ابزالعا قارعا ادىم جەر جەتپەدى!

وليمپيا ويىندارىنىڭ باس­تالعانىنا 10 تاۋلىك وتسە دە, قازاقستان قۇراما كومانداسىنىڭ قورجىنى ءالى بوس. سول سەبەپتى جانكۇيەرلەر ءار باسەكەنى تاعاتسىزدانا كۇتىپ, كۇن سايىن جارىسقا شىعاتىن جەر­لەستەرىمىزدىڭ جولىنا ۇلكەن ۇمىت­پەن قاراۋدا. بۇل جولى ءبىز شورت-ترەك شەبەرلەرىنە ەرەكشە ۇمىتپەن قارادىق. الەم كۋبوگىنىڭ كەزەڭدىك سايىستارىندا تابىستى ونەر كور­سەتكەن سپورتشىلارىمىز ءتورت جىل­دىقتىڭ باستى دوداسىندا ءبىر جارق ەتىپ كورىنسە دەپ ارماندادىق. شيرەك فينالعا جولداما العان ءۇش جىگىتىمىزدىڭ ەكەۋى جارتىلاي فينالعا ءوتتى. ولار – دەنيس نيكيشا مەن ابزال اجىعاليەۆ. ءادىل عالياحمەتوۆ بەسىنشى ورىندا قالىپ قويىپ, جارىس­تى اياقتادى. ءدال وسى 500 مەترلىك مەجەدە پحەنچحان وليمپياداسىنىڭ جەڭىمپازى, الەمنىڭ ەكى دۇركىن چەمپيونى جانە بەس دۇركىن جۇلدەگەرى, ەۋروپا بىرىنشىلىگىندە 13 مارتە (3 التىن+8 كۇمىس+2 قولا) جەڭىس تۇعىرىنا كوتەرىلگەن ماجارستاننىڭ ايگىلى سپورتشىسى شاولين شاندور ليۋ دە ءسۇرىندى.

جارتىلاي فينالدا ابزال ءوز توبىندا ەكىنشى ورىندى يەلەنىپ, فينالعا شىقسا, دەنيس ءتورتىنشى ورىندا قالىپ قويدى. ۆ توبىندا ونەر كورسەتكەن نيكيشا قورىتىندى ەسەپتە سەگىزىنشى ساتىعا تابان تىرەدى. ال قانداسىمىز جەڭىس تۇعىرىنا سىنىق-سۇيەم عانا جەتپەي, ءتورتىنشى ورىنعا تۇراقتادى. شەشۋشى تۇستا اجىعاليەۆكە ءسال عانا ساتتىلىك جەتىس­پەدى. ونىڭ ۇستىنە, پەترو سيگەل ءدال ابزالدىڭ الدىنا كەلىپ جىعىلدى. يتاليالىق سپورتشىنى اينالىپ وت­كەن قازاقتىڭ ورەنى سول ساتتە اسا قۇن­دى سەكۋندتارىن جوعالتتى. ايت­پە­گەندە, اجىعاليەۆتىڭ جەڭىس تۇعى­رىنا كوتەرىلۋى بەك مۇمكىن ەدى. بىر­اق ابزالعا بەيجىڭدە ونداي باق بۇيىر­مادى.

دەسەك تە, بۇل جولى قازاقستاندىق شورت-ترەكشىلەر وليمپيا ويىن­دارىنداعى وزدەرىنىڭ ەڭ ءىرى تابىسىنا قول جەتكىزگەنىن ايتا كەتۋگە ءتيىسپىز. بۇعان دەيىن وسى سپورت ءتۇرىن سەرىك ەتكەن وتانداستارىمىزدىڭ ەشبىرى اتالعان دودادا ۇزدىك تورت­تىككە ەنگەن ەمەس. سوندىقتان دا جەڭىسكە جەتۋ ءۇشىن جانىن سالىپ ايقاسقان ابزال اجىعاليەۆكە جانە از عانا ۋاقىت ارالىعىندا وتە مىق­تى كوماندا جاساقتاي بىلگەن مادى­عالي قارسىبەكوۆكە مىڭ دا ءبىر العىس ايتقىمىز كەلەدى. ال بۇل جارىس­تا باس جۇلدەنى پحەنچحان وليم­پياداسىنىڭ جەڭىمپازى, ما­جار­ستاندىق ليۋ شاندور ولجالادى. رەسەيلىك كونستانتين يۆليەۆ كۇمىس جانە كانادالىق ستيۆەن ديۋبۋا قولا مەدالدى يەلەندى.

باسەكەلەر اياقتالعان بەتتە باق وكىلدەرىنە بەرگەن سۇحباتىندا ا. اجىعاليەۆ: «وليمپيادانىڭ ىرىكتەۋ سىنىنان سۇرىنبەي ءوتۋدىڭ ءوزى وتە قيىن بولدى. سەبەبى ونىڭ الدىنداعى ماۋسىمدا دەنساۋلىعىم سىر بەرگەن ەدى. سونىڭ سالدارىنان ءبىراز ۋاقىت بابىما كەلە المادىم. مەنىڭ كوپتەن بەرگى ارمانىم – ەلىمىزدە شورت-ترەكتى دامىتۋعا سۇبەلى ۇلەس قوسۋ. قازاق بالالارى قىسقى سپورت تۇرلەرىنە بەيىم ەمەس دەگەن تاپتاۋ­رىندى بۇزعىم كەلدى. ءبىزدىڭ دە كونكي تەۋىپ, سىرعاناي الاتىنىمىزدى كورسەتۋگە تىرىستىم. جالپى, جانكۇيەرلەر جازعى سپورت تۇرلەرىندە ونەر كورسەتىپ جۇرگەن اتلەتتەردى بىردەن تانيدى. ال قىسقى سپورتتا قانشا جۇلدە الساق تا, تاسادا قالىپ قويىپ ءجۇرمىز. شورت-ترەك ەلىمىزدەگى ەڭ جاس سپورت تۇرلەرىنىڭ ءبىرى ەكەنىنە قاراماستان, جەرلەستەرىمىز الەم كۋبوگى كەزەڭدەرىندە ۇنەمى جۇلدە الىپ ءجۇر. وسى جەڭىستى ءداستۇردىڭ الداعى ۋاقىتتا دا جالعاساتىنىنا سەنىمدىمىن. ال بۇگىن قازاق حالقىن قۋانتۋ ءۇشىن بارىمدى سالدىم. فينالعا دەيىن ەكى بىردەي وليم­پيادا چەمپيونىنىڭ جارىس جولىنان شىعىپ قالۋىنىڭ ءوزى كوپ نارسەنى اڭعارتسا كەرەك. وسىنداي باسەكەلەستىك بەلەڭ الىپ تۇرعان سا­يىس­تىڭ شەشۋشى سىنىنا دەيىن القىنباي جەتكەنىمە قۋانىشتىمىن. بىراق ماعان وليمپيادا مەدالى بۇ­يىر­مادى. ارينە, بۇل وكىنىشتى», دەپ اعىنان جارىلدى.

تاۋ شاڭعىسىنان وتكەن سلالوم سايىسىندا زاحار كۋچيننىڭ جىگەرسىزدىگىنە كۇيىندىك. ءبىرىنشى مۇمكىندىگىندە ورەسكەل قاتەلىككە بوي الدىرعان ول جارىس جولىنان شىعىپ قالدى. بۇل تارتىستا جاستار اراسىنداعى الەمنىڭ التى دۇركىن چەمپيونى, الەم كۋبوگى كەزەڭدىك باسەكەلەرىنىڭ 10 دۇركىن جەڭىمپازى 24 جاستاعى شۆەيتساريالىق ماركو ودەرماتت تەڭدەسسىز دەپ تانىلدى. «ەر كەزەگى ۇشكە دەيىن» دەمەكشى, وسىعان دەيىن ەكى بىردەي وليمپيادادان ولجاسىز ورالعان سلوۆەنيالىق جان كرانەتستىڭ بەيجىڭدە باعى جانىپ, كۇمىس مەدالدى كەۋدەسىندە جارقىراتتى. الەم چەمپيوناتىندا ءۇش رەت توپ جارعان فرانتسيالىق ماتە فەۆرگە قولا مەدال بۇيىردى.

فريستايل-اكروباتيكادان وتەتىن جارىستا قازاقتىڭ قوس سۇلۋى – جان­بوتا الدابەرگەنوۆا مەن اق­مار­جان قالمۇرزاەۆا ءوز ونەرلەرىن ورتاعا سالۋعا ءتيىس ەدى. بىراق اۋا رايىنىڭ قولايسىزدىعىنا بايلانىستى بۇل باسەكەلەر كەيىنگە شەگەرىلدى. كەلەسى كۇنگى باسەكەدە ەكى سپورت­شىمىز ىرىكتەۋ جارىس­تا­رىنا قاتىسىپ, فينالعا شىعۋ ءۇشىن بار ونەرلەرىن ورتاعا سالدى. اق­مارجان قالمۇرزاەۆا ەكىنشى ىرىك­تەۋدە 98.68 ۇپاي جيناپ, ءبىرىنشى ورىنمەن جارىستىڭ ءبىرىنشى فينالىنا جولداما الدى. ءبىرىنشى ىرىكتەۋدە ول نەبارى 70.86 ۇپاي توپتاعان ەدى.

وكىنىشكە قاراي, جانبوتا الدا­بەرگەنوۆا فينالعا جولداما الا المادى. 80.56 ۇپايعا يە بولعان ول جەتىنشى ورىنعا تابان تىرەپ, فينالعا جولداما بەرەتىن ۇزدىك التىلىقتىڭ قاتارىنان تىس قالدى.

بياتلونشىلاردىڭ باسەكەسىندە گالينا ۆيشنەۆسكايا-شەپورەنكو مەن الەكساندر مۋحينگە جانكۇيەر بولدىق. ءاۋ باستا جاستار بۋىنى ارا­سىنداعى جارىستاردا جاسىن­داي جارقىلداعان 28 جاستاعى ۆيش­نەۆسكايا-شەپورەنكو ۋاقىت وزا ازيا ويىندارىنىڭ ءتورت دۇركىن چەمپيو­نى اتانىپ, ازيا بىرىنشىلىگى مەن دۇنيەجۇزىلىك ۋنيۆەرسيادانى ەكى رەتتەن ۇتتى. بىراق تورتكۇل دۇنيەنىڭ دۇلدۇلدەرى جينالعان جارىسقا ول دايارلىقسىز كەلگەن ەكەن. باسەكە بارىسىندا نىسانانى ءتورت مارتە ءدال كوزدەي الماي, جەڭىمپازدان جەتى مينۋت­تان اسا ۋاقىت قالىپ قوي­­عان گالينا 52-ورىندى قاناعات تۇت­تى. التىن القانى موينىنا ىلگەن نور­ۆەگيالىق مارتا ولسبيۋ-رەيسەلاند 10 شاقىرىمدى 33 مينۋت 18 سەكۋندتا ءجۇرىپ ءوتتى. نىسانا كوز­دەۋدە ءبىر رەت قانا ءمۇلت كەتتى. وسى­­لايشا, ول بەيجىڭدە دارا تالانتىمەن ءۇشىنشى مارتە وقشاۋلاندى. ودان بولەك ولسبيۋ-رەيسەلاندتىڭ 11 دۇركىن الەم چەمپيونى دەگەن دارداي اتاعى تاعى بار. مارتانىڭ وتانداسى تيريل ەكحوفف قولاعا قول سوزسا, شۆەتسيالىق ەلۆيرا ەبەرگ كۇمىسپەن كۇپتەلدى.

وسى قاشىقتىقتاعى باستى فا­ۆوريتتەردىڭ ءبىرى ينگريد تاندرەۆولد ەدى. 25 جاستاعى نورۆەگيالىق بياتلون­شى الەم چەمپيوناتىندا 3 التىن, 2 كۇمىس جانە 1 قولانى ولجالاعان. وليمپياداعا دا جاقسى دايارلىقپەن كەلدى. بىراق ءدال جارىس كەزىندە ينگريدتىڭ دەنساۋلىعى سىر بەرىپ, ول ءوز دەڭگەيىندە ونەر كورسەتە المادى. مارە سىزىعىن قيىپ وتكەن بەتتە تاندرەۆولد ەسىنەن تانىپ قۇلادى. دارىگەرلەر ونى زەمبىلگە سالىپ اكەتىپ, اۋرۋحانادا قاجەتتى ەم-دوم جاسادى. «اق حالاتتىلاردىڭ» ايتۋىنشا, ينگريدتىڭ دەنساۋلىعى بىرتە-بىرتە دۇرىستالىپ كەلەدى.

بياتلوننان ەرلەر باسەكەسىندە باق سىناعان ءمۋحيننىڭ ونەرى تىپتەن سۇرەڭسىز بولدى. 12,5 شاقىرىمدىق قاشىقتىقتا جۇگىرگەن ول 58 سپورت­شىنىڭ تەك بىرەۋىنەن عانا وزىپ, 57-ورىنعا تۇراقتادى. بۇل جارىستا كەنين فيون-مايە جەڭىمپاز اتانسا, ودان كەيىنگى ورىنداردى نور­ۆەگيالىق تارەي بيو مەن رەسەيلىك ەدۋارد لاتىپوۆ يەمدەندى.

كونكيشىلەر سايىسىندا ەكاتە­رينا ايدوۆا كۇش سىناستى. بۇل ونىڭ ءتورتىنشى وليمپياداسى ەدى. ۆانكۋۆەر, سوچي جانە پحەنچحاننان وتانداسىمىز قۇرالاقان ورالدى. وسى وليمپيا ويىندارىنىڭ اشىلۋ سالتاناتىندا قازاقستاننىڭ تۋىن ۇستاپ شىققان 30 جاستاعى سپورتشىمىز بەيجىڭدە جەڭىس تۇعىرىنا كوتەرىلەتىن شىعار دەپ ۇمىتتەندىك. بىراق ول ءۇمىت اقتالمادى. ايدوۆا 20-ورىندى يەلەندى. بۇل تارتىستا امەريكالىق ەرين دجونسوننىڭ الدىنا ەشكىم تۇسە المادى. كۇمىس جانە قولا مەدالداردى جاپو­نيا­لىق ميحو تاكاگي مەن انگەلينا گوليكوۆا ءوزارا ءبولىستى.

شاڭعىشىلاردىڭ 4ح10 شاقى­رىمىدىق ەستافەتاسىندا قۇرامىندا الەكسەي چەرۆوتكين, الەكساندر بولشۋنوۆ, دەنيس سپيتسوۆ جانە سەرگەي ۋستيۋگوۆ بار رەسەي قۇراماسى شا­شاسىنا شاڭ جۇقتىرمادى. جە­ڭىم­پاز كوماندانىڭ كورسەتكىشى – 1 ساعات 54 مينۋت 50,7 سەكۋند. ەكىن­شى ورىندى نورۆەگيالىقتار ەن­شىلەدى. سكانديناۆيالىقتار باس­تى قارسىلاستارىنان 1.07,2 سەكۋند قالىپ قويدى. ءۇشىنشى ساتىعا فران­تسيانىڭ وكىلدەرى جايعاستى.

جالپىكوماندالىق ەسەپتە نورۆەگيا قۇراماسى باستى قارسى­لاسى – گەرمانيادان وزىپ, جەكە-دارا كوش باستادى. ولاردىڭ قورجىنىندا 21 (9+5+7) جۇلدە بار. نەمىستەر (8+5+1) – ەكىنشى ورىن­دا. ءۇشىنشى ساتىعا اقش-تىڭ (6+5+1) سپورتشىلارى جايعاستى. سونداي-اق نيدەرلاند (6+4+2), شۆەتسيا (5+3+3), اۋستريا (4+6+4), رەسەي (4+5+8), قىتاي (4+3+2), شۆەيتساريا (3+0+5) جانە يتاليا (2+6+2) قۇرامالارى ۇزدىك وندىقتىڭ قاتارىندا.