قازاقستاندا ناۋرىزدىڭ بىرىنەن باستاپ ۇلتتىق ۇلانعا اسكەر قابىلداۋ جۇمىسى باستالادى. بۇل تۋرالى وكق الاڭىندا ەلىمىزدىڭ قارۋلى كۇشتەرى باس شتابى ۇيىمداستىرۋ-جۇمىلدىرۋ جۇمىستارى دەپارتامەنتىنىڭ باستىعى ءجۇسىپوۆ ساكەن ساۋىتباي ۇلى ءمالىم ەتتى, دەپ حابارلايدى Egemen.kz.
«وسى جىلعى 1 ناۋرىزدان باستاپ جەرگىلىكتى اتقارۋشى ورگانداردىڭ اسكەرگە شاقىرۋ پۋنكتەرىندە اكىمدەردىڭ ورىنباسارلارىنىڭ توراعالىق ەتۋىمەن قالالىق جانە اۋداندىق شاقىرۋ كوميسسيالارى جۇمىسىن باستايدى. 1 شىلدەگە دەيىن قارۋلى كۇشتەردىڭ, ۇلتتىق قاۋىپسىزدىك كوميتەتى شەكارا قىزمەتىنىڭ جانە ۇلتتىق ۇلاننىڭ قاتارىن 17 مىڭنان استام اسكەرگە شاقىرۋشى تولىقتىرادى. قولدانىستاعى زاڭعا سايكەس, اسكەرگە شاقىرۋدى كەيىنگە قالدىرۋعا نەمەسە ودان بوساۋعا نەگىز جوق 18-27 جاسقا دەيىنگى قر ازاماتتارى مەرزىمدى اسكەري قىزمەتكە شاقىرىلۋعا جاتادى», دەدى دەپارتامەنت باستىعى.
ازاماتتاردى اسكەرگە شاقىرتۋ ەلەكتروندى ۇكىمەت پورتالى جانە سمس حابارلامالار ارقىلى جۇزەگە اسىرىلادى.
«2021 جىلعى كوكتەمگى اسكەرگە شاقىرۋدان باستاپ, اسكەرگە شاقىرۋدى كەيىنگە قالدىرۋ نەمەسە ودان بوساتۋ مەملەكەتتىك كورسەتىلەتىن قىزمەتتەر بولىپ سانالادى. ولار ازاماتتارعا ەلەكتروندى ۇكىمەت پورتالى ارقىلى كورسەتىلەدى. اتالعان قىزمەتتەردى كورسەتۋگە جەرگىلىكتى اتقارۋشى ورگاندار جاۋاپتى. اسكەرگە شاقىرۋشىلاردى حاباردار ەتىپ, سمس حابارلامالار تاراتۋ, سونداي-اق, ءۇي جانە قىزمەتتىك مەكەنجايلارى بويىنشا جەكە شاقىرۋ قاعازدارىن جىبەرۋ ارقىلى جۇزەگە اسادى», دەدى ساكەن ساۋىتباي ۇلى.