تۇرىكمەنستاندا مەرزىمىنەن بۇرىن پرەزيدەنت سايلاۋى وتەدى. ورتالىق سايلاۋ كوميسسياسى كەزەكتى پرەزيدەنتتىك سايلاۋعا دايىندالۋعا كىرىستى.
ەلدى 2007 جىلدان بەرى باسقارىپ كەلە جاتقان پرەزيدەنت گۋربانگۋلى بەردىمۇحامەدوۆ قىزمەتتەن كەتۋگە نيەتتى ەكەنىن اشىق ايتتى. ساراپشىلار الداعى سايلاۋدا جەڭىسكە جەتۋ مۇمكىندىگى قازىرگى بيلەۋشىنىڭ قولىندا دەپ ەسەپتەيدى. «قابىلدانعان ءتيىستى قاۋلىعا سايكەس 2022 جىلعى 12 ناۋرىزدا تۇرىكمەنستان پرەزيدەنتىنىڭ مەرزىمىنەن بۇرىن سايلاۋى وتەدى», دەلىنگەن ەلدىڭ ورتالىق سايلاۋ كوميسسياسى تاراتقان حابارلامادا.
تۇرىكمەنستان پرەزيدەنتى ەلدە تولىق بيلىككە يە ءارى كونستيتۋتسياعا سايكەس, پرەزيدەنتتىككە ءتۇسۋ مەرزىمى شەكتەلمەگەن. دەگەنمەن وتكەن جۇمادا گۋربانگۋلى بەردىمۇحامەدوۆتىڭ توراعالىعىمەن وتكەن پارلامەنتتىڭ جوعارعى پالاتاسىنىڭ وتىرىسىنان كەيىن پرەزيدەنت «قيىن شەشىم قابىلداعانىن» مالىمدەدى. «مەن ەلىمىزدىڭ قازىرگى دامۋ كەزەڭىندە مەملەكەتتى باسقارۋدى رۋحاني ورتادا جانە جاڭا زامان تالاپتارىنا ساي تاربيەلەنگەن جاس باسشىلارعا بەرۋ كەرەك دەگەن ويدى قولدايمىن. حالىق ءماسليحاتىنىڭ توراعاسى رەتىندە ءوزىمنىڭ مول ومىرلىك جانە ساياسي تاجىريبەمدى وسى سالاعا باعىتتاۋعا نيەتتىمىن», دەدى پرەزيدەنت گۋربانگۋلى بەردىمۇحامەدوۆ.