«رۋحاني جاڭعىرۋ» قازاقستاندىق قوعامدىق دامۋ ينستيتۋتى» كەاق باسقارما توراعاسىنىڭ بۇيرىعىمەن پرەزيدەنتتىك جاستار كادرلىق رەزەرۆىنىڭ مۇشەسى ازيز ەرجان ۇلى ىسقاقوۆ «جاستار» عىلىمي-زەرتتەۋ ورتالىعى» جشس ديرەكتورى قىزمەتىنە تاعايىندالدى, دەپ حابارلايدى Egemen.kz.
ازيز ىسقاقوۆ «اقپاراتتىق جۇيەلەر» ماماندىعى بويىنشا سەرىكباەۆ اتىنداعى شىعىس قازاقستان مەملەكەتتىك تەحنيكالىق ۋنيۆەرسيتەتىندە, «ەكونوميكا» ماماندىعى بويىنشا نارحوز ۋنيۆەرسيتەتىندە جانە «جوبالار مەن باعدارلامالاردى باسقارۋ» ماماندىعى بويىنشا ورال مەملەكەتتىك ەكونوميكالىق ۋنيۆەرسيتەتىندە جوعارى ءبىلىم العان.
بۇعان دەيىن Qazaqstan Institute of Social Studies-ءتىڭ اتقارۋشى ديرەكتورى قىزمەتىن اتقارعان. سونداي-اق, ول Toraighyrov University جانە پاۆلودار پەداگوگيكالىق ۋنيۆەرسيتەتى ديرەكتورلار كەڭەسىنىڭ مۇشەسى بولعان.
ەكونوميكالىق زەرتتەۋلەر ينستيتۋتىندا, ەۋرازيالىق ينتەگراتسيا ينستيتۋتىندا, «زەردە» حولدينگىندە جانە قازاقستان رەسپۋبليكاسى يندۋستريا جانە ينفراقۇرىلىمدىق دامۋ مينيسترلىگىندە ءتۇرلى تالدامالىق جانە باسشىلىق لاۋازىمدا جۇمىس ىستەگەن.
«قازاقمىس» كورپوراتسياسىنىڭ جانە قازاقستان تەڭگە سارايىنىڭ بولىمشەلەرىندە وندىرىستىك جانە اكىمشىلىك لاۋازىمداردى اتقارعان.
ءار جىلدارى ەۋروپالىق قايتا قۇرۋ جانە دامۋ بانكىنىڭ, «اتامەكەن» ۇلتتىق كاسىپكەرلەر پالاتاسىنىڭ جانە باسقا دا قازاقستاندىق جانە حالىقارالىق ۇيىمداردىڭ جوبالارىندا كەڭەسشى, ۇلتتىق ساراپشى بولعان.