريالاندىرۋ جۇمىستارىن ءتيىمدى جۇرگىزۋدىڭ, ەكونوميكاعا, اسىرەسە, شيكىزاتتىق ەمەس سەكتورعا ىشكى جانە سىرتقى ينۆەستيتسيالاردى تارتۋدىڭ, سونداي-اق شاعىن جانە ورتا بيزنەستى دامىتۋدىڭ ماڭىزى زور. 

«يندۋستريا, اۋىل شارۋاشىلىعى, ۇلتتىق ەكونوميكا مينيسترلىكتەرى مەن اكىمدىكتەر بۇل جۇمىستى ايرىقشا باقىلاۋدا ۇستاۋى قاجەت»,  دەپ تاپسىردى ءا. سمايىلوۆ. 

ايتا كەتسەك, قازىرگى ۋاقىتتا ۇكىمەت جانىندا بيزنەس وكىلدەرىنىڭ قاتىسۋىمەن داعدارىسقا قارسى شارالار جونىندەگى جەدەل شتاب جۇمىس ىستەيدى. ونىڭ وتىرىستارىندا تۋىنداعان بارلىق ماسەلەلەر بىرلەسىپ شەشىلەدى.