«ۇلت ۇستازى» اتانعان الاش قايراتكەرى احمەت بايتۇرسىن ۇلى: «گازەت – جۇرتقا قىزمەت ەتەتىن نارسە. ولاي بولاتىن ءمانىسى جۇرتتىڭ ءبىلىمدى, پىكىرلى, كورگەنى كوپ كوسەمدەرى, وقىعانى كوپ ادامدارى گازەت ارقىلى حالىقتىڭ الدىنا ءتۇسىپ, جول كورسەتىپ, ءجون سىلتەپ, باسشىلىق ايتادى.
…گازەت - حالىققا ءبىلىم تاراتۋشى. ولاي دەيتىنىمىز, گازەتتەن جۇرت ەستىمەگەنىن ەستىپ, بىلمەگەنىن ءبىلىپ, بىرتە-بىرتە ءبىلىمى مولايىپ, زەيىنى ءوسىپ, پىكىرى اشىلىپ, پاراساتى جەتىسپەكشى» دەپ جازعانى ءمالىم.
كەيىن زامان دامۋى مەن تەحنولوگيانىڭ وركەندەۋى ارقاسىندا اقپارات سالاسىنا راديو مەن تەلەۆيدەنيە قوسىلدى. ال بۇگىن الەمدىك اقپارات كوزدەرىن ينتەرنەتسىز, الەۋمەتتىك جەلىسىز ەلەستەتۋ مۇمكىن ەمەس. ويتكەنى, زامان تىنىسىن شۇعىل سەزدىرەتىن دە, جەر جۇزىنەن, ايشىلىق الىس جەرلەردەن حابار الدىراتىن دا - بۇقارالىق كوممۋنيكاتسيا قۇرالدارى. ولاردان قول ۇزگەن ادام جاسىنا قاراماي وي-ءورىسىن شەكتەيدى, كۇيبەڭ تىرشىلىكتەن اسا الماي قالادى. قوعامنىڭ ءاربىر مۇشەسى, اتا-انا, ۇستاز, شاكىرت, مەملەكەتتىك قىزمەتكەر, بيزنەسمەن, قاراپايىم ەڭبەك ادامى ت.ب. مادەنيەتى كەلىسسە, ەلدە قالىپتاسقان ءداستۇرلى اقپارات جۇيەسىن تۇتىناتىنىنا جانە قولدايتىنىنا سەنىمدىمىز.
جان-جاقتى ساۋاتتىلىققا, جالپى دەڭگەيگە سەبى تيەتىن ءىس - گازەت-جۋرنالدى جازدىرىپ الۋ دا - مادەنيەت پەن وركەنيەتتىلىك بەلگىسى.
قازاق «تايعا تاڭبا باسقانداي» دەپ بەكەر ايتپايدى. كوزبەن كورگەن, ۇستاپ سەزىنگەن نارسە سانادا ۇزاق ساقتالادى. مۇنى (جازبا ماتەريالدارىنىڭ كۇشىن) زاماناۋي پسيحولوگتەر دە ايتىپ-جازىپ ءجۇر.
ماسس-مەدياعا قاتىستى سۇراققا ەل پرەزيدەنتى قاسىم-جومارت توقاەۆ اشىق, ناقتى جاۋاپ بەردى:
«مەرزىمدى ءباسپاسوزدى ۇزبەي قارايمىن. بۇل مەنىڭ بۇرىننان قالىپتاسقان داعدىم. «Egemen Qazaqstan», «ايقىن», «Astana اqshamy» گازەتتەرىن وقيمىن. «انا ءتىلى», «قازاق ادەبيەتى», «جاس قازاق», «تۇركىستان» گازەتتەرىن دە مىندەتتى تۇردە وقىپ تۇرامىن. جالپى مەن كوپ وقيتىن اداممىن. جاقسى ماقالا نەمەسە سۇحبات كورسەم, استىن سىزىپ وقۋعا تىرىسامىن. وزەكتى ماسەلە بايقاسام, وعان قاتىستى ناقتى تاپسىرما بەرەمىن. الەۋمەتتىك جەلىدەگى وتكىر جازبالاردى دا ۇنەمى شولىپ وتىرامىن. ال, تەلەديداردان جاڭالىقتار مەن ساراپتامالىق باعدارلامالاردى كورەمىن».
ءيا, تۋعان ەلىنىڭ باسپاسوزىنەن جەرىمەي, وزگە ەلدىڭ اقپارات قۇرالدارىن دا قاراپ, وقىپ-ءبىلىپ, تانىمىن تولىقتىرىپ, ءبىلىمىن كەڭەيتىپ جۇرگەن بارشا سالاداعى ازاماتتاردىڭ, ىسكەر, تانىمال تۇلعالاردىڭ, ءتىپتى قاراپايىم اتا-انالاردىڭ ۇستانىمى, پىكىرى دالەلدى, سىندارلى, جۇيەلى بولاتىنىن ءسات سايىن بايقايمىز. وسى وڭاي دا وڭتايلى جەتىستىككە جەتۋ - اركىمنىڭ ءوز قولىندا.
ادامزاتقا ورتاق, ەلگە قاجەتتى بۇل ساپا, اباي ايتاتىن «كورسەم, بىلسەم» دەيتىن تازا شاقتان باستالعان ادامي ىنتا ءبىزدىڭ قوعام ءۇشىن ارقاشان ماڭىزدى ءارى پايدالى ەكەنىن ۇمىتپالىق.
دارحان مىڭباي,
ءماجىلىس دەپۋتاتى