الماتى قالالىق پوليتسيا دەپارتامەنتىنىڭ مالىمەتىنشە, جەدەل الدىن الۋ شاراسى بارىسىندا الماتى قالاسى مەن الماتى, جامبىل وبلىستارىندا 400-دەن استام قارۋ تاركىلەنگەن, دەپ جازادى Egemen.kz.
ونىڭ 152-ءسى بيىلعى قاڭتار ايىنىڭ باسىندا بولعان جاپپاي تارتىپسىزدىك كەزىندە قارۋ-جاراق دۇكەندەرىنەن ۇرلانعان.
«مامانداندىرىلعان ساۋدا ورىندارىنان بارلىعى 1 400-دەن استام اتىس قارۋى ۇرلانعان. سونىمەن قاتار زاڭسىز اينالىمنان تاركىلەنگەن قارۋدىڭ باسىم بولىگىنىڭ مەنشىك قۇقىعى ءالى انىقتالماعانىن, ولاردى قاسكويلەر قىلمىستىق جولمەن العانىن ايتا كەتكەن ءجون», دەيدى الماتى قالالىق پد اكىمشىلىك پوليتسيا باسقارماسىنىڭ باستىعى نۇرلان امانبەك.
ايتا كەتەيىك, وسى كۇندەرى شاھاردا كريمينوگەندىك جاعدايدى جاقسارتۋعا, سونداي-اق زاڭسىز اينالىمنان, ونىڭ ىشىندە بەلگىلى قاڭتار وقيعاسى كەزىندە قىلمىستىق قۇرامداردىڭ مەنشىگىنە اينالعان قارۋدى تاركىلەۋگە باعىتتالعان «قارۋ» جەدەل الدىن الۋ ءىس-شاراسى جۇرگىزىلىپ جاتىر.
«سونداي-اق قىلمىستىق جاۋاپكەرشىلىكتەن بوساتاتىن, قارۋدى ءوز ەركىمەن تاپسىرۋ ناۋقانىنا نازار اۋدارۋ قاجەت. ول جالعاسىپ جاتىر», دەدى پوليتسيا وكىلى.