بۇگىن حالىقارالىق تۇركى اكادەمياسى مەن قازاقستان حالقى اسسامبلەياسىنىڭ ۇيىمداستىرۋىمەن «حالىقتاردىڭ قازاقستانعا جەر اۋدارىلۋىنىڭ نەگىزگى سەبەپتەرى, كەزەڭدەرى جانە سالدارى: تاريحي تۇسىنىك تاجىريبەسى» اتتى حالىقارالىق عىلىمي-پراكتيكالىق كونفەرەنتسياسى ءوتتى, دەپ حابارلايدى Egemen.kz.
القالى جيىننىڭ اشىلۋى سالتاناتىنا تۇركى مەملەكەتتەر ۇيىمىنىڭ باس حاتشىسى باعدات امىرەەۆ, قازاقستان حالقى اسسامبلەياسى توراعاسىنىڭ ورىنباسارى - قازاقستان رەسپۋبليكاسى پرەزيدەنتى اكىمشىلىگىنىڭ قازاقستان حالقى اسسامبلەياسى حاتشىلىعىنىڭ مەڭگەرۋشىسى مارات ازيلحانوۆ, حالىقارالىق تۇركى اكادەمياسىنىڭ پرەزيدەنتى - «ەگەمەن قازاقستان» رگ» اق باسقارما توراعاسى دارحان قىدىرالى, ازەربايجان رەسپۋبليكاسى ميللي مەدجيليسىنىڭ توراعاسىنىڭ ورىنباسارى, ازەربايجان-قازاقستان پارلامەنتارالىق بايلانىس جونىندەگى جۇمىس توبىنىڭ جەتەكشىسى اديل اليەۆ, ش.ءۋاليحانوۆ اتىنداعى تاريح جانە ەتنولوگيا ينستيتۋتىنىڭ ديرەكتورى زيابەك قابىلدينوۆ, گرۋزيا پارلامەنتىنىڭ دەپۋتاتى, قازاقستان-گرۋزيا پارلامەنتارالىق بايلانىستار جونىندەگى جۇمىس توبىنىڭ جەتەكشىسى تاريەل ناكايدزە, سونداي-اق باۋىرلاس ەلدەردىڭ كورنەكتى مەملەكەت جانە قوعام قايراتكەرلەرى, دەپۋتتار مەن بەلگىلى قوعام بەلسەندىلەرى, دياسپورا وكىلدەرى مەن عالىمدار قاتىستى.
ءىس-شاراعا قازاقستان رەسپۋبليكاسى اقپارات جانە قوعامدىق دامۋ مينيسترلىگى «قوعامدىق كەلىسىم» رەسپۋبليكالىق مەملەكەتتىك مەكەمەسىنىڭ ديرەكتورى عالىمجان قۇسمانعالي مودەراتورلىق ەتتى.
جيىندا وتكەن عاسىردا رەپرەسسيا مەن حالىقتاردى جەر اۋدارۋ ساياساتى سالدارىنان باۋىرلاس حالىقتاردىڭ باسىنا تۇسكەن ناۋبەت جىلدار تۋرالى ءسوز قوزعالدى.
كونفەرەنتسيا قاتىسۋشىلارى تۇركى اكادەمياسى مەن قازاقستان حالقى اسسامبلەياسى بىرلەسىپ اتقارعان ورتاق جۇمىستارىنا ەرەكشە قىزىعۋشىلىق ءبىلدىردى.
«تاۋەلسىزدىكتىڭ العاشقى جىلدارى قۇرىلعان قازاقستان حالقى اسسامبلەياسىنىڭ وكىلدەرى قازاقستاندى تۇراقتىلىق پەن تاتۋلىقتىڭ, تۇسىنىستىك پەن كەلىسىمنىڭ ارالىنا اينالۋىنا ءوز ۇلەستەرىن قوسىپ, تۇركى الەمىنىڭ دە دامۋىنا زور ىقپال ەتىپ كەلەدى. ال تۇركى اكادەمياسى قازاقستان حالقى اسسامبلەياسىمەن بىرلەسىپ, تاعدىرلاس, باۋىرلاس حالىقتاردىڭ بايلانىستارىن بەكەمدەپ, رۋحاني ىنتىماقتاستىعىن ارتتىرۋ باعىتىندا بىرقاتار جوبالاردى جۇزەگە اسىردى», دەدى دارحان قىدىرالى ءوز سوزىندە.