كەنشىلەر استاناسىنداعى اباي اتىنداعى بالالار كىتاپحاناسىنىڭ قورىندا جالپى سانى 138 628 كىتاپ بار ەكەن. جۋىردا حالىقارالىق كىتاپ سىيلاۋ كۇنىندە اتالعان مەكەمەنىڭ سورەسى 27 جاڭا تۋىندىمەن تولىقتى.
سىيعا تارتىلعان ەڭبەكتەردىڭ اراسىندا قازداۋىستى قازىبەك ءبيدىڭ ومىرىنەن سىر شەرتەتىن «عاسىرلار دانالىعى – بابالار مۇراسىندا» كىتاپ-فوتوالبومى, قازاقستاننىڭ جاس سۋرەتشىلەرىنىڭ «تاريحىم – بۇگىنىم, ەرتەڭىم!» ءتۇرلى ءتۇستى سۋرەتتەر جيناعى مەن ەلەنا كلەپيكوۆانىڭ قازاق جانە ورىس تىلدەرىندە جارىق كورگەن «جەتىسۋدىڭ ەرتەگىلەرى» اتتى كىتاپتارى بار.
بۇل ەڭبەكتەردى كىتاپحاناعا وبلىس ورتالىعىنداعى «سارىجايلاۋ» كينوتەاترى مەن BAURZHAN foundation جەكە قورى تارتۋ ەتكەن.
اتالعان كىتاپحانانىڭ يننوۆاتسيالىق جانە ادىستەمەلىك جۇمىس ءبولىمىنىڭ باسشىسى ساۋلە ءجۇسىپوۆا مەكەمەنىڭ دە مەرەكەگە وراي جومارت تارتۋ جاساعانىن ايتادى. مىسالى, كىتاپحانا قالاداعى اباي اتىنداعى مەكتەپ-گيمنازياعا, تۇراقتى وقىرماندارىنا 20 كىتاپ جانە بىرنەشە دانا جۋرنال سىيلاعان.
جوعارىدا ايتىپ وتكەنىمىزدەي, كىتاپحانا قورىنداعى 138 628 كىتاپتىڭ 32 196-ى عانا مەملەكەتتىك تىلدە ەكەن. ال وتكەن جىلى 3 161 كىتاپ كەلىپ تۇسسە, ونىڭ 1 632-ءسى قازاق تىلىندەگى تۋىندىلار بولعان. اباي اتىنداعى بالالار كىتاپحاناسىنىڭ باسشىلىعى بولسا, ۋاقىت وتكەن سايىن مەملەكەتتىك تىلدەگى كىتاپتارعا دەگەن سۇرانىستىڭ ارتىپ كەلە جاتقانىن ايتادى.
قاراعاندى