مەملەكەت باسشىسى قاسىم-جومارت توقاەۆ ديپلوم ۇلەستىرۋمەن اينالىساتىن جوعارى وقۋ ورىندارىن جابۋدى تاپسىرعان بولا تىن. بۇل جۇمىس ءالى دە جۇرگىزىلىپ كەلەدى. سونىڭ ءبىر ناتيجەسى جاقىندا تاعى ءۇش ۋنيۆەرسيتەت جابىلدى.
ءبىلىم جانە عىلىم مينيسترلىگىنىڭ حابارلاۋىنشا, قازاقستاندىق ءۇش اۋتسايدەر (تومەن دەڭگەيلى) جوعارى وقۋ ورنى سوت شەشىمىمەن جۇمىسىن توقتاتتى. بۇل – ورتالىق ازيا ۋنيۆەرسيتەتى, اقتاۋ گۋمانيتارلىق-تەحنيكالىق ۋنيۆەرسيتەتى جانە «استانا» ۋنيۆەرسيتەتى. سوڭعى جىلدارى اتى اتالعان جوعارى وقۋ ورىندارى مينيسترلىكتىڭ تاپسىرىسى بويىنشا «اتامەكەن» ۇكپ جۇرگىزەتىن ءبىلىم بەرۋ باعدارلامالارىنىڭ رەيتينگىندە ۇنەمى تومەن پوزيتسيادان كورىندى. وسى ءۇش ۋنيۆەرسيتەتتە ءبىلىم بەرۋ باعدارلامالارىنىڭ باسىم بولىگى جۇمىس بەرۋشىلەردىڭ تالابىنا ساي كەلگەن جوق جانە ءبىلىم الۋشىلار اراسىندا دا سۇرانىسقا يە بولماعان.
ءبىلىم جانە عىلىم سالاسىنداعى ساپانى قامتاماسىز ەتۋ كوميتەتىنىڭ توراعاسى گۇلزات كوبەنوۆا: «مىسالى, ورتالىق ازيا ۋنيۆەرسيتەتى رەيتينگكە 2019 جىلى – 36, 2020 جىلى – 37, 2021 جىلى 11 ءبىلىم بەرۋ باعدارلاماسى بويىنشا قاتىستى. ياعني كوپتەگەن باعدارلاما بويىنشا تۇلەكتەردىڭ ازدىعىنا بايلانىستى ناتيجە كورسەتە المادى. جابىلعان جوعارى وقۋ ورىندارى ساپانى جاقسارتۋ باعىتىندا جۇمىس ىستەگەن جوق, ءبىلىم بەرۋ باعدارلامالارىنا ينۆەستيتسيا سالمادى, پراكتيك-مامانداردى قىزمەتكە تارتپادى. تالداۋ ناتيجەسىنە سۇيەنسەك, ءبىلىم بەرۋ باعدارلامالارى بويىنشا رەيتينگى تومەن جوعارى وقۋ ورىندارى قاۋىپتى ايماققا تۇسەتىن ۋنيۆەرسيتەتتەرمەن ءوزارا بايلانىستا بولادى. ناتيجەسىندە, اۋتسايدەر جوعارى وقۋ ورىندارى ليتسەنزياسىنان ايىرىلىپ, ءبىلىم بەرۋ قىزمەتىن توقتاتتى», دەدى.
مينيسترلىكتىڭ مالىمدەۋىنشە, «استانا» ۋنيۆەرسيتەتى مەن اقتاۋ گۋمانيتارلىق-تەحنيكالىق ۋنيۆەرسيتەتىندە ءدال جوعارىداعىداي جاعداي. بۇل جوعارى وقۋ ورىندارىنىڭ ءبىلىم بەرۋ باعدارلامالارىنىڭ 70-75%-ى ساپاسى بويىنشا تالاپتارعا جانە جۇمىس بەرۋشىلەردىڭ سۇرانىسىنا ساي بولمادى.
«سونىمەن قاتار قازىر باسقا جوعارى وقۋ ورىندارىن تەكسەرۋ ناتيجەلەرى بويىنشا سوت پروتسەستەرى ءجۇرىپ جاتىر. اكادەميك ءا.قۋاتبەكوۆ اتىنداعى حالىقتار دوستىعى ۋنيۆەرسيتەتىندە پەداگوگيكالىق جانە تەحنيكالىق باعىت بويىنشا كادر دايارلاۋ جۇمىس بەرۋشىلەردىڭ تالابىنا ساي كەلمەيدى. كادر دايارلاۋ ساپاسىن جاقسارتۋ – ماڭىزدى ماسەلە. ەگەر بۇگىن ۋنيۆەرسيتەتتەر ءتيىستى تالاپقا ساي بولماسا, وندا ەرتەڭ ءبىز ءبىلىمى مەن بىلىكتىلىگى جۇمىس بەرۋشىلەردىڭ سۇرانىسىن قاناعاتتاندىرمايتىن مامانداردى دايارلايمىز. ءبىز جوعارى وقۋ ورىندارىنا ولقىلىقتاردىڭ ورنىن تولتىرۋعا ۋاقىت بەرەمىز, الايدا ولار تۇزەتۋگە اسىقپايدى. وسىعان بايلانىستى ءبىز قاتاڭ شارا قولدانامىز. جوعارى وقۋ ورىندارى وقىتۋ جاعدايىن, ءبىلىم بەرۋ باعدارلامالارىن, سونىمەن قاتار ستۋدەنتتەردىڭ ءتۇرلى ماماندىقتى مەڭگەرۋ داعدىلارىن جاقسارتۋعا جاعداي جاساۋى ءتيىس. ولاي بولماسا, جوعارى وقۋ ورىندارى ديپلومداردى ساپالى ءبىلىم بەرمەي-اق ۇلەستىرەدى», دەپ تولىقتىردى گۇلزات كوبەنوۆا.
سوڭعى ءۇش جىلدا جۇمىس بەرۋشىلەردىڭ جوو-داعى ءبىلىم بەرۋ باعدارلامالارىنىڭ ساپاسىن باعالاۋىن تالداۋ ناتيجەسى جۇمىس بەرۋشىلەر اراسىندا مامان دايارلاۋ ساپاسىنا كوڭىلى تولاتىنىن كورسەتتى. ۋنيۆەرسيتەتتەردىڭ ءبىلىم بەرۋ باعدارلامالارىنىڭ 85%-ى جۇمىس بەرۋشىلەرمەن كەلىسىلگەن. قابىلدانعان تۇزەتۋلەرگە سايكەس, وقۋ جىلىنىڭ باسىنان باستاپ پراكتيك-ماماندار تارتىلادى.