كۇنى كەشە ۇكىمەت ۋتيل الىمىنىڭ جاڭا مولشەرىن جاريالاپ, ول نەبارى 50%-عا تومەندەدى. ءبىز بۇعان كەلىسپەيمىز. مەملەكەت باسشىسى قاسىم-جومارت توقاەۆ قاڭتارداعى وقيعادان كەيىن حالىققا دەگەن قيانات وليگوپوليانىڭ كەسىرىنەن بولعانىن, حالىقتى ءتۇتىپ جەپ جاتقان وسى وليگارحتار ەكەنىن ايتقان بولاتىن. سوندىقتان ۇكىمەتكە ءتيىستى تاپسىرما بەرگەن ەدى. الايدا پرەزيدەنت تاپسىرماسى جارتىلاي عانا ورىندالىپ جاتىر.
«وكم وپەراتور» جشس ۇلكەن جەمقورلىق سحەماسىنىڭ ءبىر عانا بولشەگى ەدى. ونىڭ قىزمەتى «جاسىل دامۋ» اق-عا بەرىلگەنىمەن, جەمقورلىق سحەماسى جويىلعان جوق. بۇرىنعى قالىپتا «قىزمەت ەتە بەرەتىن» سەكىلدى.
ۇكىمەت پەن يندۋستريا جانە ينفراقۇرىلىمدىق دامۋ مينيسترلىگى ەڭ الدىمەن ەلىمىزدەگى اۆتوكولىك قۇراستىرۋ سالاسىن قولداۋعا مۇددەلى. ال ەلىمىزدەگى ەكولوگيالىق كودەكستە ۋتيل الىمىنىڭ قاعيداسى انىق جازىلعان. ۋتيل الىمى دەگەنىڭىز – ناقتى كادەگە جاراتۋ ءۇشىن جاسالاتىن تولەم. ءبىز ءبىر نارسەنى تۇسىنبەيمىز, قازاقستاندىقتار جەكە ءاۆتووندىرىستى قولداۋ ءۇشىن نەگە قوماقتى قاراجات تولەۋگە ءتيىس؟ ءتىپتى بۇل وتاندىق ءاۆتووندىرىس تە ەمەس. لوكاليزاتسيا دا جوق. ءبىز ونى كوپتەن بەرى ايتىپ ءجۇرمىز. تيىسىنشە, ەلىمىزدە قۇراستىرىلاتىن قاي اۆتوكولىكتىڭ بولسىن قوسالقى بولشەگى جاسالمايدى. بارلىعى شەتەلدەن ساتىپ الىنادى. ياعني ءسىز بەن ءبىز ۋتيل الىمىنا تولەپ جۇرگەن قاراجاتتىڭ ءبىر بولىگى شەتەل اسىپ جاتىر.
سوندىقتان ءبىز وتاندىق ءاۆتووندىرىستى ەمەس, شەتەلدىك وندىرۋشىلەردى قولداپ ءجۇرمىز. مۇنى ادىلدىك دەپ ايتۋعا كەلمەيدى. بۇل رەتتە ءبىز ەكولوگيالىق كودەكسكە بىرقاتار وزگەرىس ەنگىزۋدى تالاپ ەتەمىز.
نەلىكتەن «جاسىل دامۋ» اق-عا شەكتەۋسىز قۇقىق بەرىلىپ, ولار ءوز كەزەگىندە جەكە ءاۆتووندىرىستى قولداپ وتىر؟ ەندەشە, ۇكىمەت حالىققا ۋتيل الىمىن تولەۋگە مىندەتتى ەكەنىن اشىق ايتسىن. قيتۇرقى ارەكەتتى ۋتيل الىمىنا جاسىرۋدىڭ قاجەتى جوق. نەمەسە جەڭىل كولىككە ۋتيل الىمىن 100 مىڭ تەڭگە مولشەرىندە ەتىپ, سوسىن تاعى جەكە ءاۆتووندىرىستى قولداۋعا قاراجات تولەۋدى مىندەتتەسىن. تۇسىنىكسىز, ءمانسىز ءھام ماعىناسىز شىعىندى تولەۋگە قازاقستاندىقتاردى قالاي مىندەتتەيتىندەرىن كورگىم كەلەدى.
سانجار بوقاەۆ,
ساياساتتانۋشى