قازاقستاندىق 30-دان اسا وقۋشى اقش-قا جولداما جەڭىپ الىپ, FIRST Alumni مارتەبەسىن يەلەندى. اتالعان مارتەبە وقۋشىلارعا الەمنىڭ 200 بەدەلدى ۋنيۆەرسيتەتىنىڭ بىرىنە وقۋعا تاپسىرسا, گرانتقا وتۋىنە ارتىقشىلىق بەرەدى. قازاقستان اتىنان ىرىكتەلگەن كوماندانىڭ بۇل مۇشەلەرى ەندى حالىقارالىق سايىستا جۇلدەگە تالاسادى.
جولداما وقۋشىلارعا روبوتوتەحنيكادان FIRST حالىقارالىق چەمپيوناتىنىڭ ۇلتتىق فينالى قورىتىندىسى بويىنشا بەرىلدى. ۇلتتىق جارىسقا قازاقستاننىڭ تۇكپىر-تۇكپىرىنەن 700-دەن اسا وقۋشى قاتىستى. ناتيجەسىندە, 4 وقۋشى سۇلەيمان دەميرەل اتىنداعى ۋنيۆەرسيتەتتە وقۋعا مۇمكىندىك بەرەتىن گرانت ۇتىپ الدى. سونىمەن قاتار چەمپيوناتقا قاتىسقان 10 كوماندا ماسكەۋ قالاسىنداعى FIRST جارىسىنا, ال كراسنويارسك قالاسىنا 6 كوماندا اتتانادى.
قازاقستانداعى FIRST روبوتوتەحنيكا بويىنشا حالىقارالىق جارىسىنىڭ ۇيىمداستىرۋشىسى نۇرداۋلەت دوسماعامبەت: «بيىل قاتىسۋشىلار «جۇك تاسىمالى» تاقىرىبى بويىنشا تاپسىرمالار ورىندادى. سوندىقتان وقۋشىلار وزدەرى ويلاپ تاپقان شاعىن جۇكتەردى تاسىمالدايتىن, تاۋارلاردى سۇرىپتايتىن جانە كەدەرگىلەردى اينالىپ وتەتىن روبوتتاردى تانىستىردى. چەمپيوناتتىڭ قورىتىندىسى بويىنشا ءتورت كوماندا اقش-قا جولداما جەڭىپ الدى. بۇعان قوسا الماتى, سەمەي جانە تۇركىستان وبلىسىنان 4 وقۋشى ءبىلىم گرانتتارىن جەڭىپ الدى. چەمپيوناتقا ەلىمىزدىڭ شاعىن اۋىلدارى مەن قالالارىنان كەلگەن مەكتەپ وقۋشىلارىن اتاپ وتكىم كەلەدى. بۇعان دەيىن تۇركىستان, قىزىلوردا جانە شىعىس قازاقستان وبلىستارىندا, اقمولا وبلىسىنىڭ اتباسار قالاسىندا مەكتەپ وقۋشىلارى مەن مۇعالىمدەرىنە روبوتوتەحنيكادان ترەنينگتەر مەن جارىستار وتكىزىپ, بالالار مەن وقىتۋشىلاردىڭ قىزىعۋشىلىعىن كوردىك. ولار چەمپيوناتقا كەلىپ, ءبىلىم جاعىنان ۇلكەن قالالاردىڭ وقۋشىلارىنان كەم تۇسپەيتىنىنە كوز جەتكىزە الدى», دەيدى.
وقۋشىلار عانا ەمەس, مۇعالىمدەر دە ىنتالاندىرۋدان قۇرالاقان قالماپتى. 6 مۇعالىم Best Mentor Award نوميناتسياسى بويىنشا FIRST ماراپاتتارىنا يە بولدى. وسى ماراپاتتى العانداردىڭ ءبىرى اسەم قاسىم قاراعاندى وبلىستىق دارىندى بالالارعا ارنالعان مامانداندىرىلعان «دارىن» مەكتەپ-ينتەرناتىندا ينفورماتيكا مەن سپورتتىق روبوتوتەحنيكادان ساباق بەرەدى.
ءبىلىم جانە عىلىم مينيسترلىگى وقۋشىلار مەن مۇعالىمدەر قاتىساتىن وليمپيادالار تىزىمىنە FIRST چەمپيوناتىن ەنگىزگەن. جىل سايىن FIRST جارىسىنىڭ ۇيىمداستىرۋشىلارى 6 مەن 18 جاس ارالىعىنداعى بالالار اراسىندا ءتۇرلى بايقاۋلار وتكىزەدى. ءار سايىس تاقىرىبى جانە تاپسىرمالاردىڭ كۇردەلىلىگىمەن ەرەكشەلەنەدى. تاپسىرمالار ناقتى الەمدىك ماسەلەلەرمەن بايلانىستى, اتاپ ايتقاندا, ونەركاسىپتى اۆتوماتتاندىرۋ, تاۋ-كەن ءوندىرۋ, قالدىقتاردى وڭدەۋ, عارىشتى زەرتتەۋ, بيومەديتسينا جانە باسقا دا ماڭىزدى تاقىرىپتاردى قامتيدى.