ادەتتە قىلمىسكەرلەردى تەرگەيتىن مانشۇكتى بۇل جولى ءبىز سۇراقتىڭ استىنا الدىق. جيىرما جىلعا جۋىق ۋاقىت قۇقىق قورعاۋ سالاسىندا تابىستى ەڭبەك ەتىپ جۇرگەن تەرگەۋشى ارۋ تەنتەكتەردى تەزگە سالىپ, تۇرعىنداردىڭ العىسىن ارقالاپ ءجۇر.
قۇقىق قورعاۋ سالاسىندا قىز-كەلىنشەكتەردىڭ ەڭبەك ەتۋى تاڭسىق ەمەس. دەسە دە, كوبى ولاردى بالالار مەن جاسوسپىرىمدەرگە قاتىستى ۇساق ءتارتىپ بۇزۋشىلىقتاردى رەتتەۋمەن اينالىسادى دەپ ويلايدى. بىراق بۇل دۇرىس پايىم ەمەس. ماسەلەن, ەكىباستۇز قالالىق پوليتسيا باسقارماسى تەرگەۋ ءبولىمى باستىعىنىڭ ورىنباسارى, پوليتسيا مايورى, ەر ادامدارعا ءتان ەرجۇرەكتىلىك, باتىلدىق سياقتى قاسيەتتەردى بويىنا جيعان مانشۇك ديسۋپوۆا كانىگى, قاندىقول قىلمىسكەرلەرمەن بەتپە-بەت وتىرىپ, ولاردى تەرگەيدى.
– بالا كەزدەن ادامدارعا جاقسىلىق جاساعاندى ۇناتاتىن ەدىم. قۇقىق قورعاۋ سالاسىندا قىزمەت ەتۋدى تاڭداۋىم دا سودان شىعار. ءالى كۇنگە دەيىن قىلمىستى اشقانىم ءۇشىن ايتىلاتىن العىستاردان راحات الامىن. ودان سايىن جىگەرلەنە تۇسەمىن. كەيبىر قىلمىستار ءبىر تاۋلىكتىڭ ىشىندە اشىلادى, كەيدە ۇزاق ۋاقىتقا سوزىلىپ كەتەدى. ءار ءىستى سوڭىنا دەيىن جەتكىزبەي بايىز تاپپايمىن. جۇبايىم دا قۇقىق قورعاۋ سالاسىندا جۇمىس ىستەيدى. ۇيدە جۇرگەندە جەكە باستىڭ ماسەلەلەرى جايىنا قالادى. ەكەۋمىز قىلمىستى اشۋ جولدارىن تالقىلاپ جۇرەمىز. مۇنى ماماندىعىمىزعا دەگەن ادالدىقتىڭ كورىنىسى مە دەپ ويلايمىن كەيدە. جالپى, سوڭعى ۋاقىتتا ەكىباستۇز قالاسىنداعى كريمينوگەندىك احۋال تۇراقتى. قىلمىستاردىڭ ازايۋىنا بەينەباقىلاۋ كامەرالارىنىڭ كوپتەپ ورناتىلۋى, شاھار كوشەلەرىندە پاترۋلدىك شارالاردىڭ كۇشەيتىلۋى وڭ اسەر ەتۋدە. ال قىلمىستىڭ جەدەل اشىلۋىنا تسيفرلاندىرۋ جوبالارىنىڭ كومەگى زور. قازىر بۇرىنعىداي قاعازدارمەن باس قاتىرمايمىز, ءار ءىس بازاعا ءتۇسىپ, ونى ءبىر ۋاقىتتا پوليتسيا, پروكۋراتۋرا جانە سوت ماماندارى كورە الادى. سوڭعى جىلدارى مەملەكەت تاراپىنان قۇقىق قورعاۋ سالاسىنا ەرەكشە كوڭىل بولىنۋدە. مىندەتىمىزدى ءمىنسىز اتقارۋ – پارىزىمىز! – دەيدى مانشۇك.
تەرگەۋشىلەردىڭ لوگيكالىق ويلاۋ قابىلەتىنىڭ جوعارى بولۋى قىلمىستىڭ جەدەل اشىلۋىنا اسەر ەتەتىنى ءسوزسىز. مانشۇك بۇل سالاداعى العاشقى «ازىعىن» رەسەي ءىىم ومبى اكادەمياسىندا 5 جىل ءبىلىم العان ۋاقىتتا جيناي باستاپتى. اكادەميا قابىرعاسىندا كوبىنە پراكتيكالىق بىلىمگە باسىمدىق بەرىلىپ, قىلمىستى اشۋ جولدارىنىڭ قىر-سىرى ۇيرەتىلگەن. سول ازىق ءالى كۇنگە دەيىن كادەگە جاراپ, تاجىريبەسى تولىسقان مانشۇك بۇگىندە بار بىلگەنىن ءىزىن باسقان جاستارعا ۇيرەتۋدە.
– سوڭعى ۋاقىتتا بىرەۋدىڭ اتىنا نەسيە رەسىمدەۋ سياقتى ينتەرنەت الاياقتىق بەلەڭ الىپ بارادى. جۋىقتا ەكىباستۇز قالاسىنا قاراستى ءبىر كەنتتە تۇراتىن كەلىنشەكتىڭ جاعىمسىز ارەكەتى اشكەرە بولدى. ول الەۋمەتتىك جەلىلەردە پاراقشا اشىپ, وندا سۇلۋ ءارى باي قىزدىڭ كەيپىنە ەنىپ, ەر ادامدارمەن «ماحاببات داستانىن» قۇرعان. كەيىن سەنىمگە كىرىپ, ولارعا نەسيە الىپ بەرۋىن ءوتىنىپ, اقشانى العاننان كەيىن حابارسىز كەتكەن. وسى سياقتى وقيعالار كوپ. ءبىز ۇلتتىق بانك باسشىلىعىنا شاعىن قارجى ۇيىمدارىنىڭ جۇمىسىن رەتتەۋ كەرەك ەكەنىن تالاي جازدىق. سەبەبى الاياقتار ءبىر عانا جەكە كۋالىك ارقىلى تانىمايتىن ادامنىڭ اتىنا بىرنەشە نەسيە رەسىمدەپ, تۇرعىنداردى تىعىرىققا تىرەۋدە. قىلمىستاردىڭ بارلىعى جەدەل اشىلادى دەۋ قيىن. كەيبىر جاعدايدا شەكارانىڭ ار جاعىنداعى الاياقتارعا تاپ بولامىز. نە دەسەك تە, ينتەرنەت الاياقتىقتى ازايتۋدىڭ جولدارىن قاراستىرۋ قاجەت. قىلمىستى اشۋدان بۇرىن الدىن الۋ شارالارىن قولعا العان ابزال, – دەيدى كەيىپكەرىمىز.
مانشۇكتى وبلىستاعى ارىپتەستەرى مەرگەن رەتىندە تانيدى. جىل سايىن ءتارتىپ ساقشىلارى اراسىندا ۇيىمداستىرىلاتىن پيستولەتپەن نىسانانى كوزدەۋ جارىسىندا تەرگەۋشى ارۋ باس جۇلدەنى بەرمەي كەلەدى. وزگە دە ماراپاتتارى جەتەرلىك. «باستى ماراپات – حالىقتىڭ العىسى», دەيدى ول. العىسقا بولەنە بەر, قازاقتىڭ باتىر قىزى مانشۇكتىڭ ءىزباسارى!
پاۆلودار وبلىسى