نەمىستەردىڭ Transfermarkt پورتالى شەتەلدە ونەر كورسەتىپ جۇرگەن قازاقستاننىڭ ەڭ قۇندى فۋتبولشىلارىنىڭ رەيتينگىن جاريالادى. بۇل تىزىمدە رەسەي پرەمەر-ليگاسىنداعى ماسكەۋدىڭ تسسكا كلۋبىنىڭ نامىسىن قورعاپ جۇرگەن باحتيەر زاينۋتدينوۆ كوش باستاپ تۇر.
23 جاستاعى باحتيەر جامبىل وبلىسىنىڭ ورتالىعىندا دۇنيەگە كەلدى. ءار جىلدارى ەلىمىزدىڭ جاسوسپىرىمدەر مەن جاستار قۇراماسىندا ويناعان ول 2017 جىلى «تارازدىڭ» جەيدەسىن كيىپ, قازاقستان چەمپيوناتىنىڭ العاشقى ماۋسىمىندا پرەمەر-ليگانىڭ ەڭ ۇزدىك جاس ويىنشىسىنا تيەسىلى ارنايى سىيلىقتى يەلەندى. سول جىلى «استاناعا» اۋىسىپ, سۋپەركۋبوكتىڭ يەگەرى اتاندى. كوپ ۇزاماي جاسىل الاڭدا جاسىنداي جارقىلداعان زاينۋتدينوۆكە رەسەيدىڭ «روستوۆ» كلۋبى باپكەرلەرىنىڭ كوزى ءتۇستى. ءبىر ماۋسىمدى دونداعى روستوۆتا وتكىزگەن جارتىلاي قورعاۋشى 2020 جىلى تسسكا-مەن كەلسىمشارتقا وتىردى. قازىرگى كەزدە باحتيەر زاينۋتدينوۆ – قازاقستان ۇلتتىق قۇراماسى مەن ماسكەۋدىڭ ايگىلى اسكەريلەر كومانداسىنىڭ بەلدى ويىنشىسى. جەرلەسىمىزدىڭ ترانسفەرلىك قۇنى – 4 000 000 ەۋرو.
ەكىنشى ورىندا – الەكساندر مەركەل. 29 جاستاعى الماتىنىڭ تۋماسى كەزىندە اتا-اناسىمەن بىرگە جەتىسۋ وڭىرىنەن گەرمانياعا قونىس اۋدارعان. سپورتتتىق مانسابىن ءوزىنىڭ تاريحي وتانىندا باستاعان ول كەيىننەن يتاليا, انگليا, شۆەيتساريا, گەرمانيا, اۋستريا, نيدەرلاند جانە ساۋد ارابياسىنىڭ چەمپيوناتتارىندا باق سىنادى. 2015 جىلدان بەرى حالىقارالىق دودالاردا قازاقستاننىڭ نامىسىن قورعاۋدا. بۇل كۇندەرى مەركەل تۇركيانىڭ «گازيانتەپىندە» ويناۋدا. امپلۋاسى – جارتىلاي قورعاۋشى. الەكساندر 2 000 000 ەۋروعا باعالانىپ وتىر.
ۇزدىك ۇشتىكتى ءنۇرالى ءالىپ تۇيىندەۋدە. ول اقتاۋ قالاسىندا تۋىپ-ءوستى. بىرەر جىل الماتىنىڭ «قايراتىندا» ويناعان 22 جاستاعى قورعاۋشىنى بيىل سانكت-پەتەربۋرگتىڭ «زەنيت» كلۋبى باسشىلارى اتتاي قالاپ الدى. نەۆا جاعالاۋىنا قونىس اۋدارعان بەتتە قازاقتىڭ ۇلى شەبەرلىگىمەن كوزگە ءتۇسىپ, جولداستىق كەزدەسۋلەر بارىسىندا قارسىلاستار قاقپاسىنا ماڭىزدى گولدار سوقتى. قازىرگى كەزدە ءنۇرالىنىڭ ترانسفەرلىك قۇنى 1 700 000 ەۋرونى قۇراپ وتىر. ەگەر ول ءدال وسى بەتىنەن تايماسا, وندا الداعى ۋاقىتتا قانداسىمىزدىڭ باعاسى شارىقتاي تۇسەتىنى انىق.
سونداي-اق ەڭ قۇندى «توپ-10» فۋتبولشىنىڭ قاتارىنا مىنا ويىنشىلار ەنىپ وتىر: مارات بىستروۆ («احمات», رەسەي) – 900 مىڭ, يان ۆوروگوۆسكي («مولەنبەك», بەلگيا – 750 مىڭ, گەورگي جۋكوۆ («ۆيسلا», پولشا) – 500 مىڭ, الەكسەي ششيوتكين («روتور», رەسەي) – 400 مىڭ, اكمال باقتياروۆ («وليمپ-دولگوپرۋدنىي», رەسەي) – 200 مىڭ, ماگامەد ۋزدەنوۆ («ابدىش-اتا», قىرعىزستان) – 175 مىڭ, الەكسەي روديونوۆ («الاشكەرت», ارمەنيا» – 150 مىڭ, ارگەن جۇماتاەۆ («نەفتچي», قىرعىزستان) – 150 مىڭ جانە يريسداۆلات حاكيموۆ («العا», قىرعىزستان) – 150.