قر تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى باعدات مۋسين پرەزيدەنتتىك جاستار كادر رەزەرۆىنىڭ وكىلدەرىمەن كەزدەستى, دەپ حابارلايدى Egemen.kz.
باعدات ءمۋسيننىڭ ايتۋىنشا, پرەزيدەنتتىڭ كادرلىق رەزەرۆ جاساقتاۋ تۋرالى باستاماسى - مىقتى مەملەكەت قالىپتاستىرۋ جولىنداعى ماڭىزدى قادامداردىڭ ءبىرى.
«بارشامىز «جاڭا قازاقستان» دەپ جاتىرمىز. سول «جاڭا قازاقستاندى» قۇرۋعا قانداي سەپتىگىمدى تيگىزە الامىن دەپ ويلانۋ كەرەك. «سەن دە ءبىر كىرپىش دۇنيەگە, كەتىگىن تاپ تا بار قالان» دەپ اباي اتامىز ايتقانداي. بۇل ءۇشىن وزدەرىڭىز دە ىنتالى بولۋ كەرەكسىزدەر. كادرلىق رەزەرۆ - جاس ءارى ىنتالى ماماندار ءۇشىن كەرەمەت مۇمكىندىك. ءارى قاراي قالاي جۇمىس ىستەيسىزدەر, قاي باعىتتا ات سالىساسىزدار - وزدەرىڭىزگە بايلانىستى. ەڭ باستىسى, ماقساتتى ايقىنداپ, جاۋاپكەرشىلىكتى سەزىنۋ قاجەت», دەدى مينيستر.
سونداي-اق, باعدات مۋسين ءبىرىنشى قۇرامداعى رەزەرۆيستەرمەن ءتسدياوم-دە قانداي جۇمىستار اتقارىلىپ جاتقاندىعىن بايانداپ بەردى. ولارعا باسقارما باسشىسى, دەپارتامەنت ديرەكتورى جانە ديرەكتوردىڭ ورىنباسارى, ايماقارالىق ينسپەكتسيا باسشىسى ۆاكانتتىق لاۋازىمدارى ۇسىنىلعان بولاتىن.
قازىرگى ۋاقىتتا ءتسدياوم مەن سوعان قاراستى ۇيىمداردا پرەزيدەنتتىك جاستار كادرلىق رەزەرۆىنىڭ 14 مۇشەسى جۇمىس ىستەپ ءجۇر. ونىڭ ۇستىنە 2022 جىلعى ىرىكتەۋ ناتيجەسى بويىنشا ءتسدياوم قاراستى ۇيىمداردىڭ 2 قىزمەتكەرى پرەزيدەنتتىك جاستار كادرلىق رەزەرۆىنە ەندى.