ناۋرىزدا اۋا رايى قانداي بولادى؟

كوكتەمدە تسيكلوندار مەن انتيتسيكلوندار ءجيى وزگەرىپ, قارا جانە جەرورتا تەڭىزدەرى اۋدانىنان كەلەتىن جىلى اعىمدار, سكانديناۆيا, باتىس جانە شىعىس ءسىبىر ايماقتارىنان كەلەتىن سۋىق اعىمدار اۋا تەمپەراتۋراسىنىڭ كۇرت وزگەرىپ, تۇراقسىز بولۋىنا اسەر ەتەدى.

ماماندار مالىمەتىنشە, ءناۋرىزدىڭ بىرىنشى ونكۇندىگى باستالعاندا باتىس جانە ءسىبىر انتيتسيكلونى اسەرىنەن رەسپۋبليكانىڭ باسىم بولىگىندە اۋا تەمپەراتۋراسى تومەندەيدى.

«اۋا تەمپەراتۋراسى تۇندە تومەندەيدى: باتىستا, سولتۇستىك-باتىستا -5... -15 گرادۋسقا دەيىن; سولتۇستىك, ورتالىق جانە شىعىستا -15... -25 گرادۋسقا دەيىن, ەلدىڭ وڭتۇستىك ايماقتارىندا -3... -11 گرادۋسقا دەيىن. ەلدىڭ سولتۇستىك-باتىسىندا كۇندىزگى اۋا تەمپەراتۋراسى -3... +2 گرادۋس, قازاقستاننىڭ سولتۇستىك جارتىسىندا -3... -8 گرادۋس, وڭتۇستىك جارتىسىندا +8... + 15 گرادۋس, وڭتۇستىكتە +20 گرادۋسقا دەيىن», دەلىنگەن حابارلامادا.

ناۋرىزدىڭ ءبىرىنشى ونكۇندىگى ورتاسىندا اۋا رايى جىلى بولادى. ناۋرىزدا ەلىمىزدىڭ باسىم بولىگىندە اۋانىڭ ورتاشا ايلىق تەمپەراتۋراسى كليماتتىق نورمادان 1-2 گرادۋسقا جوعارى, ال باتىس قازاقستان وبلىسىندا جانە اتىراۋ وبلىسىنىڭ سولتۇستىك-باتىسىندا نورمادان جوعارى بولادى دەپ كۇتىلەدى.

«ناۋرىزداعى جاۋىن-شاشىن مولشەرى رەسپۋبليكا اۋماعىنىڭ باسىم بولىگىندە نورماعا جاقىن, قازاقستاننىڭ سولتۇستىك-باتىس بولىگىندە نورمادان كوپ بولادى دەپ كۇتىلەدى», دەدى سينوپتيكتەر.

سونداي-اق, ونكۇندىك ورتاسىندا جەرورتا تەڭىزى اۋداندارىنان كەلگەن تسيكلوندار قازاقستان اۋماعىنىڭ باسىم بولىگىندە اۋا رايىنا اسەر ەتەدى. جاۋىن-شاشىن بولىپ, سولتۇستىك وبلىستاردا جاڭبىر كەي جەرلەردە قار جاۋادى, وڭتۇستىك وبلىستاردا جاڭبىر جاۋادى, باتىستا, تاۋلى جانە تاۋ ەتەگىندەگى اۋدانداردا قاتتى جاۋىن-شاشىن بولادى.

«جەل ەكپىنى سەكۋندىنا 15-25 مەترگە دەيىن كۇشەيەدى, وڭتۇستىك-باتىستا قۇمدى داۋىل سوعادى دەپ كۇتىلەدى. تۇمان مەن كوكتايعاق قۇبىلىستارى دا بولادى. سۋىق تولقىننان كەيىن اۋا تەمپەراتۋراسىنىڭ قىسقا مەرزىمگە جوعارىلاۋى كۇتىلەدى», دەپ قوستى ساراپشىلار.

ونكۇندىك سوڭىندا باتىس انتيتسيكلون ىعىسىپ, جاۋىن-شاشىن توقتايدى جانە اۋا تەمپەراتۋراسى قايتادان تومەندەيدى دەپ كۇتىلەدى: ەلدىڭ سولتۇستىك جارتىسىندا تۇندە -10... -17 گرادۋس, كۇندىز -5... -10 گرادۋس, وڭتۇستىك جارتىسىندا تۇندە 0... -8 گرادۋس, كۇندىز +3... +8 گرادۋسقا دەيىن.

ايدىڭ ەكىنشى جانە ءۇشىنشى ونكۇندىكتەرىندە جاۋىن-شاشىن (جاڭبىر, قار), جەل بولىپ, ەلدىڭ سولتۇستىك, ورتالىق جانە شىعىس وڭىرلەرىندە اۋا رايىنىڭ تۇراقسىز سيپاتى كۇتىلەدى. بۇل اتموسفەرالىق فرونتال بولىكتەردىڭ ءجيى وتۋىنە بايلانىستى. قازاقستاننىڭ باسىم بولىگىندە تۇمان, كوكتايعاق كۇتىلەدى. اۋا تەمپەراتۋراسى تۇراقسىز بولادى.