پاۆلودار وبلىسىنا قاراستى شىدەرتى كەنتى اۋماعىندا 80 جۇك كولىگى تۇرىپ قالدى, دەپ حابارلايدى Egemen.kz.
وڭىرلىك تجد 2022 جىلعى 15 اقپان ساعات 11.00-دەگى جەدەل اقپاراتتى ۇسىندى.
– شىدەرتى كەنتى اۋماعىندا قاراعاندى وبلىسى باعىتى بويىنشا 80 بىرلىك جۇك كولىگى جينالىپ قالعان. شىدەرتى كەنتىندە 2 جىلىتۋ پۋنكتى اشىلدى, تاماقتانۋ ۇيىمداستىرىلدى. نۇر-سۇلتان قالاسى ارقىلى اينالمالى جولمەن شىعۋدان باس تارتتى, – دەپ جازىلعان حابارلامادا.
14 اقپان كۇنى قاراعاندى وبلىسىندا اۋا رايىنىڭ ناشارلاۋىنا بايلانىستى (بوران, ناشار كورىنۋ) شىدەرتى كەنتىنەن قاراعاندى وبلىسىنىڭ شەكاراسىنا دەيىنگى رەسپۋبليكالىق ماڭىزى بار قىزىلوردا - پاۆلودار اۆتوجولىنىڭ ۋچاسكەسىندە بارلىق اۆتوكولىك تۇرلەرى ءۇشىن قوزعالىس جابىلدى (1135-1206 كم).15 اقپاندا ساعات 5:25-تەن باستاپ قاراعاندى وبلىسىندا رەسپۋبليكالىق ماڭىزى بار قالقامان – باياناۋىل – ۇمىتكەر – ۋليانوۆسكي (138-231 كم) اۆتوجولىنىڭ باياناۋىل اۋىلىنان قاراعاندى وبلىسىنىڭ شەكاراسىنا دەيىنگى ۋچاسكەسىندە بارلىق اۆتوكولىك تۇرلەرى ءۇشىن قوزعالىس جابىلدى.