وزگەنىڭ كوشىنەن قالىپ كەتپەۋ ءۇشىن وزگەرىسكە دايىن بولۋ – زامان تالابى. ەلىمىزدە سوڭعى ۋاقىتتا بولىپ جاتقان جاعدايلار تەك مەملەكەتتىك ورگاندار عانا ەمەس, پارتيالاردان دا, جەكەلەگەن تۇلعالاردان دا وزگەرىسكە بەيىمدەلىپ قانا قويماي, سول ءۇردىستىڭ ءبىر بولشەگى بولۋدى تالاپ ەتەدى.
كەشەگى وتكەن Nur Otan پارتياسىنىڭ سەزى دە سونىڭ ايقىن دالەلى. جيىن بارىسىندا مەملەكەت باسشىسى, پارتيا توراعاسى قاسىم-جومارت كەمەل ۇلى ايتىپ وتكەندەي, ەلىمىزدىڭ ورتالىق ازيادا كوشباسشى مەملەكەت رەتىندە قالىپتاسۋىنا بارىنشا ىقپال ەتكەن پارتيامىزدىڭ جاڭا قازاقستاندى قۇرۋداعى ءرولى ايقىندالدى.
وسى ۋاقىتقا دەيىن كوشباسشى بولىپ كەلگەن Nur Otan پارتياسى اتاۋىنىڭ «امانات» بولىپ وزگەرۋى دە جاقسىلىقتىڭ نىشانى بولماق. سەبەبى پارتيا توراعاسى ءبىزدىڭ تىكەلەي مىندەتىمىزدى ەسىمىزگە سالدى. ول – حالىق الدىندا بەرگەن ۋادەنى ورىنداۋ.
اتا-بابا اماناتىن ساقتاپ, ونى كەلەر ۇرپاققا ناسيحاتتاۋعا مىندەتتى بولساق, حالىقتىڭ پارتياعا ارتقان سەنىمىن دە ءدال سولاي امانات دەپ قابىلداپ, سايلاۋالدى باعدارلامامىزدا كورىنىس تاپقان بارلىق مىندەتتەرىمىزدى ورىنداۋ, حالىقتىڭ ءال-اۋقاتىن جاقسارتۋدى تەك ادەمى سوزدەرمەن, ينفوگرافيكالارمەن, بەينەروليكتەرمەن ناسيحاتتاماي, ءىس جۇزىندە ناتيجەگە قول جەتكىزىپ, سايلاۋشىلارىمىزعا پايدالى بولۋ جاۋاپكەرشىلىگى جۇكتەلدى.
ودان بولەك سەزد بارىسىندا Jas Otan-نىڭ, جاس دەپۋتاتتار كورپۋسىنىڭ اتىنان وسى ۋاقىتقا دەيىن شەشىلمەي كەلە جاتقان جاستارعا قاتىستى ماسەلەلەر كوتەرىلدى. «مەملەكەتتiك جاستار ساياساتى تۋرالى» زاڭنىڭ كۇشى مەن ارەكەت ەتۋ اۋقىمىنىڭ تار ەكەنى بۇرىننان ءمالىم. الايدا جاستاردىڭ تاراپىنان بۇل ماسەلەنى شەشۋگە قاتىستى ۇسىنىستار ەسكەرىلمەي جاتقانى دا داۋسىز.
كەزەكتەن تىس سەزد بارىسىندا ايتىلعان پروبلەمالار وڭ شەشىمىن تابادى دەپ سەنەمىز. سەبەبى جاھاندانۋ جاعدايىندا جاستارىمىزدىڭ دامىپ جەتىلۋىنە, ۋاقىتىن دۇرىس ۇيىمداستىرىپ, الەۋەتىن دۇرىس جولعا باعىتتاماساق, ولاردى جوعالتىپ الۋىمىز ابدەن مۇمكىن. ال وزگەرىستەر كەزەڭىندە جاڭا كادرلار, ەلىمىزدىڭ ەرتەڭىن سەنىپ تاپسىرا الاتىن كوشباسشىلاردى تاربيەلەۋ ەرەكشە ماڭىزعا يە.
نۇرجان جەتپىسباەۆ,
Jas Otan جاستار قاناتىنىڭ توراعاسى