باس جۇلدە – «چەلسيدە»

فينالدىق ماتچ 42 000 كو­رەرمەندى سىيدىرا الاتىن مۇ­حاممەد بين زايەد ستاديونىندا ءوتتى. ءبىرىنشى تايمدا ەسەپ اشىلعان جوق. ۇزىلىستەن كەيىن قوس كوماندا شيراق قيمىلداي باستادى. ناتيجەسىندە, 55-مينۋتتا كاللۋم حادسون-ودويدىڭ اۋەلەتىپ بەرگەن پاسىن رومەلۋ لۋكاكۋ قاقپاعا ءدوپ ءتۇسىرىپ, اعىلشىنداردى العا شىعاردى. ارادا توعىز مينۋت وتكەننەن سوڭ برازيليالىقتار تارازى باسىن تەڭەستىردى. بۇل گولدى رافاەل ۆەيگا سوقتى. نەگىزگى ۋاقىتتا جەڭىمپاز انىقتالماعاننان سوڭ ويىن وۆەرتايمعا ۇلاستى. 117-مينۋتتا كاي حاۆەرتس 11 مەترلىك نۇك­تەدەن نىسانانى ءدال كوزدەپ, كەزدەسۋدىڭ سوڭعى نۇكتەسىن قوي­دى. وسىلايشا, 2:1 ەسەبىمەن جەڭىسكە جەتكەن «چەلسي» اتالعان جارىستىڭ جە­ڭىمپازى اتاندى.

مىسىردىڭ ء«ال-احلي» مەن ساۋد ارابياسىنىڭ ء«ال-حيليال» كلۋبتارى اراسىنداعى ءۇشىن­شى ورىن ءۇشىن باسەكە ال-نا­حايان ستاديونىندا ءوتتى. بۇل ماتچتا كايردان كەلگەن فۋت­بولشىلاردىڭ ۇستەمدىگى ەش كۇمان تۋعىزعان جوق. ولار قارسىلاستار قاقپاسىن ءتورت مارتە ءدال كوزدەسە, ساۋديالىقتار بىردە-ءبىر رەت جاۋاپ قايىرا المادى. ەسەپ – 4:0. بۇل گولداردىڭ اۆتورلارى – ياسسەر يبراگيم (8 جانە 17-مينۋت), كادەر احمەد ابدەل (40-مينۋت) جانە ءامىر ءال-سۋللايا (64-مينۋت). ءسويتىپ, ء«ال-احليگە» قولا مەدال بۇيىردى.

ەستەرىڭىزگە سالا كەتەيىك, كلۋب­تىق الەم چەمپيوناتى 2000 جىلدان بەرى ۇيىمداستىرىلىپ كەلەدى. سول ارالىقتا ءمادريدتىڭ «رەالى» ەڭ كوپ ولجاعا كەنەلدى. كورولدىك كلۋب ءتورت رەت (2014, 2016, 2017, 2018) توپ جاردى. يس­پانيانىڭ تاعى ءبىر كومانداسى – «بارسەلونا» ءۇش مارتە (2009, 2011, 2015) باس جۇلدەنى ولجالادى. سان-پاۋلۋدىڭ «كو­رينتيانسى» (2000, 2012) مەن ميۋنحەننىڭ «باۆارياسى» (2013, 2020) ەكى رەتتەن دارا شىقتى. برازيليانىڭ «ينتەر­ناسونال» (2006) مەن «سان-پاۋلۋ» (2005), يتاليانىڭ «ميلان» (2007) مەن «ينتەر» (2010), انگليانىڭ «مان­­چەستەر يۋنايتەد» (2008), «لي­ۆەرپۋل» (2019) جانە «چەل­سي» (2021) كلۋبتارى ءبىر-ءبىر مارتە ءدال سول بيىكتەن كورىندى.