وتكەن اپتانىڭ سوڭىندا بەيجىڭدەگى قىسقى وليمپيا ويىندارىنان بولەك, تاعى بىرقاتار ماڭىزدى جارىس ءوتتى. الەمنىڭ ءار قيىرىندا جالاۋى جەلبىرەگەن ءدۇبىرلى دودالاردا قازاق ەلىنىڭ ورەندەرى دە تابىستى ونەر كورسەتىپ, ءبىراز ولجاعا كەنەلدى.
فرانتسيانىڭ مەتس قالاسىندا ۇستەل تەننيسىنەن WTT Youth Contender ءتۋرنيرى ءوز مارەسىنە جەتتى. 15 جاستاعىلار اراسىنداعى جارىستا الان قۇرمانعاليەۆ الدىنا جان سالمادى. قازاقتىڭ جاس ورەنى ۋكراينالىق انتون دەرليۋك, رۋمىنيالىق رارەس كۋەسدين, دومينيكاندىق رافاەل كابرەرا, كورەيالىق لي چونموك, پولشالىق رافال فورمەل جانە جەرگىلىكتى قوس ويىنشى – ناتان لام مەن فلاۆيەن كوتوندى قاپى قالدىرىپ, باس جۇلدەنى قانجىعاسىنا بايلادى. وكىنىشكە قاراي, 19 جاستاعىلاردىڭ باسكەسىندە سانجار جۇبانوۆ پەن تيموفەي گەراسيمەنكونىڭ جولى بولمادى. سانجار باستاپقىدا ەكى قارسىلاسىن ۇتقانىمەن, 1/32 فينالدا جەڭىلىس تاپتى. ال تيموفەي توپتىق كەزەڭدە ءسۇرىندى.
ماسكەۋدە كوركەم گيمناستيكادان ۇيىمداستىرىلعان گران-ءپريدىڭ كەزەڭدىك سايىسىندا ەلجانا تانيەۆا ۇرشىقپەن جاسالاتىن جاتتىعۋدا 32,30 ۇپاي جيناپ, كۇمىس مەدالدى يەلەندى. قازاق قىزى تەك جاستار اراسىنداعى الەمنىڭ ءۇش دۇركىن چەمپيونى, كوماندالىق ەسەپتە ەۋروپا بىرىنشىلىگىنىڭ جەڭىمپازى, رەسەيلىك لالا كرامارەنكودان عانا قالىپ قويدى. ونىڭ كورسەتكىشى – 34,25 ۇپاي. رەسەيدىڭ تاعى ءبىر جۇلدىزى, دۇنيەجۇزىلىك دودادا 18 مارتە توپ جارىپ, 10 رەت قارت قۇرلىقتىڭ تەڭدەسسىزى دەپ تانىلعان دينا اۆەرينا بۇل جولى قولا مەدالدى قاناعات تۇتتى. ەسەسىنە باسقا دا جاتتىعۋلاردا تابىسقا جەتكەن دينا كوپسايىستىڭ قورىتىندىسى بويىنشا باس جۇلدەنى ولجالادى. ەكىنشى جانە ءۇشىنشى ورىنداردى دا رەسەي گيمناسشىلارى لالا كرامارەنكو مەن ارينا اۆەرينا ەنشىلەدى.
البانيانىڭ استاناسى – تيرانادا تاەكۆوندودان ءوتىپ جاتقان پرەزيدەنت كۋبوگى جولىنداعى جارىستى جەرلەستەرىمىز ءساتتى باستادى. العاشقى كۇنى 87 كيلو سالماق دارەجەسىندە سىنعا تۇسكەن سمايىل دۇيسەباي كۇمىس مەدالدى موينىنا ءىلدى.
اقش-تا ۇيىمداستىرىلعان اتر تۋرنيرىندە پاكىستاندىق ايسام حاك كۇرەشىمەن جۇپ قۇرعان قازاقستاندىق الەكساندر نەدوۆەسوۆ اقتىق سىنعا دەيىن القىنباي جەتتى. بىراق شەشۋشى تۇستا ولار مارسەلو ارەۆالو (سالۆادور) مەن جان-جيۋلەن رويەرگە (نيدەرلاند) ەسە جىبەرىپ, ەكىنشى ورىندى يەلەندى.
تەننيستەن قاتاردىڭ باس شاھارى – دوحادا شىمىلدىعى تۇرىلگەن WTA ءتۋرنيرىنىڭ العاشقى اينالىمىندا يۋليا پۋتينتسەۆا الەمنىڭ بۇرىنعى ءبىرىنشى راكەتكاسى, بۇل كۇندەرى WTA رەيتينگىندە 17-ورىندا تۇرعان اۋستراليانىڭ اشىق بىرىنشىلىگىنىڭ ەكى دۇركىن جەڭىمپازى, US open ءتۋرنيرىنىڭ ءۇش رەت فينالىندا ويناعان بەلارۋستىڭ بەتكەۇستارى ۆيكتوريا ازەرەنكودان ايلاسىن اسىرا المادى. ەسەپ – 7:5, 2:6, 5:7. ەلەنا رىباكينا كەشە فرانتسيالىق جاكلين كريستيانمەن كۇش سىناستى.