جاڭاوزەندەگى «وزەنمۇنايگاز» اق جۇمىسشىلارىنىڭ ەڭبەكاقىسىن ارتتىرۋ تۋرالى شەشىم قابىلداندى. بۇل تۋرالى «قازمۇنايگاز» ۇلتتىق كومپانياسى اق باسقارما توراعاسى اليك ايدارباەۆ ءمالىم ەتتى, دەپ حابارلايدى Egemen.kz.
«بيىل 14 اقپاندا جاڭاوزەندەگى «وزەنمۇنايگاز» اق-نىڭ بۇرعىلاۋ باسقارماسىنىڭ ءبىر توپ قىزمەتكەرى جۇمىسىن توقتاتتى. ولاردىڭ تالابى جالاقىنى كەمىندە 41 پايىزعا ءوسىرۋ. مەن جاعدايدى ەستىگەن سوڭ, بىردەن جاڭاوزەنگە باردىم. سول كۇنى «وزەنمۇنايگاز» باسشىلىعى جانە كاسىپوداق ماماندارىمەن كەلىسسوز جۇرگىزىلدى.
شۇعىل جيىندا جۇمىسشىلاردىڭ تالاپتارى مەن ونى ورىنداۋدىڭ ىقتيمال جولدارىن تالقىلادىق. سونداي-اق, باسشىلىقتان بولەك, جۇمىسشىلارمەن كەزدەسىپ, ولاردىڭ ءوتىنىش, ۇسىنىستارىن تىڭدادىم», دەدى اليك ايدارباەۆ ماڭعىستاۋ وبلىستىق قوعامدىق كوممۋنيكاتسيا ورتالىعىندا ونلاين وتكەن ءباسپاسوز ءماسليحاتىندا.
ۇلتتىق كومپانيا باسشىسىنىڭ ايتۋىنشا, «وزەنمۇنايگاز» اق جۇمىسشىلارىنان بولەك, وعان قاراستى مەردىگەر كومپانيالاردىڭ دا قىزمەتكەرلەرى جالاقىنى كوتەرۋىن تالاپ ەتىپ, جۇمىسىن توقتاتقان.
«مۇنايشىلارمەن كەلىسسوزدەر كۇنى بويى ءجۇردى. ونىڭ ناتيجەسىندە جاعدايدى تۇراقتاندىرۋ جانە كاسىپورىننىڭ جۇمىسىن توقتاتپاۋ تۋرالى كەلىسىمگە كەلىپ, جۇمىسشىلاردىڭ جالاقىسى كوتەرىلەتىن بولدى. بۇعان دەيىن 2020 جىلدىڭ جەلتوقسان ايىندا جالاقى 10 پايىزعا ارتسا, ەندى جاڭا كەلىسىم بويىنشا تاعى 20 پايىزعا ارتتىرۋ تۋرالى كەلىسىم جاسالدى. وسىلايشا بيىل جىل باسىنان جۇمىسشىلاردىڭ جالاقىسى 30 پايىزعا وسەتىن بولادى», دەيدى ول.
سونداي-اق باسقارما توراعاسى وسىرىلگەن جالاقى كولەمىمەن جۇمىسشىلاردىڭ دەنى كەلىسكەنىن ايتتى.
«دەگەنمەن كەيبىر جۇمىسشىلار جالاقىنى 40-50 پايىزعا كوتەرۋدى تالاپ ەتىپ وتىر. بىزگە 20 پايىزعا ارتتىرۋ شەشىمى وڭايعا سوققان جوق. بيىل ودان ارتىق جالاقى كوتەرىلمەيدى, بۇل سوڭعى شەشىم. سوندىقتان جالاقىنى ءوسىرۋدى تالاپ ەتۋشى جانداردان تۇسىنىستىكپەن قاراۋىن سۇرايمىن», دەيدى ا. ايدارباەۆ.