سوڭعى ۋاقىتتا وبلىس ديقاندارى اراسىندا جەر تەلىمدەرىنە قاتىستى تۇسىنبەستىك تۋىنداپ, ارتى داۋعا ۇلاسىپ جاتقانى بەلگىلى. سىرداريا اۋدانىنداعى «شاعان جەر» جشس-داعى وسىنداي جاعداي ەكى جىل قاتارىنان سوزىلىپ كەلەدى. ەكى تاراپ اراسىنداعى ماسەلەلەر ءتۇيىنىن تارقاتۋ ءۇشىن بىرنەشە رەت كەزدەسۋ وتكىزىلىپ, وبلىس اكىمدىگى تاراپىنان ءتيىستى تۇسىندىرمەلەر دە جۇرگىزىلگەن. دەگەنمەن, تۇتانعان داۋدىڭ ءتۇتىنى ءالى باسىلماي تۇر. ناۋقان قارساڭىنداعى داۋدىڭ سالقىنى ەرتەڭگى ەگىس بارىسىنا دا كەرى اسەرىن تيگىزەرى تاعى انىق.
وسىعان وراي وبلىس اكىمى گۇلشارا ابدىقالىقوۆا «شاعان جەر» جشس شارۋالارىمەن كەزدەسىپ, تالابىن تىڭداپ, زاڭ اياسىندا ورتاق مامىلەگە كەلۋگە شاقىردى. جيىنعا وبلىس اكىمىنىڭ ورىنباسارى باقىت جاحانوۆ, وبلىس اكىمى اپپاراتىنىڭ باسشىسى ەرلان رايعانيەۆ, وبلىس پروكۋرورى نۇرلان بيجانوۆ, سىرداريا اۋدانىنىڭ اكىمى مۇرات ەرگەشباەۆ پەن سالالىق باسقارما باسشىلارى قاتىستى.
ايماق باسشىسى سەرىكتەستىكتەگى داۋدىڭ كەسىرىنەن اعايىننىڭ اراسىنا جىك تۇسكەنىن اتاپ ءوتتى. قىزبالىققا سالىنىپ, جاعدايدى ۋشىقتىرماي, ماسەلەنى بايىپپەن شەشۋگە شاقىردى.
– ءبىز ءۇشىن ەڭ ماڭىزدىسى, اعايىننىڭ بىرلىگى. اكىمدىك شارۋالاردىڭ ىشكى ماسەلەلەرىنە, شەشىم قابىلداۋ پروتسەسىنە ارالاسپايتىنىن دا بىلەسىزدەر. تەك تۇسىنىكتەمە جۇرگىزىپ, مەدياتسيا تارتىبىمەن شەشۋ جولىن ۇسىنامىز. دەگەنمەن دە, ۇلەسكەرلەردىڭ بولىنگەن جەر تەلىمدەرىنە قاناعاتتانباي, ءبىر-بىرىمەن كەلىسىمگە كەلە الماي وتىرعانى دا بايقالىپ وتىر. بيىل سۋ تاپشىلىعى وتكەن جىلعىدان دا قاتتىراق سەزىلەتىن ءتۇرى بار. ودان شىعۋ ءۇشىن بىرىگىپ ارەكەت ەتۋىمىز قاجەت. تاعى ءبىر مارتە ويلانىپ, بارلىعىن كەرىسۋ ەمەس, كەلىسۋ ارقىلى شەشۋگە شاقىرامىن, – دەدى وبلىس اكىمى.
جيىندا قوس تاراپتىڭ وكىلدەرى ءسوز الىپ, ماسەلەنىڭ جاي-جاپسارىن ايتىپ ءوتتى. سەرىكتەستىك باسشىسى جەڭىسبەك سىزدىقوۆ پەن ۇلەسكەر سەرىكبول ورىنباەۆ داۋدىڭ شىعۋ توركىنىنە تەرەڭدەپ, ءوز ۇستانىمدارىن ءبىلدىردى. وبلىس پروكۋرورى نۇرلان بيجانوۆ سەرىكتەستىك وكىلدەرىن ءوزارا كەلىسىمگە كەلىپ, داۋلارىن زاڭ اياسىندا رەتتەۋگە شاقىردى.
كەزدەسۋ سوڭىندا وبلىس اكىمى ەل يگىلىگى ءۇشىن ورتاق شەشىمگە كەلۋدىڭ ماڭىزدى ەكەنىن جانە ادىلەتتى قادامدار ارقىلى ورنىقتى شەشىم قابىلداۋ قاجەت ەكەنىن تاعى ءبىر مارتە ەسكە سالدى.
قىزىلوردا وبلىسى