بۇگىن قر مەملەكەتتىك حاتشىسى ەرلان قارين مەن ۇلتتىق قوعامدىق سەنىم كەڭەسىنىڭ مۇشەلەرى دەنساۋلىق ساقتاۋ ءمينيسترى اجار عينياتپەن كەزدەستى. باسقوسۋ وفلاين جانە ونلاين فورماتتا ءوتتى, دەپ حابارلايدى Egemen.kz اقوردانىڭ رەسمي سايتىنا سىلتەمە جاساپ.
اجار عينيات ءوز سوزىندە «دەنى ساۋ ۇلت» ۇلتتىق جوباسىنىڭ ىسكە اسۋىنا, وڭىرلەردەگى مەديتسينالىق نىسانداردىڭ قۇرىلىسى مەن جاڭعىرتۋىنا, امبۋلاتوريالىق دەڭگەيدەگى كونسۋلتاتيۆتىك-دياگنوستيكالىق قىزمەت كولەمىنىڭ ۇلعايۋىنا, مەديتسينا سالاسىنا قاجەتتى مامانداردى دايارلاۋ مەن ولاردىڭ جالاقىسىن كوتەرۋ ماسەلەسىنە توقتالدى.
مينيستر ەلىمىزدەگى اۋىل تۇرعىندارى مەن بالالاردىڭ پروفيلاكتيكالىق تەكسەرۋدەن وتۋىنە قاتىستى تىزبەسىن ارتتىرۋ ماڭىزدى ەكەنىن اتاپ ءوتتى. سونداي-اق, ا.عينيات كوروناۆيرۋس دەرتىنە قاتىستى بولجامىمەن ءبولىسىپ, رەۆاكتسيناتسيا كامپانياسىن ىسكە اسىرۋ ماسەلەسى جونىندە ءسوز قوزعادى.
سودان سوڭ كەزدەسۋ سۇراق-جاۋاپ فورماتىندا جالعاستى. اتاپ ايتقاندا ۇقسك-ءنىڭ مۇشەلەرى مۇرات ابەنوۆ, قايسار تۇرسىنقوجا, ايگۇل ورىنبەك, تاتتىگۇل تالاەۆا, ءلاززات قوجاحمەتوۆا, تالعات قاليەۆ, ءبورىحان نۇرمۇحامەدوۆ, قانات ساحاريانوۆ, يسلامبەك سالجانوۆ, ەلدار جۇماعازيەۆ, بانۋ نۇرعازيەۆا, قايىربەك ارىستانبەكوۆ, جەمىس تۇرماعامبەتوۆا جانە مارات شيبۇتوۆ وزدەرىنىڭ ساۋالدارىن قويىپ, ۇسىنىستارىن ورتاعا سالدى.
جيىن قورىتىندىسى بويىنشا قوعام بەلسەندىلەرى مەن ۆەدومستۆو باسشىلىعى كەزدەسۋدە قوزعالعان پروبلەمالار بويىنشا الداعى ۋاقىتتا بىرلەسە جۇمىس ىستەۋگە ۋاعدالاستى.