«بولاشاقتان» باسقا نە بار؟

سەمەستر سايىن گرانتقا مۇمكىندىك بەرىلەدى

جاھانشاح جاندوس ۇلى پولشانىڭ جەشۋۆ قالاسىنداعى اقپارات تەحنو­لوگياسى مەن مەنەدجمەنت ۋنيۆەرسيتەتىندە (UITM, Rzeszów) ءبىلىم العان. اتالعان جوعارى وقۋ ورنىندا ماماندىقتىڭ ءتۇر-ءتۇرى بار, بىراق ونىڭ ىشىندە ساناۋلىسى عانا اعىلشىنشا وقىتىلادى. كەيىپكەرىمىز سول ساناۋلىنىڭ ىشىندەگى اۆياتسيا مەنەدج­مەنتى باعىتىندا ءبىلىم الدى. قازىر ءوزى سول پولشا ەلىندە ەڭبەك ەتىپ ءجۇر. شەت­ەل­دەن حات جولداعان جاھانشاحتان ەڭ اۋەلى وسىنداي حالىقارالىق بىلىمگە قالاي قول جەتكىزگەنىن سۇرادىق.

«11-سىنىپتا وقىپ ءجۇردىم. مەن بىتىر­گەن پولشالىق ۋنيۆەرسيتەتتىڭ قازاق­ستانداعى وكىلدەرى وقۋ وردامىزعا كەلىپ كەتتى. وقۋ اقىسى سول ۋاقىتتا ءوزىم قىزىعىپ جۇرگەن ەۋرازيا ۇلتتىق ۋنيۆەرسيتەتى­مەن شامالاس بولدى. سودان ويلانىپ, ۇيدەگى­لەرمەن اقىلداسا كەلە پولشانىڭ شا­عىن قالاسىنداعى وسى وقۋ ورنىندا وقۋعا شەشىم قابىلدادىم. ءتىل ۇيرەنۋگە دەگەن قىزىعۋشىلىعىم, پولشانىڭ, اسىرەسە سول قالانىڭ تىنىشتىعى, جالپى, وسى ەلدەگى جانە قازاقستانداعى تۇرمىستىڭ باعاسى, سوندا الاتىن ءبىلىمنىڭ پايداسى, اتا-انامنىڭ كەڭەسى وسىنداي شەشىم شىعارۋعا ىقپال ەتتى. وقۋ اقىلى, بىراق ءار سەمەستر سايىن رەكتورلىق گرانتقا ىلى­گۋگە مۇمكىندىك بەرىلەدى, بارلىعى ورتا­شا باعا مەن قوعامدىق شارالارداعى, نە شى­عارماشىلىقتاعى بەلسەندىلىكپەن ولشە­نەدى. دەگەنمەن نەگىزگى باسىمدىق – بىلىمدە جانە ناتيجەدە», دەدى ج.جاندوس ۇلى.

كەيىپكەرىمىزدىڭ ويىنشا, شەتەلدە وقۋ دەگەنىمىز «وقۋ, وقۋ جانە وقۋ» دەيتىن جاتتاندى كوزقاراسپەن شەكتەلىپ قالمايدى, ۋنيۆەرسيتەتتىڭ وقۋدان تىس, شەتەلدەگى ءومىردىڭ ۋنيۆەرسيتەتتەن بولەك قىزىقتا­رى بار. ءوز بەتىنشە ءومىر ءسۇرۋ, ماڭىزدى شەشىمدەر قابىلداۋ, مۇلدە باسقا تىلدە قاعاز قۋالاپ, قۇجات جيناۋ, قانسوناردا بۇركىتپەن تۇلكى اۋلاعاننان كەم تۇسپەيتىن جەڭىلدىكتەر مەن اكتسيالاردى «اڭدۋ», اقشانى ۇنەمدەپ پايدالانۋ, ءبىزدىڭ ءتىل مەن مادەنيەتتى جات كورەتىن بەيتانىستارمەن ساۋدالاسۋ, كەلىسىمدەرگە كەلۋ, قونىس ىزدەۋ... مۇنىڭ ءبارى – ءومىردىڭ ساباقتارى.

«بارىنەن بۇرىن ءوزىم ءبىلىم العان ما­مان­دىقتا اۋە يندۋسترياسىنىڭ بۇگە-شۇگەسىنە دەيىن عانا ەمەس, اۆياتسيا سالاسىنا قاتىستى نەمەسە تاۋەلدى بولادى دەگەن ەكونوميكا, تۋريزم, ماركەتينگ جانە زاڭ­دار بويىنشا ءبىلىم الدىق. اۋەجايلار­دىڭ, اۋە تاسىمالداۋشىلاردىڭ ەكونوميكاسى, باسەكەلەستىگى سەكىلدى ماڭىزدى ءبىلىم بەرىلدى. بىراق مۇنىڭ ءوزى – ءبىر شەتى عانا. جۇمىس تابۋ پاندەميادان بۇ­رىن وڭاي بولاتىن, قازىر ءسال كۇردەلىرەك. دە­گەنمەن قابىلەتتى ادامعا ءاردايىم ەسىك اشىق. مەنىڭشە, كوپ ستۋدەنت مۇندا ءتىل جاعىنان قينالادى. پولشاعا كەلسە دە, پولياك ءتىلىن ۇيرەنگىسى جوق. ال بۇل ەلدە قۇجاتتاردىڭ ءبارى پولياكشا, ءۇيىن جالعا بەرەتىندەردىڭ باسىم بولىگى اعىلشىنشا بىلمەيدى. ءتىل بىلمەگەننىڭ كەسىرىنەن الدانىپ قالىپ جاتقانداردى دا كوردىك», دەيدى ج.جاندوس ۇلى.

كورەياداعى ۇلتتىق ۋنيۆەرسيتەتتىڭ گرانتى

قازىرگى جاستار كوبىنە اتا-اناسىنا سال­ماق سالماۋ ءۇشىن تەگىن ءبىلىمدى تاڭداي­دى, سوعان تالاپتانادى. سونداي جاستىڭ ءبىرى – وڭتۇستىك كورەيادان بايلانىسقا شىق­قان, كورەيا (Kyungpook) ۇلتتىق ۋني­ۆەرسيتەتىنىڭ شەتەلدىكتەرگە بولىنەتىن گران­تپەن وقىعان گۇلزيرا ابۋوۆا. ول ءوزىنىڭ ىزدەنىسى ناتيجەسىندە وقۋعا ءتۇستى. بۇدان بۇرىن كەيىپكەرىمىز قازاقستاندا مۋزىكالىق كوللەدجدىڭ حورەوگرافيا ماماندىعىن ءبىتىرىپتى. كەيىن ءوزى وسكەن قىزىلوردا قالاسىنداعى مەملەكەتتىك سپورت مەكتەبىندە گيمناستيكالىق بيدەن ساباق بەردى. ونىڭ ايتۋىنشا, كورەيادا شەتەلدىك ستۋدەنتتەرگە جاقسى جاعداي جا­سالعان. ماسەلەن, جاتار ورنى, تاماعى تەگىن, ۆ.0 دەڭگەيىنەن ءتۇسىپ قالماسا, ستيپەندياسىن تاعى الادى. بىزدە دە, ايتا­لىق, ل.ن.گۋميلەۆ اتىنداعى ەۇۋ-دە جىل سايىن اكادەميالىق ۇتقىرلىق باعدار­لاماسىمەن شەتەلدەن ستۋدەنتتەر كەلىپ وقيدى. ولار جوسپارلانعان ارنايى كۋرس­تاردى تاڭداپ, ءبىلىم الادى. شەتەلدىك ستۋ­دەنتتەرگە جاتاقحانا جانە شاكىرتاقى بەرىلەدى. ولاردىڭ وقۋ مەرزىمى – 1 سەمەستر (4 نەمەسە 5 اي). سونداي-اق قازاقستان مەم­لەكەتى تاراپىنان اۋعانستان, پاكىستان جا­نە ت.ب. ەلدەردەن كەلگەن ستۋدەنتتەرگە ار­نايى گرانت بولىنەدى. شەتەلدىك ستۋ­دەنت­تەر قازاقستان ستۋدەنتتەرىمەن بىرگە 4 جىل وقىپ, باكالاۆريات ديپلومىن الىپ شى­عادى.

ال مىناداي مۇمكىندىكتىڭ بىزدە جوق ەكەنى راس. سەنەسىز بە, كورەيالىق ستۋ­دەنت­­تەر ساباق كەستەسىن وزدەرى قۇرادى. «مۇن­دا ىزدەنۋشىلەرگە ەركىندىك بەرىلگەن. ءبىز­دىڭ ەلدەگى جۇيەگە وسى جەتىسپەيتىن سياق­­ت­ى. ارينە, ماماندىققا قاتىستى مىن­­دەتتى پاندەر بار, بىراق قالعانىن ءوزىم تاڭ­دايمىن. مىسالى, وسى سەمەسترگە اعىلشىن ءتىلىن قوسىپ قويدىم. بۇل – ءبىر. ەكىنشىدەن, وزىمە ىڭعايلى ۋاقىت­تى دا بەلگىلەي الامىن», دەيدى ەكىنشى كەيىپكەرىمىز گۇلزيرا.

ال ەلىمىزدە ستۋدەنتتەرگە ساباق كەس­تەسىن جاساۋ مۇمكىندىگى بەرىلمەگەن. الايدا ستۋدەنت وقىتۋشىنى نەمەسە ارنايى پان­دەردى تاڭداي الادى. سونىمەن قاتار ستۋ­دەنت ءوز ماماندىعىنا بايلانىستى پان­دەردى اعىلشىن تىلىندە ءبىلىم بەرەتىن توپتاردا وقۋعا قۇقىلى. بىراق ونداي توپ­تارعا ءتۇسۋ ءۇشىن ارنايى تالاپتارعا ساي بولۋ كەرەك. ەڭ باستى جانە مىندەتتى تالاپ – ستۋدەنتتىڭ اعىلشىن ءتىلىن ءبىلۋ دەڭگەيى. ءيا, تالاپ ءارتۇرلى بولعانىمەن, ءار ۋنيۆەرسيتەتتىڭ شەتەلدىك ستۋدەنتتەرگە بولەتىن گرانتى بولادى. سوعان ۇمتىلۋعا ءار ۇمىتكەردىڭ مۇمكىندىگى بار.

اقشا تولەپ, تابىس تابۋعا بولادى

ءبىرىنشى كەيىپكەرىمىز سىندى شەتەلدىك ۋنيۆەرسيتەتتىڭ ۇسىنىسىمەن, ەكىنشى كە­ي­ىپ­­كەرىمىزدەي ۋنيۆەرسيتەتتىڭ گرانتى­مەن وقىعانداردان بولەك, ەلىمىزدە جۇمىس ىس­تەيتىن ارنايى ورتالىقتار ارقىلى مۇ­حيت اسىپ ءبىلىم العاندار بار. ماقسۇتبەك ايتماعامبەت Work and travel US مادەني ءبىلىم بەرۋ باعدارلاماسىمەن وقىپ كەلگەن. قازىر اقش-تان العان «كاسىپكەرلىك ءبىلىم» باعىتىندا يگەرگەن داعدىلارىن ومىردە قولدانىپ, جۇمىس ىستەپ ءجۇر.

ء«وزىم – وسى باعدارلامامەن بارعان العاشقى قاتىسۋشىنىڭ ءبىرىمىن. 2000-جى­لى باردىم. بالالار لاگەرىندە تالىمگەر بولىپ جۇمىس ىستەدىم. امەريكاعا بىرنەشە رەت ءارتۇرلى باعدارلامامەن بارىپ, كەيىن سول اقش-تا ۋنيۆەرسيتەتتىڭ جانە ءوزىم قىزمەت ەتەتىن كومپانيانىڭ گرانتىمەن ماگيستراتۋرانى وقىدىم. بۇل باعدارلاما ساياحاتتاۋ ارقىلى ۇيرەتۋ, ءبىلىم بەرۋدى كوزدەيدى. ءبىلىم ساياحاتى دەپ اتاساق تا بولادى. بىراق ءبىر نارسەنى ۇمىتپاۋ كەرەك, Work and travel تەك ستۋدەنتتەرگە ار­نالعان, ولاردىڭ جازعى نەمەسە قىسقى دەمالىستارىندا ساياحاتتاي ءجۇرىپ جۇمىس ىستەۋگە, ەل تانىپ, جەر كورۋگە باعىتتالادى. نەگىزى اتالعان باعدارلاما 1957 جىلى امەريكادا پايدا بولدى. اۋەلدە ەۋروپا مەن اقش ستۋدەنتتەرى ءوزارا ءبىلىمىن ءبو­لىسىپ, ءوزارا مادەنيەتتى, ءتىلدى ۇيرەندى. مۇندا نەگە جۇمىسقا ءمان بەرىلەدى؟ ءبى­لىم نەگىزىنەن فورمالدى, فورمالدى ەمەس بولىپ ەكىگە بولىنەدى عوي. كوبىنە-كوپ جۇمىسقا تۇراردا وقۋلىقتارداعى فورمالدى بىلىمنەن گورى قارىم-قاتىناس مادەنيەتى, كۇردەلى ماسەلەلەردىڭ شەشىمىن تابۋ, جۇمىستاردى جۇيەلەي ءبىلۋ سەكىلدى فورمالدى ەمەس ءبىلىم سۇرالادى, كەي جەردە ءتىپتى تالاپ ەتىلەدى. ال مۇنداي ءبىلىمدى ادام ومىردەن, شىنايى پراكتيكادان الادى, ياعني قانداي دا ءبىر جاۋاپكەرشىلىك الىپ جۇمىس ىستەۋدەن ۇيرەنەدى», دەيدى م.ايتماعامبەت.

بۇل كەيىپكەرىمىزدىڭ ايتۋىنشا, مۇن­داي باعدارلاما امەريكادا عانا ەمەس, دۇنيەجۇزىنىڭ كوپتەگەن ەلىندە بار. مى­سالى, Work and travel Germany, Work and travel Australia باعدارلاماسى جۇ­مىس ىستەيدى. اتاۋى بولەك بولعانىمەن, Work and study دەيتىن اۋستراليالىق باع­دارلامانىڭ باعىتى دا وسىنداي.

Work and travel US مادەني ءبىلىم بەرۋ باعدارلاماسى قازاقستاندا 1998 جىلدان بەرى جۇمىس ىستەپ كەلەدى. بۇل باع­دارلامانى ەلىمىزدە ءوزىم ەڭبەك ەتەتىن حالىقارالىق ءبىلىم الماستىرۋ ورتالىعى ىسكە اسىردى. وسى ۋاقىت ىشىندە 22 مىڭنان اسا ستۋدەنتتىڭ شەتەلدىك مادەنيەتتى كو­رىپ, ءتىل ۇيرەنىپ, قاجەتتى داعدىنى يگەرىپ, فورمالدى ەمەس ءبىلىم الىپ, پراكتيكادا قولدانۋىنا كومەكتەستىك. بارعان ستۋدەنتتەر شاعىن بيزنەس مەكەمەلەرىندە جۇ­مىس ىستەدى. مۇنداعى ماقسات – ەڭ الدىمەن ەڭبەككە باۋلۋ, ءوزىن-ءوزى قامتاماسىز ەتۋگە ۇيرەتۋ. مەيلى, ءوزىنىڭ بولاشاق ما­مان­دىعىنا قاتىسى جوق كافەدە, قوناق­ۇيلەردە, رەستورانداردا قىزمەت ەتسە دە, ون­داعى كوزگە كورىنبەيتىن داعدىلار كە­يىن ماماندىعىمەن جۇمىسقا تۇرعاندا قاجەت بولادى. راس, جوباعا قاتىسۋ اقىلى, سوڭعى ەكى جىلدا پاندەميا مەن كەيبىر سانكتسيالاردىڭ سەبەبىنەن قىمباتتادى. قازىر ورتا ەسەپپەن 2 000-2 500 اقش دوللارىن تولەۋ كەرەك. وعان قوسىمشا الاتىن بيلەتى بار. بىراق بارعان سوڭ جۇمىس ىستەپ, جۇمساعان قارجىسىن بىرنەشە ەسەلەپ قايتارىپ العاندار جەتەرلىك. ادەتتە كوبى 10 مىڭ دوللاردىڭ كولەمىندە تابىس تابادى. ال بىلتىر بارعان ستۋدەنتتەر اراسىندا 23 مىڭ دوللارعا دەيىن تابىس تاپقاندار بولدى», دەيدى حالىقارالىق ءبىلىم الماس­تىرۋ ورتالىعىنىڭ وكىلى م.ايتماعامبەت.

Work and travel US باعدارلاماسىمەن امەريكاعا بارۋ ءۇشىن اعىلشىن ءتىلىن اۋىزەكى ءبىلۋ جەتكىلىكتى, حالىقارالىق ءتىل ءبىلىمى جونىندەگى IELTS, TOEFL سەكىلدى تەس­­تىلەۋلەردى تاپسىرۋ, ودان بەلگىلى ءبىر نا­تيجەلى سەرتيفيكاتتار تالاپ ەتىلمەيدى. دە­گەنمەن ورتالىقتىڭ كوورديناتورلارى, كەيىن اقش ەلشىلىگىنىڭ كونسۋلى الاتىن اعىل­شىن تىلىندەگى سۇحباتتان وتەدى. وسى سۇحباتتان وتە العان ستۋدەنتتەر عانا بارا الادى.

زەرتتەۋگە دە گرانت الا الاسىز

ال بىزگە تۇركيادان حات جولداعان بەكارىس نۇريمان Turkiye Burslari جاي­لى 2014 جىلى ەستي باستاپتى. «مەن 2014 جىلى ماگيستراتۋرانى ءبىتىردىم. ءسويتىپ, دوكتورانتۋرانى وسى Turkiye Burslari باعدارلاماسىمەن وقىعىم كەلدى. قۇجات تاپسىرعانىممەن, وتە المادىم. ويتكەنى قۇجاتتاردى ءوز بەتىمشە تولتىرعاندىقتان قاتەلىكتەر بولدى. ءبىر قۇجاتىمدى اعىلشىنشا, ەندى ءبىرىن قازاقشا تولتىرعانمىن. سويتسەم, ءوزىنىڭ www.turkiyeburslari.gov.tr سايتىندا الەم­دە مويىندالعان حالىقارالىق 6 ءتىل­دىڭ بىرىندە عانا جازىپ تاپسىرۋ كەرەگى كورسە­تىلگەن ەكەن. 2015 جىلى ل.گۋميلەۆ اتىن­داعى ەۋرازيا ۇلتتىق ۋنيۆەرسيتەتىنە دوك­تورانتۋراعا ءتۇستىم. دوكتورانتۋرادا وقي ءجۇرىپ تاعى Turkiye Burslari باع­دار­لاماسىنا قۇجات تاپسىردىم. الايدا بۇل جولى دوكتورانتۋراعا ەمەس, زەرتتەۋ گرانتىنا تاپسىردىم», دەيدى.

كەيىپكەرىمىز اتاپ وتكەندەي, Turkiye Burslari باعدارلاماسىنىڭ زەرتتەۋ گرانتى دوكتورانتتارعا بەرىلەدى. ەكىنشى كەزەكتە دوكتورانتۋرانى بىتىرگەندەر دە پوس­دوكتورانتۋرا سەكىلدى زەرتتەۋ جۇرگىزۋگە گرانت الا الادى. دوكتورانتتارعا نە ءۇشىن بەرىلەدى؟ ءسىز الەمنىڭ قاي جەرىندە وقىپ جات­ساڭىز دا گرانتتى يەلەنىپ, الەۋ­مەتتىك-ەكونوميكالىق جاعدايىڭىزدى از ۋاقىت­قا شەشىپ, الاڭسىز عىلىممەن اي­نا­لىسۋىڭىزعا بولادى.

ء«وز تاجىريبەمنەن ايتسام, زەرتتەۋ گرانتىنا قۇجات تاپسىرۋ قاعازباستىلىقتان تۇرمايدى. باستىسى گرانتقا تاپسىراتىن زەرتتەۋ تاقىرىپ دوكتورانتتار ءۇشىن سول دوكتورانتۋراداعى ديسسەرتاتسياسىنىڭ تاقىرىبىنان تىس بولماۋعا ءتيىس. ەكىن­شىدەن, زەرتتەۋ تۋرالى قىسقاشا سيپاتتاپ نەگىزدەمە بەرۋ كەرەك. مۇندا وسى زەرت­تەۋ ارقىلى ءسىز قانداي ماسەلەنى شەشە­تىنىڭىزدى, ونى قانداي ادىستەرمەن زەرت­تەيتىنىڭىزدى, نەندەي دەرەكتەرگە سۇيە­نەتىنىڭىزدى, عىلىمعا قالاي پايداسىن اكە­لەتىنىن, ياعني كۇتىلەتىن ناتيجەسىن دا­يەك­تەپ تۇسىنىكتەمە تولتىراسىز. باس-اياعى 2 بەتتەن تۇراتىن نەگىزدەمە جازىپ تاپ­سىردىم. تاعى ءبىر ەسكەرەتىن نارسە, ونى ءبىر-اق تىلدە جازدىم. نەگىزى زەرتتەۋدى قاي تىلدە جۇرگىزسەڭىز, سول تىلدە جازعان دۇرىس. زەرتتەۋىڭىزدى تۇركياداعى ءبىر عالىممەن بىرلەسىپ جۇرگىزۋىڭىز كەرەك. تاڭداعان جە­تەكشىڭىزدەن جەتەكشىلىك ەتەتىنى تۋرالى, ءسىزدىڭ سول تاقىرىپتى زەرتتەۋ الا­تىنىڭىزعا سەنىم بىلدىرگەن قولداۋ-حاتى قاجەت. وسى زەرتتەۋدى شىنىمەن جۇرگىزە الا­تىنىڭىزعا كوز جەتكىزۋ ءۇشىن تاعى ەكى عالىمنىڭ كەپىلدىك رەتىندە تاعى قولداۋ-حاتى تالاپ ەتىلەدى. كوميسسيا مۇشەلەرى ءوزىڭىز بەن عىلىم جولىڭىز جايلى بەرگەن اقپاراتتى قاراپ, ەڭبەكتەرىڭىزبەن تانىسىپ, قازىرگى تاقىرىبىڭىزدىڭ وزەكتىلىگىن سارالاي كەلە شەشىم شىعارادى», دەيدى ب.نۇريمان.

تۇركيانىڭ زەرتتەۋ گرانتىن يەلەن­گەن كەيىپكەرىمىزدىڭ ايتۋىنشا, كوميسسيا مۇشەلەرىنىڭ شەشىمىنە قولداۋ-حات يەلەرىنىڭ جاۋابى دا زور ىقپال ەتەدى. ياعني كوميسسيا وكىلدەرى ارنايى الگى سەنىم بىلدىرگەن عالىمدارعا حابارلاسىپ, سۇرايدى ەكەن. شىندىققا كوز جەت­كىز­­گەننەن كەيىن عانا سەنىمنەن شىعۋعا مۇم­كىندىك بار. گرانت يەلەنسەڭىز, اي سا­يىنعى ستيپەنديا سەكىلدى ءتۇسىپ تۇرادى. ب.نۇري­مان دوكتورانت رەتىندەگى ستيپەن­ديا­سى­نا قوسا وسىنداي گرانتقا قول جەتكىزىپ, تۇرمىستىق جاعدايعا 1 جىل الاڭداماي زەرتتەۋىمەن شۇعىلداندى. ابدەن ەلەكتەن ءوتىپ, سەنىمگە يە بولىپ گرانت العاندار­دان ەشبىر ارتىق ەسەپ سۇرالمايدى ەكەن. بىراق كەيىپكەرىمىز ءوزىنىڭ العاشقى نەگىز­دەمەسىندە كورسەتكەندەي, 3 اي سايىن 2 بەت­تەن تۇراتىن توقساندىق, كەيىن 4-5 بەتتەي قو­رىتىندى جىلدىق ەسەبىن جازىپ وتكىزگەن.

جالپى, Turkiye Burslari اتتى 4 دەڭ­­گەيلى (باكالاۆريات, ماگيستراتۋرا, دوك­­تو­رانتۋرا, زەرتتەۋ) گرانت بەرىلەتىن تۇر­­­كيالىق باعدارلاماسى جايلى قازاق ­جاس­­تارى ءبىرشاما حاباردار بولىپ قال­عان­­­داي. سەبەبى وسى باعدارلامامەن قازاق­ستاننان تۇركياعا اتتانعان جاس وتان­داس­­تارىمىزدىڭ قاتارى كوبەيىپ كە­لەدى. گرانت جىل سايىن بەرىلەدى. قۇجات قابىل­داۋ مەرزىمى ءار جىلدىڭ باسىندا, ياعني قاڭتار ايىنان باستالىپ, اقپان ايىنىڭ 20-نا دەيىن وتەدى. ءار دەڭگەيدە گرانت ۇمىتكەرلەرىنە جاس ەرەكشەلىگىنە بايلا­نىستى شەكتەۋلەر بار. ماسەلەن, 35 جاستان اسقاندار دوكتورانتۋراعا تاپسىرا المايدى. دەگەنمەن ءتىل ماسەلەسىندە قيىندىق جوق. كوپ ەل شەتەلدىك ستۋدەنتتەرگە سول ەلدىڭ مەملەكەتتىك ءتىلىن جەتكىلىكتى دەڭ­گەيدە مەڭگەرگەندە عانا گرانت بەرەدى. ال Turkiye Burslari باعدارلاماسى بويىنشا تۇركيانىڭ مەملەكەتتىك گرانتى تۇرىكشە مۇلدەم بىلمەيتىندەرگە دە بەرىلەدى. ءبىر جىل ارنايى ءتىل كۋرسىنان وتەدى.

P.S. ءبىز جەر ءجۇزىنىڭ ءار قيىرىنان ءبىلىم العان جاستارمەن تىلدەسىپ, ولاردىڭ ءوز ماقساتىنا قالاي قول جەتكىزگەنىن جازۋعا تىرىستىق. گرانتپەن, ستيپەنديامەن, اقىلى, ستيپەندياسىز بولسا دا تەگىن وقۋدىڭ مۇمكىندىكتەرىن, سونداي-اق فورمالدى وقۋمەن عانا شەكتەلمەي, ومىرلىك ماڭىزى زور فورمالدى ەمەس وقۋدىڭ جولدارىن كەيىپكەرلەر ارقىلى ۇسىندىق. قازىرگى ءبىلىم قۋعان جاستار ءبىز بىلمەيتىن باعدارلامالاردى بىلەتىن دە بولار. ەگەر ءسىز حالىقارالىق ءبىلىمدى ءوز بەتىنشە العانداردىڭ قاتارىندا بولساڭىز, رەداكتسيامىزعا وقۋعا ءتۇسۋ تاريحىڭىزدى جازىپ جىبەرىڭىز. بۇل وزىڭىزدەي قانشاما جاستىڭ ءۇمىت شىراعىن جاعۋى مۇمكىن.