«اتامان» امەريكادا ايقاسادى

37 جاستاعى ريو-دە-جانەيرو شتاتىنا قاراستى نيتەروي قالاسىنىڭ تۋما­سى تاي-بوكسى مەن دجيۋ-دجيتسۋدى جاقسى مەڭگەرگەن. دوس ءانوستىڭ ارالاس جەكپە-جەكتەن ءتۇرلى جارىستارعا ءتۇسىپ جۇرگەنىنە 20 جىلعى جۋىقتاپ قالدى. سول ارالىقتا رافاەل 43 كەزدەسۋ وتكىزىپ, 30 رەت جەڭىسكە جەتتى. سول باسەكەلەرىنىڭ تەڭ جارتىسىن مەرزىمىنەن بۇرىن اياقتادى. 2015 جىلدىڭ كوكتەمىندە ەنتوني پەتتيستى ۇتىپ, جەڭىل سالماقتا چەمپيوندىق بەلبەۋدى يەلەندى. سول جىلدىڭ سوڭىندا دونالد سەررونە ۇرىپ جىعىپ, ءوز اتاعىن قورعاپ قالدى. بىراق كوپ ۇزاماي ەددي الۆارەسكە ەسە جىبەرىپ, التىن بەلبەۋدەن ايىرىلدى.

كەزىندە برازيليالىق سپورتشى دجەيسون حاي, بەنسون حەندەرسون, نەيت دياس, نيل مەگني, روببي لوۋرەل, كەۆين لي جانە پول فەلدەر سىندى ساڭلاقتاردى سان سوقتىردى. 2014 جىلدىڭ 19 ساۋىرىندە رافاەلدىڭ حابيب نۋرماگومەدوۆتەن ويسىراي ۇتىلعانى دا ەسىمىزدە. سونداي-اق ول لەون ەدۆارس, كولبي كوۆينگتون جانە كامارۋ ۋسمان سەكىلدى اتاقتارى الىسقا جايىلعان اپايتوستەردەن تاياق جەدى.

28 جاستاعى رافاەل فيزيەۆ جام­بىل وبلىسىنىڭ قورداي اۋدانىندا دۇنيەگە كەلدى. كەيىننەن قىرعىزستانعا قونىس اۋداردى. سپورتتاعى مانسابىن مۋاي-تايدان باستاعان ول بىرتە-بىرتە جا­ۋىنگەرلىك سامبو, دجيۋ-دجيتسۋ, بوكس جانە گرەپپلينگتى مەڭگەردى. 2015 جىل­دان بەرى ارالاس جەكپە-جەككە دەن قويدى. العاشقى التى كەزدەسۋىن جەڭىس­پەن اياقتادى. سونىڭ بىرىندە ول قازاق سپورتشىسى نۇرجان تۇتقاەۆتى تىزە بۇكتىردى. ءدال سول جەكپە-جەكتەن كەيىن فيزيەۆ UFC-دە ونەر كورسەتە باستادى. تۇساۋكەسەر كەزدەسۋىندە قىرعىزستاندىق فايتەر رەسەيدىڭ وكىلى ماگومەد مۋستافاەۆتان ۇتىلعانىمەن, ودان كەيىنگى بەس باسەكەنى ءوز پايداسىنا شەشتى. سونىڭ تورتەۋىندە جارىستىڭ ەڭ ۇزدىك جەكپە-جەگى دەپ تانىلىپ, ول ارنايى بونۋسقا يە بولدى. بارلىعى 12 رەت وكتاگونعا شىققان فيزيەۆ تەك ءبىر رەت قانا جەڭىلىس تاپتى. 11 جەڭىسىنىڭ سەگىزىندە ايقىن باسىمدىق تانىتتى. سونىڭ جەتۋىندە ول مۋاي-تايدىڭ ادىسىنە سالىپ, قارسىلاستارىن ۇرىپ نەمەسە تەۋىپ قۇلاتتى.

قازىرگى كەزدە ازەربايجاننىڭ نامىسىن قورعاپ جۇرگەن فيزيەۆ جەڭىل سالماقتىلاردىڭ UFC رەيتينگىندە 11-ورىندا تۇر. دوس انوس التىنشى ورىندى ەنشىلەۋدە. ەگەر رافاەل وسى جەكپە-جەكتە جەڭىسكە جەتسە, ءوزىنىڭ كوزدەگەن ماقساتىنا ءبىر تابان جاقىنداي تۇسەتىنى انىق. ياعني تاعى ءبىر-ەكى ءساتتى باسەكەدەن كەيىن چەمپيوندىق بەلبەۋ ءۇشىن تالاسادى. سوندىقتان دا قوردايدىڭ تۋماسى ءوز مۇمكىندىگىن قالت جىبەرمەۋگە ءتيىس.

ال بۇل سالماقتىڭ چەمپيونى برا­زيليالىق چارلز وليۆەيرا ەكەنىن ەستەرىڭىزگە سالا كەتەيىك. داڭقتى حابيب نۋرماگومەدوۆ ۇلكەن سپورتتان قول ۇزگەننەن كەيىن التىن بەلبەۋ ءۇشىن ول بىلتىرعى جەلتوقسان ايىندا امەريكالىق داستين پورەمەن ايقاسىپ, ءۇشىنشى راۋندتا ونى قىلقىندىرىپ تاستادى. سونداي-اق ۇزدىك بەستىكتىڭ قاتارىندا دجاستين گەيدجي, داستين پورە, بەنەيل داريۋش, يسلام ماحاچەۆ جانە مايكل چەندلەر سىندى دۇلۇلدەر بار. ال بۇل تىزىمدە اتاقتى توني فەرگيۋسسون جەتىنشى ورىندا تۇرسا, اتىشۋلى كونور ماكگرەگور توعىزىنشى ورىندى قاناعات تۇتۋدا.