ل.تولستوي اتىنداعى وبلىستىق كىتاپحانادا «دوستىعى جاراسقان ەل – قازاقستان» دەپ اتالاتىن حالىق ونەرىنىڭ كورمەسى اشىلدى. كورمە قولونەر جانە كىتاپ قورى اتتى ەكى بولىمنەن تۇرادى.
شارانىڭ اشىلۋ راسىمىندە سويلەگەندەر حالىقتىق مۇرانىڭ ساقتالۋ ماسەلەسى توڭىرەگىندە وي قوزعاپ, جاستاردىڭ مادەني ءبىلىمىن جەتىلدىرۋدىڭ ماڭىزىنا توقتالدى.
– بىلتىر مەملەكەت باسشىسى 2022 جىل تمد ەلدەرىنىڭ مادەني مۇراسى مەن حالىق ونەرى جىلى بولادى دەگەنى ەستەرىڭىزدە بولار. قازاقستاننىڭ, جالپى تمد ەلدەرىنىڭ تاريحىندا حالىقتىق ونەردىڭ ورنى ەرەكشە. قازىرگى تەحنولوگيا دامىعان زاماندا, اسىرەسە جاستار جاعى حالىقتىق ونەردىڭ قاينار كوزدەرىنەن سۋسىنداپ ءوسۋى كەرەك, – دەدى ا.بايتۇرسىن ۇلى اتىنداعى قوۋ پروفەسسورى دميتري لەگكي.
كورمەگە قوستاناي وڭىرىندە ءومىر ءسۇرىپ جاتقان 17 ەتنوستىڭ مادەنيەتى مەن ونەر تاريحىنان كەڭ ماعلۇمات بەرەتىن قۇندى كىتاپتار قويىلعان. ولاردىڭ ءبىرازى قوستانايلىق قالامگەر سۆەتلانا پەتروۆانىڭ جەكە كىتاپحاناسىنان اكەلىنىپتى.
– مەن جەكە كوللەكتسيامنان الىنعان كىتاپتاردىڭ ىشىندەگى ەڭ قۇندىسى – 1975 جىلى جارىق كورگەن «قىز جىبەك» جىرى. بۇل – ماڭگىلىك ماحاببات داستانى. ودان كەيىنگى كىتابىم حالىقتار دوستىعىن دارىپتەيدى. بۇل تاقىرىپ بۇگىنگى تاڭداعى ەڭ وزەكتى تاقىرىپ دەپ سانايمىن, – دەدى كىتاپتاردىڭ يەسى.
اتالعان كورمە جىل سوڭىنا دەيىن جۇمىس ىستەيتىن بولادى. كىتاپحانا ۇجىمى جازعا قاراي دوستىق كورمەسىنىڭ كوشپەلى ءتۇرىن ۇيىمداستىرىپ, وبلىس اۋداندارىن ارالاپ شىعۋدى جوسپارلاپ وتىر.
قوستاناي