اپتانىڭ العاشقى كۇنى بەيجىڭ وليمپياداسىندا التى جۇلدە جيىنتىعى ساراپقا سالىندى. قازاقستاندىق جانكۇيەرلەردىڭ نازارى فريستايلشىلارعا اۋدى. ويتكەنى ايەلدەر اكروباتيكاسىنان وتكەن جارىستا قازاقستاندىقتار – جانبوتا الدابەرگەنوۆا مەن اقمارجان قالمۇرزاەۆا ونەر كورسەتتى.
العاشقى سىناقتا ەكەۋى دە ءسۇرىندى. جانبوتا 12-ساتىعا جايعاسسا, اقمارجان 19-ورىندا قالىپ قويدى. ەكىنشى ىرىكتەۋ سايىسىندا الدابەرگەنوۆا بىلگەنىنەن جاڭىلىپ, جارىستى مەرزىمىنەن بۇرىن اياقتادى. ال قالمۇرزاەۆا ءوز توبىندا ۇزدىك شىعىپ, ءبىرىنشى فينالعا جولداما الدى. بىراق شەشۋشى تۇستا جەرلەسىمىز ءوزىن جاقسى قىرىنان كورسەتە المادى. ەكىنشى رەت ورتاعا شىققاندا جارىستى جالعاستىرۋعا دايىن بولماسا, ۇشىنشىسىندە تىم از ۇپاي جيناپ, قورىتىندى ەسەپتە 11-ورىندى قاناعات تۇتتى. بۇل جارىستا نەگىزگى باسەكەلەستىك قىتايلىق سيۋي مەنتاو مەن بەلورۋسسيالىق اننا گۋسكوۆا اراسىندا ءوربىدى. ەكەۋى دە وتە مىقتى سپورتشىلار. مەنتاو – وليمپيا ويىندارىنىڭ ەكى دۇركىن كۇمىس جۇلدەگەرى, گۋسكوۆا – پحەنچحانداعى ويىنداردىڭ جەڭىمپازى. وتە شيەلەنىستى وتكەن تارتىستا جەرگىلىكتى فريستايلشىنىڭ اسىعى الشىسىنان ءتۇستى. بەلارۋس وكىلى كۇمىسپەن كۇپتەلسە, قولا مەدال امەريكالىق مەگان نيككە بۇيىردى. ءبىزدىڭ اقمارجان قالمۇرزاەۆا ءدال وسى اقش وكىلىنەن ەكىنشى ىرىكتەۋ سىنىندا وزعان بولاتىن.
شاڭعىمەن ترامپليننەن سەكىرۋدىڭ (HS140) كوماندالىق سايىسىندا قۇرامىندا شتەفان كرافت, دانيەل حۋبەر, يان حەرل جانە مانۋەل فەتتنەر سىندى ساڭلاقتارى بار اۋستريا الدىنا جان سالمادى. ەكىنشى جانە ءۇشىنشى ورىنداردا – سلوۆەنيا (لوۆرو كوس, تسەنە پرەۆتس, تيمي زايتس جانە پەتەر پرەۆتس) مەن گەرمانيا (كونستانتين شميد, شتەفان ليايە, ماركۋس ايزەنبيحلەر جانە كارل گايگەر).
مانەرلەپ سىرعاناۋداعى بيشىلەر باسەكەسىندە فرانتسيالىق جۇپ – گابريەلا پاپاداكيس پەن گيوم سيزەروننىڭ باعى جانسا, ودان كەيىنگى ورىنداردى ۆيكتوريا سينيتسينا مەن نيكيتا كاتسالاپوۆ (رەسەي) جانە مەديسون حاببەلل مەن زاكاري دونوحيۋ (اقش) ەنشىلەدى. ال باسقا سپورت تۇرلەرى بويىنشا تەك قانا ىرىكتەۋ سايىستارى ءوتىپ, سول سىناقتان سۇرىنبەگەندەر فينالدا كۇش سىناسۋ قۇرمەتىنە يە بولدى.
شايبالى حوككەيدەن ءوتىپ جاتقان جارىس تا كوپشىلىكتىڭ قىزىعۋشىلىعىن تۋدىرۋدا. قازىرگى كەزدە ەرلەر اراسىنداعى باسەكەدە بارلىعى 12 قۇراما ءۇش توپقا ءبولىنىپ باق سىناۋدا. سولاردىڭ اراسىنان ءبىرىنشى ورىن العاندارى تىكەلەي شيرەك فينالعا جولداما الدى. ولار – اقش, فينليانديا, شۆەتسيا جانە رەسەي قۇرامالارى. كەشە تۇندە دانيا مەن لاتۆيا, چەحيا مەن شۆەيتساريا, سلوۆاكيا مەن گەرمانيا جانە كانادا مەن قىتاي حوككەيشىلەرى ءوزارا كۇش سىناستى. شيرەك فينالدىق سايىستار بۇگىن وتەدى. 18 اقپاندا جارتىلاي فينالدى تاماشالايمىز. ال 19 جانە 20 اقپان كۇندەرى وليمپيا ويىندارىنىڭ جەڭىمپازى مەن جۇلدەگەرلەرى انىقتالادى.
ايەلدەر اراسىنداعى حوككەيشىلەر جارىسىنىڭ جارتىلاي فينالدىق سايىستارى اياقتالدى. بۇل مەجەدە كانادا شۆەيتساريانى 10:3 ەسەبىمەن ۇتسا, اقش فينليانديادان ايلاسىن اسىردى – 4:1. ەندى ەرتەڭ كورشىلەس ەكى مەملەكەتتىڭ وكىلدەرى باس جۇلدەنى ءوزارا ساراپقا سالادى. جەڭىلىس تاپقان كوماندالار قولا مەدال ءۇشىن تالاسادى.
جالپى ەسەپتە ءالى دە نورۆەگيا الدا كەلەدى. ولار 9 التىن, 5 كۇمىس جانە 5 قولانى ولجالادى. باستى قارسىلاستارىنان گەرمانيانىڭ ءبىر باس جۇلدەسى كەم. ودان بولەك, نەمىستەردە 5 كۇمىس پەن 2 قولا مەدال بار. اقش (7+6+3) ءۇشىنشى ورىنعا جايعاسسا, نيدەرلاند (6+4+2) پەن اۋستريا (5+6+4) ءتورتىنشى جانە بەسىنشى ساتىلارعا تابان تىرەدى. سونداي-اق شۆەتسيا (5+3+3), قىتاي (5+3+2), رەسەي (4+6+8), فرانتسيا (3+6+2) جانە شۆەيتساريا (3+0+5) وزىق ون كوماندانىڭ قاتارىندا. وسى جارىستا بارلىعى 21 مەملەكەتتىڭ ءانۇرانى شىرقالىپ, 26 ەلدىڭ تۋى بيىكتە جەلبىرەدى. وكىنىشكە قاراي, ولاردىڭ قاتارىندا قازاقستاننىڭ سپورتشىلارى جوق.