«استانا وپەرا» تەاترىنىڭ جەتەكشى ءسوليسى, قازاقستاننىڭ ەڭبەك سىڭىرگەن قايراتكەرى باقتيار ادامجان مەن تەاتر ءسوليسى اناستاسيا زاكلينسكايا «اندريس ليەپا 6:0» الەم بالەت جۇلدىزدارىنىڭ مەرەيتويلىق گالا-كونتسەرتىندە ونەر كورسەتتى. باقتيار ادامجاننىڭ گاسترولدىك تۋرى ءنوۆوسىبىر وپەرا جانە بالەت تەاترىنىڭ ساحناسىندا قويىلىمدارعا قاتىسۋىمەن جالعاستى.
رەسەيدىڭ حالىق ءارتىسى اندريس ليەپانىڭ مەرەيتويلىق كەشى «قولتاڭبالار مەن تۇلعالار» اتتى تانىمال جوبا اياسىندا مەملەكەتتىك كرەمل سارايىندا وتكەن ەدى. ماسكەۋ ساحناسىندا «استانا وپەرانى» عانا ەمەس, كۇللى قازاق ونەرىن تانىتقان قوس ونەرپاز ن.ا.ريمسكي-كورساكوۆتىڭ مۋزىكاسىنا اندريس ليەپا قويعان «شەحەرازادا» بالەتىنەن اداجيودا التىن قۇل مەن زوبەيدانىڭ بەينەلەرىن سومدادى.
سونداي-اق جەتەكشى سوليست وسى باعدارلاما اياسىندا ا.اداننىڭ «كورسار» بالەتىنەن پادەدەنى دە ورىندادى.
ايتا كەتەيىك, باقتيار ادامجان مەن اناستاسيا زاكلينسكايا «شەحەرازادانى» قويىلىم تەاتر رەپەرتۋارىنا ەنگەن العاشقى كۇننەن بەرى ورىنداپ كەلەدى.
باقتيار ادامجان ءنوۆوسىبىر وپەرا جانە بالەت تەاترىندا شاقىرىلعان جەتەكشى سوليست بولىپ ەڭبەك ەتەدى. كورەرمەندەر ونى ا.حاچاتۋرياننىڭ «سپارتاك», ل.مينكۋستىڭ «دون كيحوت» سپەكتاكلدەرى جانە «بايادەركا» بالەتىنىڭ كلاسسيكالىق نۇسقاسىندا جاقسى تانىدى.
«بۇل جولى موريس جارردىڭ مۋزىكاسىنا رولان پەتيدىڭ «پاريج قۇداي اناسىنىڭ سوبورىندا», سونداي-اق يسپاندىق حورەوگراف ناچو دۋاتونىڭ قويىلىمىندا «بايادەركا» بالەتىنىڭ مەن ءۇشىن جاڭا نۇسقاسىندا بيلەدىم. ءتۇرلى ساحنالاردا, الەمدىك بالەت جۇلدىزدارىمەن بىرگە گالا-كونتسەرتتەردە ونەر كورسەتۋگە مۇمكىندىگىم بارىن ماقتان ەتەمىن. اتاقتى بيشىلەرمەن تانىستىم, شىعارماشىلىق وسۋگە, تاجىريبە الماسۋعا ۇلكەن اسەر الدىم», دەيدى ءارتىس.