تۇستەردىڭ ءتىلىن تەرەڭ تۇسىنەتىن تۋىندىگەر تابيعات بوياۋلارىن كوڭىلگە كوشىرىپ العان دەرسىز. سۋرەتشىگە ەڭ كەرەگى دە وسى ەمەس پە؟ ءوز ورنىن تابا الماعان بوياۋ تۋىندىنىڭ مازمۇنىن قاشىرادى. ەستۋ مەن سويلەۋ قابىلەتىنەن قاعاجۋ كورسە دە جارىق الەمنىڭ الۋان ءتۇسىن وتە نازىك يىرىمدە سەزىنىپ, سول سەزىنە بىلگەن دۇنيەسىن كەنەپ بەتىندە شەبەر ايشىقتاۋى انار ءابجانوۆانىڭ ونەر ولكەسىنە كەزدەيسوق كەلمەگەنىنەن حابار بەرەدى.
ورىمدەي كەزىنەن قولىنا قىلقالام ۇستاعان ارمانشىل جان ءومىر سۋرەتتەرىن ءوز سەزىمىمەن ورنەكتەپ ءجۇر. ونەر ءبىر ورىندا تۇرمايتىنىن, ونىڭ ۇنەمى دامىپ ادام قيالىمەن بىرگە شارىقتاي بەرەتىن شەكاراسى جوق شەكسىز الەم ەكەنىن ايگى ەتەدى. زاڭعار بيىككە كوز سالساق, اسپاننىڭ ءتۇسى كوك ەكەنىن كورەمىز. بالكىم, ول سۇر ياكي قىزىل شىعار. بىراق ءبىز بۇل تۋرالى ويلانىپ كوردىك پە؟ ال قيال قۇشاعىنداعى سۋرەتشى اينالاداعى ءار قوزعالىستى وزگە قىرىنان تانىپ, وزىنشە پايىمدايدى. سەبەبى ادام قيالىن شەكتەۋ مۇمكىن ەمەس. ءبىر قىزىعى, اناردىڭ قىلقالامىندا قىزىل-جاسىل قۇلپىرما بوياۋلار كوپ كەزدەسە بەرمەيدى. قانداي تاقىرىپقا قالام تەربەسە دە كوك ءتۇستى باستى رەڭك رەتىندە پايدالانادى.
جالعىز ءتۇستىڭ جارىعىمەن-اق جان دۇنيەسىن جايىپ سالادى. شىنىندا, بۇل ۇلكەن شەبەرلىك ءھام ونىڭ كەنەپتەگى وزىنە ءتان ءستيلى دەپ قابىلدادىق. تۇتاس ويدىڭ كولوريتىن ءبىر تۇسكە باعىندىرۋ, شىعارمانىڭ ءمانىن سول تۇسپەن اشۋعا تىرىسۋ قايتالاۋعا ۇرىندىرۋى مۇمكىن عوي دەگەن ساۋال تۋىنداۋى زاڭدى. الايدا سۋرەتشىنىڭ كوك ءتۇستىڭ كوركەم رەڭكىن ءار تاقىرىپتا ءارتۇرلى ويناتا ءبىلۋى ناعىز كوڭىلدەن شىققان, جۇرەكپەن جازىلعان جاندى كارتينالاردىڭ بولمىسىن كوز الدىمىزعا اكەلەدى. نانباساڭىز, قاراڭىز!
الماتى قالاسىنىڭ قىسقى كورىنىستەرىنە ارنالعان سۋرەتتەر توپتاماسىنا ءۇڭىلىپ كورەيىك. كوك ءتۇستىڭ رەڭ-قاسيەتتەرىن مولىنان پايدالانعان. اشىق تا قانىق, تازا كوك ءتۇس ارقىلى قىسقى ايازدى, المالى شاھاردىڭ اۋا رايىن, اق قاردان سىرعا تاعىنعان اعاشتار مەن اق سالدە ورانعان عيماراتتاردى قالاي ءدال بەدەرلەگەن. الماتىنىڭ اسەم بەينەسىن ايشىقتاي كەلە, تالاي ەستەلىكتەر تۇنعان تانىس كوشەلەردى كوڭىلىنە بارىنشا جاقىن ەتىپ كورسەتۋگە كۇش سالادى. ال بىردە اقار-شاقار شىڭداردىڭ باۋرايىنا قىزعالداقتان كىلەم توسەپ جانىڭىزعا جاز ورناتادى. كەنەپتەگى بەيتانىس مارجان مەكەنگە اڭسارىڭ اۋىپ, ەرتەگىلەر ەلىنە ەنىپ كەتكىڭ كەلەدى. اسپەتى بولەك اسەم عيماراتتار زاۋ بيىككە قول سوزعان اعاشتارمەن اۋەز تاپقان. تىرشىلىكتى ءۇنسىز كۇيىندە قابىلداعانىمەن, جانارى جاقسىلىقتى عانا كورەتىن جاننىڭ الەمى دە ادەمى. ونىڭ قاعاز بەتىنە تۇسىرگەن ويلارىن وقىپ وتىرىپ, كوڭىل تەرەزەسىنىڭ اينەگىنەن ناعىز شىعارماشىل ادامىنىڭ بەينەسىن كورەمىز.
– كوكتەم مەنى اينالانىڭ بارىنە عاشىق ەتىپ جىل سايىن گۇل بولىپ ورالادى. بۇل سەزىمدى كوكىرەگىمدە ماڭگىلىك ساقتاپ قالعىم كەلەدى. بالا كەزدەن كوڭىلىم اينالامداعى بوياۋلاردى ەرەكشە اسەرمەن قابىلدايدى. ايالدامادان باستالاتىن قالا تىرشىلىگى تۇنجىراعان اۋا-رايىمەن قوسىلىپ, مەنى بەيجاي قالدىرمايدى. تىرشىلىك تىنىسى كوڭىلىمدەگى سەزىم تەرەڭدىگىندە بوياۋ تىلىمەن ءۇن قاتىپ اق قاعازعا تۇسكەنشە جانىمدى ارپالىسقا سالادى. نەگە ەكەنىن, جانىم اينالاداعى الەمنەن وزگەشە ۇيلەسىم ىزدەيدى. بۇكىل كوڭىل كۇيىمدى, جان دۇنيەمدى ونەر ارقىلى سىرتقا شىعارامىن. مۇمكىن بۇل بارلىق سۋرەتشىگە ءتان سەزىم شىعار. ادام ءومىر بويى وزىندەگى كەمشىلىكتەرمەن كۇرەسىپ, ونى جەڭە ءبىلۋى شارت. دارىنىڭ بولسا دا, ونى تاربيەلەپ, شىڭداۋ كەرەك. ەركىن ويلى ادام عانا ونەردە جاسامپازدىققا قول جەتكىزەدى, – دەپ تەبىرەنەدى انار ءابجانوۆا.
ەلىمىزدىڭ 100 جاڭا ەسىمدەرىنىڭ قاتارىنا ەنگەن انار سۋرەتشىلەر وداعىنىڭ مۇشەسى. ونەردى ءومىر دەپ بىلەتىن ول ونەرسۇيەر قاۋىمعا ءوزىنىڭ ونداعان جەكە كورمەسىن ۇسىنىپ ۇلگەردى. اقش, چيلي, فرانتسيا, يتاليا, رەسەي مەملەكەتتەرىندە وتكەن حالىقارالىق بايقاۋلار مەن پلەنەرلەردە قولتاڭباسىن قالىپتاستىرىپ, شىعارما- شىلىعىن ۇدايى دامىتىپ كەلەدى. «شابىت» فەستيۆالىنىڭ لاۋرەاتى. تاباندى ەڭبەك پەن كىرشىكسىز كوڭىل عانا ءومىردى جارقىن تۇسكە بويايتىنىنا بەك سەنەتىن ول مىنا عازيز الەمگە ەس-ءتۇسسىز عاشىق. ومىرگە ىڭكار سۋرەتشىنىڭ قولتاڭباسىنا ۇڭىلگەن سايىن ءسىزدىڭ دە كەۋدەڭىزدى ءۇمىت پەن سەنىم, ماحاببات پەن قۋانىش كەرنەيدى. اناردىڭ كەنەبىنەن كوكتەمنىڭ ءيىسى اڭقيدى.
الماتى