مينسكىدەگى «چيجوۆكا-ارەنا» سپورت كەشەنىندە سامبو مەن جاۋىنگەرلىك سامبودان بەلارۋس پرەزيدەنتىنىڭ جۇلدەسى ءۇشىن ەۋروپانىڭ اشىق كۋبوگى ءوز مارەسىنە جەتتى. بۇل جارىستا جەرگىلىكتى بالۋانداردان بولەك, تاعى بىرقاتار مەملەكەتتىڭ وكىلدەرى كۇش سىناستى. سولاردىڭ اراسىندا قازاقستان وكىلدەرى دە بولدى.
ەرلەر اراسىنداعى باسەكەدە نۇرداۋلەت ايىمبەتوۆ (58 كيلو) پەن پاراسات جۇماباي (64 كيلو) جۇلدەگەرلەر قاتارىنان كورىندى. ەكەۋى دە قولا مەدالدى يەلەندى. ايەلدەر سايىسىندا دا ەكى سامبوشىمىز جەڭىس تۇعىرىنا كوتەرىلدى. 57 كيلو سالماقتاعى گۇلدانا المۇحامبەتوۆا اقتىق سىنعا دەيىن القىنباي جەتكەنىمەن, شەشۋشى تۇستا بەلورۋسسيالىق الەنا كۋپاۆانىڭ وسال تۇسىن تابا المادى. ناتيجەسىندە, ول كۇمىس مەدالدى يەلەندى. ال جارتىلاي فينالدا ۇتىلعان مارجان بيزاق (59 كيلو) ءۇشىنشى ورىنعا تابان تىرەدى.
جاۋىنگەرلىك سامبودان وتكەن جارىستا قازاقستاننىڭ ۇلتتىق قۇراما كومانداسى مول ولجاعا كەنەلدى. ءبىزدىڭ جىگىتتەر 1 التىن, 3 كۇمىس جانە 4 قولانى ولجالاپ, اتالعان ءتۋرنيردىڭ جالپى ەسەبىندە ۇزدىكتەر ساناتىنا قوسىلدى. اسىرەسە, تالعات جيەنتاەۆتىڭ ونەرى ەرەكشە ريزا ەتتى. +98 كيلو سالماقتا كۇش سىناسقان نار تۇلعالى قانداسىمىز بارلىق قارسىلاسىن قوعاداي جاپىرىپ, اقتىق سىنعا دەيىن القىنباي جەتتى. فينالدا تالعات ءوزىنىڭ كوماندالىق ارىپتەسى كونستانتين راحيموۆتى جەڭىپ, باس جۇلدەنى قانجىعاسىنا بايلادى. ءبىر ايتا كەتەرلىگى, بۇل سپورتشىلاردىڭ ەكەۋى دە قوستاناي وبلىسىنىڭ تۋمالارى.
كونستانتين راحيموۆتان بولەك, ەركەبۇلان قۋانعاليەۆ (58 كيلو) پەن مالىك بايسۇلتانوۆ (64 كيلو) كۇمىسپەن كۇپتەلدى. فينالدا ولار رەسەيدىڭ اتاقتى بالۋاندارىنان ايلالارىن اسىرا المادى. اتاپ ايتساق, مالىك الەكساندر دونتسوۆقا, ەركەبۇلان ۆلاديمير ليمانوۆقا جول بەردى. ال نۇركەن دومباەۆ (58 كيلو), ءادىل اسانحان (58 كيلو), جاراسحان ساماتوۆ (71 كيلو) جانە تيمۋر مۋكحەەۆ (98 كيلو) قولا مەدالدى مويىندارىنا ءىلدى. ءسويتىپ, قورىتىندى ەسەپتە وتانداستارىمىز 1 التىن, 4 كۇمىس جانە 7 قولا مەدالدى ەنشىلەدى.
مينسكىدەگى جارىس كەزىندە قازاقستان رەسپۋبليكاسى سامبو جانە جاۋىنگەرلىك سامبو فەدەراتسياسىنىڭ پرەزيدەنتى ايدوس اقجانوۆ حالىقارالىق سامبو فەدەراتسياسىنىڭ ۆيتسە-پرەزيدەنتى (FIAS) سەرگەي ەليسەەۆپەن كەزدەستى. ەكى تاراپ سپورتتىڭ وسى ءتۇرىن دامىتۋ جولىندا قانداي اۋقىمدى شارۋالار اتقارىلىپ جاتقانى جايىندا ايتىپ, الداعى جوسپارلارىمەن ءبولىستى. سونداي-اق كەزدەسۋ بارىسىندا ا.اقجانوۆ بيىلعى ازيا چەمپيوناتىن اقتاۋدا جانە ازيا كۋبوگىن نۇر-سۇلتاندا وتكىزۋگە نيەتتى ەكەنىن ءبىلدىردى.