نۇر-سۇلتان قالاسى №1 بالالار مۋزىكا مەكتەبىنىڭ ۇلكەن «ەسترادالىق ۆوكال» ءبولىمىنىڭ 2-سىنىپ وقۋشىسى ايزادا امانجولقىزىنىڭ «عاجايىپ الەم» رەسپۋبليكالىق وليمپياداسىندا ۇزدىك دەپ تانىلىپ, ۇزدىك بالالار ەرتەگىلەر توپتاماسىنا ەنگەن «ايزادانىڭ عاجايىپ الەمى» ەرتەگىسى جەلىسى بويىنشا م.داۋلەتباق اتىنداعى بالالار تەاترى وقۋشىلارىنىڭ قاتىسۋىمەن «ايزادانىڭ عاجايىپ الەمى» اتتى ميۋزيكل-ەرتەگى پرەمەراسى ءوتتى.
مەملەكەت باسشىسى قاسىم-جومارت توقاەۆ وسكەلەڭ ۇرپاققا جول اشۋ ءۇشىن بارلىق جاعدايدى جاساۋ قاجەتتىگىن ايتا كەلە, وسى جىلدى «بالالار جىلى» دەپ جاريالاعان ەدى. «بالالارعا ەرەكشە نازار اۋدارۋ كەرەك. وسكەلەڭ ۇرپاقتىڭ ۇيلەسىمدى دامۋى مەن باقىتتى بالالىق – بۇل ءبىزدىڭ جالپى ۇلتتىق مىندەتىمىز», دەدى پرەزيدەنت. وسى ورايدا جاس بالدىرعان ايزادانىڭ قيالىنان تۋعان بۇل ەرتەگى باقىتتى بالالىقتى سۋرەتتەپ, وتباسىلىق قۇندىلىقتاردى, اتا-انا مەن بالا, تۋىس اراسىنداعى جىلىلىقتى, باۋىرمالدىلىقتى, جاناشىرلىقتى, ءبىر-بىرىنە دەگەن سەنىمدى دارىپتەپ, جاس كورەرمەننىڭ پاتريوتتىق سەزىمىن, وتانعا دەگەن سۇيىسپەنشىلىگىن وياتىپ, وتباسىلىق قۇندىلىقتاردى نىعايتىپ, شىعارماشىلىققا دەگەن قىزىعۋشىلىعىن ارتتىرىپ, كوتەرىڭكى كوڭىل كۇي سىيلايدى.
رەسپۋبليكالىق ءتۇرلى بايقاۋلارعا قاتىسىپ, جەڭىمپاز اتانىپ جۇرگەن ايزادا امانجولقىزىنىڭ كوركەمدىك جەتەكشىسى – قازاقستاننىڭ مادەنيەت قايراتكەرى, مادەنيەت سالاسىنىڭ ۇزدىگى, قازاق ۇلتتىق ونەر ۋنيۆەرسيتەتىنىڭ پروفەسسورى مايرا داۋلەتباق.