پرەزيدەنت قاسىم-جومارت توقاەۆ «Qazaqstan» ۇلتتىق ارناسىنا بەرگەن سۇحباتىندا ۇجىمدىق قاۋىپسىزدىك تۋرالى شارت ۇيىمىنىڭ اسكەرىن ەلگە شاقىرعانىنا وكىنبەيتىنىن تىلىنە تيەك ەتتى, دەپ حابارلايدى Egemen.kz.
«وكىنبەيمىن. بۇل ەشقانداي دا وكىندىرەتىن شەشىم ەمەس. كەرىسىنشە دۇرىس شەشىم بولدى دەپ ويلايمىن. ويتكەنى, قارۋلى قاراقشىلار الماتىنى قيراتىپ, وزگە قالالارعا قاۋىپ ءتوندىردى. وسى قارۋلى كونتينگەنت بولماسا, لاڭكەستەر باسقا دا قالالاردى باسىپ الار ەدى. قارۋلى شايقاستار تالدىقورعاندا, تارازدا, شىمكەنتتە, قىزىلوردادا ورىن الدى. ەلوردادا لاڭكەستەردىڭ دايىندىق جۇمىستارى بايقالدى, ولار, ءتىپتى, اقورداعا شابۋىل جاساۋعا دايىن بولدى.
كەيبىر بەدەلدى ساراپشىلاردىڭ ايتۋىنشا, لاڭكەستەر قازاقستاننىڭ باستى ەكى قالاسىن باسىپ الۋدى جوسپارلاعان. بۇل سيرياداعى ستسەناريگە ۇقساس جوسپار. سول ەلدە لاڭكەستەر داماسك پەن راككانى باسىپ الۋعا ارەكەتتەنگەن ەدى.
ۇجىمدىق قاۋىپسىزدىك شارت ۇيىمىنىڭ اسكەرلەرى ءبىزدىڭ ەلدە ءبىر دە ءبىر وق اتقان جوق. ونى اشىق ايتۋ كەرەك. ولار تەك نەگىزگى ستراتەگيالىق نىسانداردى كۇزەتىپ تۇردى. وسى كەزدە ءبىزدىڭ كۇشتىك قۇرىلىمدار ىسكە كىرىسىپ, قارۋلى لاڭكەستەرگە توسقاۋىل قويدى. ارامىزدا تەك تىعىز بايلانىس پەن ۇيلەسىم بولدى» دەدى پرەزيدەنت.
سونداي-اق مەملەكەت باسشىسى ەل ىشىندە ايتىلىپ جۇرگەن «پۋتينگە قارىز بولدى» دەگەن ءسوزدىڭ بوس اڭگىمە ەكەنىن تىلىنە تيەك ەتتى.
«ال ەندى «پۋتينگە قارىز بوپ قالدىق» دەگەنگە كەلسەك, بۇل – بوس اڭگىمە. ونى دوعارۋ كەرەك. بىرىنشىدەن, ۇجىمدىق قاۋىپسىزدىك تۋرالى شارت ۇيىمىنىڭ كونتينگەنتى ۆ.ءپۋتيننىڭ نەمەسە رەسەيدىڭ جەكە اسكەرى ەمەس. بۇل ۇيىمنىڭ اسكەري قۇرامى وعان مۇشە ەلدەردىڭ بارىنە ورتاق. وندا رەسەيدەن بولەك, بەلارۋس, ارمەنيا, تاجىكستان جانە قىرعىزستاننىڭ اسكەري بولىمدەرى بار. قازاقستان دا – وسى ۇيىمنىڭ تولىققاندى مۇشەسى ءارى نەگىزىن قالاۋشىسى. سوندىقتان, ءبارى – زاڭدى, قيسىندى.
رەسەيگە كەلسەك, بۇل الپاۋىت ەل ءوزىنىڭ گەوساياسي مۇددەسىن دە قورعادى. قازاقستاننىڭ تۇراقتىلىعى رەسەيگە وتە قاجەت. مۇنى دۇرىس ءتۇسىنۋىمىز كەرەك. قازاقستان مەن رەسەي – ستراتەگيالىق سەرىكتەستەر. ارامىزدا شىنايى دوستىق پەن ءوزارا سەنىم بولۋى كەرەك. باسقا ساياسات ۇستانساق, ەكى ەلدىڭ ستراتەگيالىق مۇددەسىنە نۇقسان كەلتىرەمىز. جالپى, ءبىز ەشكىمگە ەشتەڭە دە قارىز ەمەسپىز. قازاقستان – ەگەمەن مەملەكەت. سوندىقتان ساياساتىمىز دا دەربەس», دەدى پرەزيدەنت ءوز ويىن تۇيىندەپ.